LUCAS 12

Jesosaa huohuicapoa Eyacuiñajjija epeejjinisho poanicuanajo

(Mt 10.26-27)

1Majotiiya jjachichaquicapoa queahuisoneenee dejjacuana, eponacuana pea-ai yajja sicome yajji. Jjacuiajeashiñajeaquinequiapoa peacuanaja eyamijo queahuisoneenee poajjejojo. Ma meshijotiiya aje Jesosaa huohuicapoa ebionei o shajja-ajjajji poanicuana oopana jama ba'a: —Jjajaahuananeiquicue quiana oe fariseo dejjacuanajo. Comacuana ca Eyacuiñajjija epeejjinisho, e'ejojonei pojjeama. Ojaya ejjashahuabaquijji queaquehua pahui shejjeemeejji jayojja peacuana o jayojja queaquehua pomeejji poani. 2Ojjañacuanaja mimishi cua oja huanaquehua jaa queaja'a huohuicaje'yo quijje. Cua oja iyaquehua ani pea-ai bacaje'yo cuaa quijje queaja'a. 3Oya jayojja ojjaña ma miquianaya quea-aapojo esohui quehuajje miminequinaje, quijje epojjajo queaja'anee huohuicaje'yo. Ojjaña esohui ma miquiana jjashajjahuohuiquinaje miquianaja equidojjojo ani esecuejjani eca'a nequijo oya esohuitiiya ja'anei taaaje cuana esecueyasijje ona ejjachichaqui anicaja eshajja-ajjajji.—

Ajeo queamete pocajji huohuicapoa Jesosaa

(Mt 10.28-31)

4Jesosaa huohuipea-aicapoa cuana jama ba'a: —Miquianaya ecuea epeejjicuana, pea esohui huohuiaña. A'a queamete pojji miquianaja eyaminei peaja equecua'yojjijo. Miquiana quecuaca'yajo mahuisotii quiana queanee acaje'yo, queanee eabeca'yojjitii pojjeama poaje. 5Jjeya eyaya quiana huohuije ajeo queametenee pocajji. Eyacuiñajjijonei ca quiana ca oe queametenee pocajji. Oya oenei queaca'aneetii nequiani dejjacuana manomee'yojji oja edojjoshahua jeajeamee'yojji Cuaqui-aiyasijje. Jamajjeya o oeneijoya queametenee pocajji.

6—Bacue, beca eso'dojjojo cinco cuichojji anohui jjeshecani cuaa. Oya anohui sosema' jayojja poani, dejja, epona jama pojjeama. Jamatii Eyacuiñajjija eba ojjaña anohuicuana, oya oe anohui pajeapajea'yoajja. 7Miquianaya ca ojaya ebaneinei, joya ecua anohuicuana jama pojjeama. Miquianaja sapajo ehuojjaña ojaya ebanei ache huiso nequi miquianaya ojaya ebaneineijojoya. Jamajjeya a'a queamete pojji. Eyacuiñajjiya miquiana queanahuenee bacani anohuicuana jama pojjeama.—

Jesosaja epeejjicuana bichoamanei pocajji ojo

(Mt 10.32-33; 12.32; 10.19-20)

8Jesosaa huohuipea-aicapoa cuana jama ba'a: —Eyaya quiana huohuiaña, ojjaña joya bichoamanei poani emimijji dejjacuana ani cojjaneijo jama ba'a: “Eya ca iña Jesosaja epeejji poani,” macuanajoya eyaya, Dejjapojji epohua, Eyacuiñajjija angelcuana cojjaneijo bichoamaa huohuipea-aije jama ba'a: “Oya caca e'ejojonei ecuea epeejji poani.” Jamaya aje ojo. 9Ojjaña joya mimiani dejjacuana ani cojjaneijo jama ba'a: “Eya ca iña Jesosaja epeejji pojjeama” macuanajoya caca oe Eyacuiñajjija angelcuana cojjaneijo eyaya huohuipea-aije ba'a: “Ecuea ca coma bajjimanei poani, ecuea epeejji pojjeama oya.” Jamaya eya poaje ojo.

10—Dejjacuana eya Dejjapojji epojo queatainee mimianijo Eyacuiñajjija coma mimishi cuijeaca'yojji. Eyacuiñajjija Edojjoshahuapamejo queatainee mimiajo caca oe comaja mimishi ecuijea'yojjitii pojjeama poaje.

11—Quijje miquiana judiocuanaja equi-ai ejjachichaquijji aniyasijje etii poanicuanaja ebajji a'a queamimishi poanaje dojocajje pea dejjacuana etii poanija pea-ai enapameejji o ani cojjaneiyasijje ohua dojocajje, a'a queayenotii jjashahuabaquijji ache esohui shai mimije etii poanicuananijje ejjanahuequijji. 12Miquiana o cojjaneijo emimijji nequiajo Eyacuiñajjija Edojjoshahuapameya miquiana esohui queaja'a mimimeesahuacaje— jamaya Jesosa poa.

Pea dejja quea-aquianahuisonee sapadojjoma' jayojja jjashahuabaquiapoa

13Majoya aje oe dejjaa ona ejjachichaqui anicajo Jesosa huohuicapoa jama ba'a: —Esohuihuohuijji, ecue dohue huohuicue ecue chiija quijjojea ecuea epo'yojji aquianacuana ojaya e equia'yojji.—

14Jesosaa oya saja-acapoa jama ba'a: —Dejja, ¿aya eya bajjanicanaje a'a queamimishi poani, a'a queapame poani ehuohuijji? ¿Aya eya peaja meshi, aquianacuana quiapoquiajji epojji nequimeecanaje pea-ai? Ayapishana.—

15Majoya Jesosaa ojjaña majo anica huohuicapoa jama ba'a: —A'a jjashahuabaquijjitii quea-aquianahuisonee epojjijo. Eseya ma aquianacuana queahuisojotii pojjeama queapame ba'epoquije. Majoneitii pojjeama eseya eshe ba'epoquiani.—

16Majoya Jesosaa pea esohui ebameesahuajjijo huohuipea-aicapoa cuana jama ba'a: —Oe dejja quea-aquianahuisonee nequiya queahuisonee oja banacuana jahuajo sejjameeca'yonaje cuana. 17Ma dejja quea-aquianahuisonee jjashahuabaquinaje jama ba'a: “¿Yajja eyaya aje? Jiquio esejja'yocuana achacua huanameeje queahuisoneeneejojoya.” 18Majoya oya jjashahuabaquinaje jama ba'a: “E'e, ecuea eba yajja aje. Eyaya ebionei equicuana queabiso ecuea aquianahuanajji poanaje quecuajeabichajeameeje'yo. Majoya equicuana queaquemonee eyacua iyameeje'yo ojjaña ecuea esejja'yocuana huanajji, ojjaña ecuea pea aquianacuana iyajji pea-ai. 19Jama pomajje eya jjabaquije jama ba'a: Eyaya aquianacuana queahuisoneenee huanamee'yonaje queashequiajahuiso e queapamenee ba'epoquijji bobijji queabihuinee. Majoya eya chacochacojjimatii ba'epoquije, ijjiaijjiapoquije, ishi-ishipoquije. Majoya queabihuitii ba'epoquije” jamaya poanaje. 20Majoya Eyacuiñajjiya oya huohuicanaje jama ba'a: “Miya sapadojjoma' jayojja jjashahuabaquiani. Jjeya miya jiquio mecajjetii manoje'yo. Jiquio miquea queahuisoneenee aquianacuana eiya'yo jaa, ehuana'yo jaa pea-ai, mi queabihui nequipoquijji nisho poanaje, jjeyahua quijjojeaje. ¿Ajea shai poaje'yo miquea bajjima? Peaa jjeshecaje'yo.”— 21Majoya Jesosaa ma dejjajo esohui oe-ejjenei huohuicapoa jama ba'a: —Jama pea-aiya poaje'yo ojjañacuana joya jiquio meshijo ba'e aquiana queahuiso chichapoquijjijo jjashahuabaquianitiicuana. Oya jjashahuabaquiajjanei aquiana Eyajo ani echichapoquijjijo.—

Eyacuiñajjiya oja bacuacuana jaahuanacapoquianitii

(Mt 6.25-34)

22Majoya aje Jesosaa o shajja-ajjajji poanicuana huohuicapoa jama ba'a: —A'a queayenotii jjashahuabaquipoquijji bobicuana jjeshepoquiajjijo, daquicuana ehuoshojjijo pea-ai jiquio meshijo eba'epoquijji. 23Miquianaya bobi ijjiapoquiajjijo, daqui ehuoshopoquiajjijo mahuisojotii pojjeama eshe ba'epoquiani. 24Bacue cuichojjicuana. Oya que bana-ajja, sejjasejja'yoajja pea-ai. Equi iya'yoajja aquiana huanajji. Jamatiiya Eyacuiñajjiya Eyajo nequiya oya queapame bobi quiacapoquiani. ¿A'a ojaya cuichojjicuana oeneiya queajea poani? Chojja de, miquianaya caca oe ojaya queajeaneenee poani cuichojjicuana jama pojjeama. 25Miquianaya queayeno jjashahuabaquipoquianitii mi mano'yojjijo, ¿a'a ma epojja shonoshonomeeje? Chojja, che una hora shonoshonomeejjima aje mi mano'yojji epojji. 26Ma camaja-ama miquiaaya baña queacamajanee eajji, miquiana mano'yojji che una hora miquianaja eshonoshonomeejji pojjeama poaje. Jamajojoya ¿apiojji jjashahuabaquipoquianitii queayeno miquianaja eba'ejji queapame pomeejji nishojo?

27—Bacue shashacuana ebiojo nequi queapame tiiani. Oya caca chacochacoajja, socosocoajja. Jamatii shashacuana queabamenee nequiani, pea pea huo'ome poani. Eyaya quiana huohuiaña ma yahuajonei emeshimese Salomonya daqui queanahue, queasiyonee huoshocapoa jiquio ecua shashacuana jama pojjeama poani, shasha ca queabameneenee. 28Eyacuiñajjiya shashacuana queapame pohuameecapoquiani meshijo enequijji so'o, jamatii quijje oya eyaacuaji'yo dahuajeacani. Ohuaya shashacuana queapame pohuameecapoquiani bamajje, ¿a'a ohuaya miquiana daqui quiacaje ehuoshojji miquiana ojaya queajeaneenee poanijojoya? E'e, quiacaje. Jamatii miquiana oepojjinei jjashahuabaquiani ojo, Eyacuiñajjija miquiana ejaahuanajji pojjeama poso jjabaquiani. 29A'a oe queayeno jjashahuabaquipoquijjitii quiana jama ba'a: ¿A'ya cuae seya jjeya che ijjiaje, ishije pea-ai? 30Eyacuiñajjija esohui bapojjima'cuana jama queayeno jjashahuabaquimeya popoquianitii aquianacuanajo. Miquianaja Chii-ai Eyajo nequija ca ebatii ache queapame miquiana ba'emeesahuajji ojaya equiajji. 31Jamajjeya ebionei miquianaya queaja'a ba'esaneineipocue Eyacuiñajjijo oya ojjañacuana huoojeapoquiajjitii poani. Majoya ohuaya ojjaña miquiana queapame ba'emeesahuajji jiquio meshijo ani quiacapoquije.—

Jesosaa huohuicapoa aquiana queahuiso Eyajo ani echichapoquiajjijo

(Mt 6.19-21)

32Jesosaa huohuipea-aicapoa cuana jama ba'a: —A'a quiana oe queamete pojji, ecuea ovejacuana jayojja poani quiana. Miquiana oepojjinei ani, jamatii miquianaja Chii-aiya ojaya ejjashahuabaquijji jama acaje miquianajo. Ohuaya miquiana queaca'a nequimeecaje ohua ojjañacuana huoojeacapoquijetii meshiyasijje. 33Jamajjeya miquianaja aquianacuana quia'yocue bejjo sosejje aema'cuana asahuajji. Jama pomajje miquiaaya aquiana queahuiso chichapoquiaje Eyahuasijje. Aquiana majo ani Eyahuasijje anitiitiipoquije, oe po-ajja. Chama'neinei siipojjicuana cuama, aquiana majo ani ihuiajjaneinei pea-ai. 34Jamajjeya aquianacuana jiquio meshijotii eanijji chichapoquiamajje, jiquio meshijotii ani aquianajo jjashahuabaquipoquijetii. Aquianacuana Eyajo eanijji chichapoquiamajje ca Eyajo eba'epoqui'yojji jjashahuabaquipoquije.—

Miquiana apoa pocajji

35-36Jama huohuime apea-aicapoa Jesosaa ba'a: —Jiquio ecua peajo chacochacoanicuaa o chacomeejji dejja ishoacapoquiani jama pocue. O chacomeejji dejja poquinaje peaja equiyasijje pea dejja jjahuanaquije baa. Ma ojo chacochacoanicuana cuaquijijicuana dahuahuojjemajje cahuijjimatii anichichanaje. O chacomeejji dejjaa poe'yomajje esecuejjani ca'ajji cuiaqueyacaña'yajo esecuejjani ca'ajji ca'apejonanacaje cuaa. 37O chacomeejji dejjaa oya eshetii cahuijjima ani baña'yomajje queabihuinee poaje. E'ejojonei eyaya miya huohuiaña, o chacomeejji dejjaa ma ojo chacochacoanicuana oja mesajotii animeemajje ojaya bobinei iyacuayacaje o bobiajji. 38Queabihuinee poaje cuana oya cahuijjimatii anichichanaje mecashono, jjapojjaquiyasijje pea-ai o chacomeejji dejja ishoapo-aninajejjejojo. 39Eyaya pea esohui huohuipea-aije miquianaja queaja'a epojji ba'a: Equimeseja ache mecashono siipojji oja equiyasijje poeje ebajjemo oya cahuijjimatii aniya siipojji oja equiyasijje nobimeequijjima acame. 40Oya jayojja miquianaja pea-ai bajjima acheshono eya, Dejjapojji epo, poeje o'oya. Jamajjeya apoa epotii ba'epoquicue quiana. Ojjañacuanaja bajjimajo, eya epoejji pojjeama poso acanijo eya poeje o'oya— jamaya esohui huohuicapoa Jesosaa.

Jesosaa huohuicapoa beca dejjajo, oe chacochacoani queapame, pea ca queamimishi poani

(Mt 24.45-51)

41Majoya aje Pedrohua Jesosa huohuiajjacapoa jama ba'a: —Emeshimesenei, jiquio esohui ebameesahuajjijo huohuinaje oopana ecuanaja eshajja-ajjajji, ¿a'a ojjañacuanaja shajja-ajjacajji pea-ai?—

42Jesosaa oya saja-acapoa jama ba'a: —Equimeseya pea meshiyasijje poquijjimahuaa dejja oja equijaahuanajji epojji queasapaja'a, hueya-ama babacacanaje. Majoya oya huohuicanananaje ma ojo chacochacoanicuana bobi oja equiapoquiajji. 43Ma dejja queabihuinee poaje equimeseya oya hueya-ama chacochacoani bacaña'yajje ma ohua o huohuicanananaje oja echacojjijo. 44E'ejojonei eyaya quiana huohuiaña, joya hueya-amanei chacochacoani baña'yomajje equimeseya coma dejjaya ojjaña oja aquianajaahuanajji epojji nequimeecaje. Majoya ohuaya queahuiso oya sosequiacapoquije. 45Ma dejja oja equijaahuanajji poani pojja'a queaquehua jjashahuabaquimajje jama poaje ba'a: “Jjeya ca dejja jiquio equimese epoecuaji'yojji pojjeama. Quijje pojja'a poeje'yo oya.” Majoya ohuaya onijje chacochacoanicuananijje quenequenemajje cuiasejjajeacaje. Majoya oya chacochacoajja poaje, ijjiaijjiapoquije, ishi-ishije, huooje pea-ai. 46Equijaahuanajji poani dejja jamatii equimesejo o jjashahuabaquijjimanei nequijo, ache pojjajo shai oya poeje'yo ojaya bajjimanei poanijo pea-ai, equimese poeje'yo o ba'yohua. Equimeseya oja equijaahuanajji poani dejja queamimishitii poani baña'yomajje queaneenee pomeecaje'yo oya. Ohuaya oya queahuesha huoojeacaje'yo ma ojjaña oja epeejjinisho poanajecuana huoojeaca'yapoa meshiyasijjeya.

47—Equijaahuanajji poani dejjaja ebatii poanaje equimeseja esohui echacojjijo jamatii oya jayojja ohua mi-ajeyocajo equimeseya oya queaneenee cuiasejjajeameecaje queahuisonee. 48Equijaahuanajji poanija pojja'a bajjima poanaje equimeseja esohui echacojjijo. Majoya oja esohui ohua mi-ajeyocajo equimeseya oya oepojji cuiasejjajeameecaje. Ma dejja Eyacuiñajjiya ojaya echacojjijo queahuiso bameesahuacani coma dejja hueya-ama chacochacocajji Eyacuiñajjijo ojaya ebajojoya. Ma dejja Eyacuiñajjiya aquiana queahuiso quiacani ojo echacochacojji coma dejja ojjaña Eyacuiñajjiya oya ameesa-acani huisotiijo chacochacocajji.—

Oya jayojja pea-ai jjashahuabaquime pojjeama poa cuana Jesosajo

(Mt 10.34-36)

49Jesosaa huohuitiicapoa cuana jama ba'a: —Eya poeapoa ojjañacuanaja oja mimishi queaja'anee huohui'yohua jiquio ecua cuaqui queaquemonee dahuahuojjecani cuaa ojjaña aquianacuana quiyojea'yojji jamaya. Eya queabihui pome jiquio cuaqui queaquemonee yahuajoneitii edahuahuojje poajojjemo. 50Jamatii ebionei ecuea queacamajaneenee poaje. Majo jjaishoaquianiya eya queayenoneenee poani. 51A'a quiana oe ejo jjashahuabaquijji jama ba'a: “Oya Jesosa poeyanaje ojjañacuiñajjicuana ojee queabei ba'emee'yohua.” Chojja, majo pojjeama eya poeyanaje jiquio meshiyasijje. Eya epoejojoya dejjacuana ojee queabei pojjeama ba'eje oya jayojja pea-ai jjashahuabaquime po-ajjajjejojoya ejo. 52Jjeyanei, quijje pea-ai beca huapa pojjeamaneicuana oya jayojja jjashahuabaquime pojjeama poaje ejo. Oe equijo ba'e tres pojja'a queapame jjashahuabaquije ejo, beca pojja'a ca queaquehuatii jjashahuabaquije ejo. 53Pea equicuanajo ba'eya echiimesecuaa ebacuaejjacuana botiama acaje ejo oya ecuea epeejji poanijojoya. Oya jayojja ebacuaejjacuaa oja chiicuana botiama acaje ejo. Enaesecuaa oja bacuasecuana botiama acaje ejo. Oya jayojja ebacuasecuaa oja naecuana botiama acaje ejo. Oya jayojja oja osecuaja naecuaa oja anocuana botiama acaje ejo. Oya jayojja eanomesecuaa oja osecuaja naecuana botiama acaje ejo oya ecuea epeejji poanijojoya.—

Ae bamajje queaja'a bacajji achajja poaje quijje

(Mt 16.1-4; Mc 8.11-13)

54Jesosaa huohuitiicapoa cuana oja esohui shajja-ajjaa poetii anicuana jama ba'a: —Miquiaaya bocuana quea-aapo nequi poeje bamajje huohuiaña ena poeje. Majoya ena poaje. 55Majoya beni eeno poeanimijijje poeajo aña queaquiyonee poaje jjeya. Majoya queaquiyonee poaje.#12.55 Nota: Israel meshijo queaquiyonee poani beni eeno poeanimijijje poeajo.* 56¡Miquiana caca oe Eyacuiñajjija epeejjinisho poani! Jiquio bocuana eyatahuatahuajo nequi, beni pea-ai baña queaja'a ebajji achajja epojja mecahuajje nequije. A'a ena poeje, a'a queaquiyonee poaje pea-ai queaja'a baña. Jamatii Eyacuiñajjija esohui ebameesahuajjicuanajo queaja'a jjashahuabaquiajja quiana a'ya oja huoojea ojjaña nahue'yojji poani miquianaja bajjima, queaquehuatii poani.—

Jesosaa huohuipea-aicapoa mi napameesapojjicuana achajja jjabeimeequica'yojji

(Mt 5.25-26)

57Jesosaa huohuipea-aicapoa cuana jama ba'a: —Miquianaja eba achajja queapame eba'epoquijji. Jamajjeya, ¿yajjajje shai oya jayojja pea-ai queapame miba'epoquiani? 58Eyaya esohui ebameesahuajji huohuije. Joya mi napameesapojjinijje ebionei mimiqui'yocue minijje ejjabeimeequi'yojji dejja etii peacuana a'a queapame a'a queamimishi huohuijji aniyasijje poquijjimahua. Miya mijjabeimeequi'yajje ohuaya etii poanicuana huohuicaje mi jeanobiameejjijo. 59E'ejojonei eyaya miya huohuiaña. Miya majotii ejjajeanobiaquijji equijo ani ecuayaqui'yojji pojjeamatii poaje bejjo mi cuayaqui'yojji sosejje miquiajeyomajje— jama huohuimeya acapoa Jesosaa.

Currently Selected:

LUCAS 12: ESE

Highlight

Copy