JUAN 4

Jesosa mimiapoa samaritana eponanijje

1Majoya aje quijje fariseo dejjacuaa shajja-ajjacapoa Jesosaa queahuisocuana iñajeanobiacani enaojjohuasijje, Juanya ca iyehuisocuana iñajeanobiacani. 2Jesosaa pojjeama ca iñajeanobiacanequiapoa cuana, o shajja-ajjajji poanicuaa caca iñajeanobiacanequiapoa cuana enaojjohuasijje. 3Majoya fariseo dejjacuanaja esohui shajja-ajjamajje Jesosa provincia Judea meshijo nequi poqui'yapoa provincia Galilea meshiyasijje.

4Jamajjeya Jesosa epoqui'yojji huacuaya provincia Galilea meshiyasijje provincia Samaria meshijje jjayejjequi'yapoa. 5Jesosaa Samaria meshijje poqui'yaniya pueblo Sicar meshi bacañaquiapoa. Yahuajonei Jacobya oja bacuaejja José meshi quiacapoa oja osecuacuana ba'epoquijji. Ma meshi oja quiachipineijoya Sicar meshi jaapoa ojee. 6Yahuajonei Jacobya oja quia meshijo enanequijji teohuejjameecapoa cuana. Majoya aje Jesosa ejeojjijje queahueshanee pojebe'yani queamano poa. Jamajjeya oya ma ena eteohuejjapejjeneijo jomishoca-aniñapoa eshequi biacojjajjanei nequijo. 7-8Jesosa shajja-ajjajji poani dejjacuana ca poquiapoa pueblo Sicar meshiyasijje bobi jjesheya. O shajja-ajjajji poanicuana epoquijo oe samaritana epona poeapoa ena eteohuejjajo nequi ena jjehuaa. Majoya Jesosaa epona huohuiajjacapoa jama ba'a: —Che mo ena quiacue eishijji.—

9Ma eponaa Jesosa saja-acapoa jama ba'a: —Miya judío dejja, eya caca iña samaritana epona. Jamajjeya, ¿apiojji acuae eya huohuiajjaña ena ecuea miya equiajji?— jamaya epona poa. Judiocuana samaritanocuananijje jjapeequiajjaneitii poa, onijje mimiajjaneipea-aipoa.

10Jesosaa epona saja-acapoa jama ba'a: —E'ejojonei, eya miquea bajjimanei. Eyacuiñajjija ejjashahuabaquijji queapamenee ojjañacuanajo miquea bajjima pea-ai. Maya miquea ebajojjemo miya enijje jama mimime pome ba'a: “Che mo oe ena quiacue ecuea eishijji.” Miya jama enijje emimijojjemo eyaya miya ena eba'etiitiipoqui'yojji quiame.—

11Samaritana eponaa oya jama acapoa ba'a: —E'e pojja'a, ecuea etii. Jiquio eteohuejja ena queadoeneenee nequi. Miquea chama' ena jjequisohuajji. Jamajjeya, ¿achacua nequi ena eba'etiitii'yojji eya miyaya quiame ecuea eishijji? 12Eseja etiiquiaa Jacobya jiquio enanequijji jjani teohuejjameecapoa yahuajonei. Ohuaya, oja bacuacuaa, oja ovejacuaa, pea oja huonecuaa pea-aiya ishimajamajacanequianinaje jiquio ena eteohuejjaya. Ecuaaya jiquio nequi ena ishimajamajapoquiañatii pea-ai. ¿A'a miya queajjashahuabaquija'anee jjabaquiani, queaca'anee, Jacob caca queajjashahuabaquija'apishana, ca'a-ama?— Jamaya acapoa ma eponaa Jesosa iyeca'a poani poso bamajje.

13Jesosaa epona saja-acapoa jama ba'a: —Ojjaña quiana jiquio ena ishimajje queanabataja po-o'oyani. 14Ojjaña joya ecue quia ena ishijji poajecuana enabatajabecapoqui'yojjitii pojjeama poaje. Jiquio ecua ena meshiquipajje quea-oshenee cuayaquinequianitii jama pea-aiya oya ba'etiitiije'yo.—

15Majoya eponaa Jesosa huohuicapoa jama ba'a: —Ecuea etii, che mo comaya ena ishimeecue queanabataja epobeca'yojjitii pojjeama ena. Jamajjeya eya jiquiacua ena eteohuejjahuasijje ena jjehuaa epoebecanequi'yojji pojjeamatii poaje'yo.—

16Jesosaa oya jama acapoa ba'a: —E'e poquisocue mique ahue jjequiya.—

17Eponaa Jesosa saja-acapoa jama ba'a: —Ecuea yahue chama', eya ahuema' ani.—

Jesosaa oya saja-acapoa jama ba'a: —E'e, miya e'ejojonei huohui poani ba'a: “Chama' ecuea yahue.” 18Ecuea miya eba, miquea yahue cinco huisome yahuajo nequinaje. Jjeya miya jiquio pea dejjanijje jaapoquiani miquea yahuenei pojjeamanijje. Jamajjeya miya e'ejojonei huohui poanaje ba'a: “Ecuea yahue chama'.”—

19Jesosaja esohui shajja-ajjamajje eponaa jama acapoa ba'a: —Ecuea etii, eyaya miya baña e'ejojonei Eyacuiñajjija esohuihuohuijji poani. 20Ecuea etiiquiana samaritanocuaa ecuioshajjajo nequiya Eyacuiñajji bihuiacaninaje jiquiacua jiquio eyiyo nequiyasijje. Miquianaya judiocuana ca jama poani ba'a: “Jerusalén meshijotii caca ecuioshajjajo nequiya Eyacuiñajji bihuiacapoquijji, eyiyohuasijje pojjeama” jamaya miquianaya poani.—

21Jesosaa oya saja-acapoa jama ba'a: —E'ejojonei ecuea esohuijo jjashahuabaqui'yocue. Quijjepishana ecuioshajjajo nequiya Eyacuiñajji bihuiacaje queahuisocuaa jiquiacua jiquio eyiyohuasijje poejjimaa, Jerusalén meshiyasijje poquijjimaa pea-aiya. Jamajjeya ojjaña meshiyasijje ecuioshajjajo nequiya Eyacuiñajji bihuiacaje cuaa. 22Miquiaaya samaritanocuaa ecuioshajjajo nequiya Eyacuiñajji jamatii bajjimajotii oya bihuiajeaña. Ecuaaya caca judío dejjacuaa Eyacuiñajji e'ejojonei bihuiaña. Eyacuiñajjija huoojea ojjaña nahue'yojji epojji ecuananijje jaajjinei judío poaje. 23Jamajjeya jjeyanei queapamenee Eyacuiñajji Echii-ai e'ejojonei bihuiacaje cuaa. Edojjoshahuapameya queaja'anee oya bihuiameesahuacaje cuana. Jamaya Eyacuiñajji Echii-aiya dejjacuana eponacuana oja ecuioshajjajo nequi o bihuiapoquiajji epojji pomeesa-acani. 24Eyacuiñajji edojjoshahuapame poani, oya yamijji pojjeama. Jamajjeya o bihuiapoquiajji poanicuaa e'ejojonei oja ecuioshajjajo nequiya oya bihuiacaje oja cojjaja bajjimajotii. Edojjoshahuapameya e'ejojonei bihuiameesahuacapoquije cuana, ohuayaneitii pojjeama.—

25Majoya ma eponaa jama acapoa ba'a: —Ecuea eba Eyacuiñajjija huoojea ese nahue'yojji epojji poeneije ma bajjani ba'a: Quito. Ohuaya poemajje ojjaña esohui queaja'anee ecuana huohuicañaje.—

26Jesosaa oya jama acapoa ba'a: —Eya ca iña jjeyanei jiquio minijje mimiani dejja e'ejojonei quio Eyacuiñajjija huoojea— jamaya poa Jesosa.

27Majoya aje Jesosa shajja-ajjajji poani dejjacuana bobi jjesheya poqui poe'yomajje Jesosa bacaña'yapoa cuaa oya samaritana eponanijje mimimimiani. O jama poani baña'yomajje jjashahuabaquiapoa cuana jama ba'a: —¿Ajeo shai Jesosa jiquio eponanijje mimimimiani? ¿Ajeo shai poe oya epona jiquiacua?— Jama jjashahuabaquimeya poa cuana, jamatii Jesosa huohuiajjajjimatii nequiña'yapoa cuana. 28Majoya epona oja meshimisi dojojjimatii poquicuaji'yapoa Sicar meshiyasijje macuiñajjicuana huohuiñaqui'yohua Jesosajo.

29Ma meshijo ba'eca eponaa huohuicañaqui'yapoa jama ba'a: —¡Poeajja enijje jiquiacua oe dejja ena eteohuejjapejjejo ani baa! Ohuaya eya ojjaña ecuea eba'ejji ma eya apoquianaje huisotii huohuica'yonaje queaja'anee. E'e pojja'a, ¿a'a shai oya Eyacuiñajjija huoojea ojjaña nahue'yojji epojji?—

30Eponaa jama huohuime acajje ojjaña Sicarcuiñajjicuana poquicuajicananapoa Jesosa baa. 31Macuiñajjicuana poejjimahuajo o shajja-ajjajji poanicuana Jesosanijje jama poa ba'a: —Esohuihuohuijji, ma-aje bobi che jiquio ijjiasocue.—

32Jesosaa ca jama acapoa cuana ba'a: —Ecuea pea bobi yani ecuea eijjiajji jiquio miquianaja bajjima.—

33Jamajjeya o shajja-ajjajji poanicuana ojee mimimimiapoa ba'a: —¿A'a acuae peacuaa ojaya bobi yecanaje eijjiajji?— jama posoya acapoa cuaa.

34Jesosa o shajja-ajjajji poanicuana jama poani shajja-ajjamajje jama poa ba'a: —Eyacuiñajjija, e huoojeajji epoja echacojji ajeyomajje eya queabihui poani jiquio ecua quiana bobi ijjiamajje queabihui poani jama pea-ai. Jamajjeya oja echacojji eyaya ajeyoje'yo. 35Miquianaya jama poani ba'a: “Quijje anosoai sejjaje'yo cuatro ba'ime huiso apoa poajo.” Eyaya caca miquiana huohuiaña jama ba'a: ¡Bacue! Jjeyanei anosoai ejahuanei nequi, apoa esejja'yojji.#4.35 Nota: Jiquio esohui jama poanijje ba'a: Eyacuiñajjija esohuihuohuijjicuana anosoai sejja'yojji jayojja poani. Queahuisocuana apoa epo ejjashahuabaqui'yojji anosoai ejahua jayojja poani.* 36Anosoai sejja'yojji poanicuana equemeseya sosequiacani. Oja sejja'yo jiquio ecua ojjaña Jesosajo jjashahuabaquicaje'yocuana jama pea-aiya poani. Oja sejja'yo poanicuana ba'etiitiipoquije'yo queabihuinee. Jamajjeya eso'quecuajji poanaje dejja, jiquio esejja'yojji poani dejja pea-ai ojee queabihuinee pea-ai poani esejja'yo queahuiso poaje bamajje. 37E'e, jamaya e'ejojonei poanicuana ba'a: “Oe dejjaa eso' quecuacani, quijje pea dejjaa sejjacaje'yo.” 38Jjeya eyaya quiana huoojeaña dejjacuana sohuihuohuiya jiquio ecua anosoai sejja'yohua poquiani cuana jama. Yahuajonei pea esohuihuohuijjicuaa huohuiajjamajamajacaninaje cuana queacamajaneenee. Ebionei jjashahuabaqui'yojjimatii aninaje cuana. Majoya quijje miya esohui huohuiajje jjashahuabaquije'yo cuana peaja yahuajo oya ehuohuitii poanajejjejojoya. Jamajjeya ma ebionei esohuihuohuijji poaninaje dejjacuanaja echacojjijotii queabihui poaje quiana— jamaya poa Jesosa.

39Majoya aje queahuisonee Sicarcuiñajjicuana jjashahuabaquica'yapoa Jesosajo ma eponaa jama huohuime acajje ba'a: “Ohuaya eya ojjaña ecuea eba'ejji ma eya apoquianaje huisotii huohuica'yonaje queaja'anee.” 40Jamajjeya Samariacuiñajjicuana Jesosa ani bañaquimajje jama poñaquiapoa ba'a: —Esohuihuohuijji, ecuananijje che nequisocue.— Jamajjeya Jesosa cahui beca nequiapoa Samariacuiñajjicuananijje oja meshineijotii. 41Jesosaja esohui shajja-ajjamajje queahuiso ma meshijo ba'ecacuana jjashahuabaquica'yapoa ojo. 42Macuiñajjicuana eponanijje jama poa ba'a: —Miqueanei esohui oeneijo pojjeama ecuana jjashahuabaqui'yonaje Jesosajo. Ecuaaya Jesosaja esohui pea-ai shajja-ajjamajje baneinaje oya e'ejojonei Eyacuiñajjija huoojea ojjaña nahue'yojji epojji.—

Jesosaa emeshimeseja nequimeeja bacuaejja jja-ajameequica'yapoa

(Mt 8.5-13; Lc 7.1-10)

43Majoya aje Jesosa Samaria meshijo cahui beca nequimajje poqui'yapoa Galilea meshiyasijje. 44Jesosaa huohuicapoa cuana jama ba'a: —Eyacuiñajjija esohuihuohuijji oja meshineijo nequiajo onijjejaajjicuana o shajja-ajjasapo-ajjanei poaje, cajaa oya acaje cuaa.— 45Majoya aje quijje Jesosa Galilea meshi bacañaquiapoa. Galileacuiñajjicuaa Jesosa queabihuinee ja'acajjequiapoa ojaya eba poanajejojoya ma ohuaya acanequinaje Jerusalén meshijo nequiya. Jesosa Jerusalén meshijo nequiapoa ma yahuajonei Eyacuiñajjiya oja etiiquianaja bacuacuana nahuecapoa shahuaba'yojji fiestajo. Jesosaa dejjaja ajjima'neineicuana queahuiso acaqui bacapoa Galileacuiñajjicuaa Jerusalén meshijo aniya.

46Majoya aje quijje Jesosa poquio'oyapoa Caná meshiyasijje, ma ohua yahuajo ejjahuanaquijji fiestajo ena uvajjajjana' pojji acanaje meshiyasijje. Oe dejja etii poani emeshimeseja nequimeeja bacuaejja queamanoneenee jaapoa Capernaúm meshijo. 47Ma dejja etiiya Jesosa Judea meshijo ani epoe'yo Galilea meshiyasijje shajja-ajjacapoa. Jamajjeya Jesosaque poquicuajiapoa o huohuiajjaneiya. Jama acañaquiapoa ba'a: —Jesosa ecuea ebacuaejja esho'i queamanoneenee jaa jjeya. Manopoqui'yani. Poquicuajicue oe ecuea equiyasijje o jja-ajameequi'yohua.—

48Jesosaa oya saja-acapoa jama ba'a: —Miquianaya ecuea dejjaja ajjima'neineicuana eya mi-ajo jjashahuabaqui'yojjimatii nequije.—

49Ma dejja etiiya Jesosa huohuiajjaneineicao'oyapoa jama ba'a: —¡Che oe poecuajicue ecue bacua emanoqui'yo cuahuajo!—

50Jama poajo Jesosaa oya saja-acapoa jama ba'a: —Poqui'yocue miya miquea equiyasijje. Mique bacuaejja jja-ajaquije'yo.— Jamajjeya Jesosaja esohui e'ejojonei shajja-ajjamajje oya poqui'yapoa oja equiyasijje. 51Majoya o poqui'yanijo huacuaya, ojo chacochacoanicuana poeapoa o ba'yohua. Oya poeje'yo bamajje huohuicajjequi'yapoa cuaa jama ba'a: —Mique bacuaejja caca jja-ajaqui'yonaje.—

52Ma dejja etiiya huohuiajjacapoa cuana jama ba'a: —¿Achenei eshequi nequijo, ache pojjajo shai ecue bacuaejja jja-ajaqui'yonaje?—

Oya saja-acapoa cuaa ba'a: —Omamecajje eshequi ejjajeapaapishanaquijo, a la una sinecua, oya huoeca'yonaje, yejjecanaje.—

53Ojo chacochacoanicuaa jama acajje ma dejja etii poani jjashahuabaquiapoa jama ba'a: —Ma pojjajotiiya eshequi ejjajeapaapishanaquijotii Jesosaa eya jama acanaje ba'a: “¡Mique bacuaejja jja-ajaquije'yo!”— jama jjashahuabaquime poa oya. Jamajjeya oya, ojjaña oja equijo ba'ecuana pea-ai jjashahuabaquica'yapoa Jesosajo.

54Jamaya Jesosaa pea dejjaja ajjima'neinei acao'oyapoa Judea meshijo nequi Galilea meshiyasijje poeo'oyamajjeya.

Currently Selected:

JUAN 4: ESE

Highlight

Copy