JUAN 21

Jesosa jjanequija'aqui'yapoa siete o shajja-ajjajji poanaje dejjacuanajo

1-2Majoya aje quijje Jesosa o shajja-ajjajji poanaje dejjacuanajo jjanequija'aquio'oyapoa Tiberias baesahua anijo. Mahuiso o shajja-ajjajji poanajecuana ojee aniapoa ba'a: Simón Pedro, Tomás ma bajjani beca poa Becajaa bajjani, Natanael provincia Galilea pueblo Canacuiñajji dejja, beca Zebedeoja bacuaejja, pea beca Jesosa shajja-ajjajji poanaje dejja pea-ai. Mahuisoya aniapoa cuana. 3Baesahuajo ani Simón Pedro jama poa peacuananijje ba'a: —¡De! Iña ca nahuoo shojeaa poquije.—

Oya saja-acapoa cuaa jama ba'a: —Ee, cua'a, ecuana pea-ai poquije minijje.—

Majoya aje bishejo animajje bae enabaeyasijje besapoquiapoa cuana. Jamatii ma mecajje nahuoo shojeajjimanei poa cuanaja. 4Majoya aje jjapojjaquijeahuajo Jesosa baesahuajo jjanequija'aquio'oyapoa. O shajja-ajjajji poanaje dejjacuanaja bajjima poa oya Jesosa nequi. Oya pea dejja poso aca'yapoa cuaa. 5Majoya Jesosa hueshayeetii taaapoa cuana jama ba'a: —¿A'a quianaja jje che nahuoo shojeajjimaneinei?—

Saja-acapoa cuaa ba'a: —¡Chojja de, chama'neinei!—

6Jesosaa huohuicao'oyapoa cuana jama ba'a: —Eshojeajji ba'ehuananobiao'oyacue ebañei bishe'mijijje.—

Jamajjeya oja sohui jayojja acapoa cuaa nahuooshojeajji. Majoya queahuisoneenee nahuoocuana nobiqui'yapoa eshojeajjiyasijje. Queabiquienee poa ejjequijeasohua'yojji. 7Majoya o shajja-ajjajji poanaje dejja, ma Jesosaja queajeanee poanajeya jama poa Pedronijje ba'a: —Oya Emeshimesenei Jesosa nequi.—

Jama mimime pojeahuajo ba'a: “Emeshimesenei nequi” Simón Pedrohua oja daqui huoshojeacuajica'yapoa. Oya nahuoojo ponequiapoajjejojoya daqui yamima' so'o nequiapoa. Majoya aje daqui huosho'yomajje oya enahuasijje tohuananapoa Jesosa nequiyasijje eshocuishocuibesapoquijji. 8Majoya aje quijjepishana ma pea o shajja-ajjajji poanajecuana bishejo ani besajebeapoa meshijajisahuahuasijje Jesosa nequiyasijje. Nahuooshojeajji dojobesacapoa cuaa enajo ba'etii queanahuoocuatanee poajojoya. Cien metros meshijaji hueshame enajo ba'yapoa. 9Majoya meshijajiyasijje ba'eñaquimajje Jesosa shajja-ajjajji poanaje dejjacuaa cuaquijiji jaa bacapoa. Nahuoo jiña jaa, pahui pea-ai bacapoa cuaa. 10Majoya aje Jesosaa jama acapoa cuana ba'a: —Nahuoocuana iyehuiso yecue joya jjeya miquiaa shojeanaje.—

11Majoya aje Simón Pedrohua bisheyasijje nequisohuaquimajje eshojeajji queanahuoohuisoneenee jjequiyiyejeacapoquiapoa meshijajisahuahuasijje. Ciento cincuenta y tres huisome nahuoo queaquemo ba'yapoa enobiqui'yo. Jamatii oja eshojeajji quecuasejjajjima poa nahuoocuanaja. 12Jesosaa jama apea-aicapoa cuana ba'a: —¡Ocue poeajja, ijjiahuacue!—

Jesosa shajja-ajjajji poanaje dejjacuanaja Jesosa huohuiajjajjimatii poa ae shai oya ojaya ebajojoya oya Emeshimesenei poani. 13Majoya aje Jesosaa jjanequichipiquimajje pahui jjeshecapoa o shajja-ajjajji poanajecuana bobiajji. Ohuaya pahui, nahuoo pea-ai quiacapoa equemijji.

14Jesosa tres huisome jjanequija'aqui'yome poa o shajja-ajjajji poanajecuanajo ojaya eba'yojji oya eshequi'yo nequi.

Jesosa mimiapoa Pedronijje

15Majoya aje ijjiaijjiajeyomajje Jesosaa Pedro jama huohuiajjame acapoa ba'a: —Simón, Juanja bacuaejja, ¿a'a miquea eya queajeanee poani jiquio ecua peacuanaja eya queajeapishana poani jama pojjeama?—

Pedrohua oya saja-acapoa jama ba'a: —E'e Emeshimesenei, miquea eya eba ecuea miya queajeanee.—

Pedro jama poajo Jesosaa oya huohuicapoa jama ba'a: —Ecuea epeejjicuana jaahuanapoquiacue jiquio ecua dejjaa oja ovejaja bacuacuana jaahuananeicani jama pea-aiya acue.—

16Majoya aje Jesosaa Pedro huohuiajjacao'oyapoa jama ba'a: —Simón, Juanja bacuaejja, ¿a'a miquea eya queajeanee?—

Pedrohua oya saja-acapoa jama ba'a: —E'e Emeshimesenei, miquea eya eba ecuea miya queajeanee.—

O jama poajo Jesosaa oya huohuicapoa jama ba'a: —Ecuea epeejjicuana oveja jayojja poani jaahuanapoquiacue jiquio ecua dejjaa oja ovejacuana jaahuananeicani jama pea-aiya acue cuana.—

17Jesosaa oya huohuiajjacao'oyapoa oya esohuiya jama ba'a: —Simón, Juanja bacuaejja, ¿a'a miquea eya queajeanee?—

Ohua jama amajamajacajje Pedro queayeno poa Jesosaja esohuijo. Oya saja-acapoa jama ba'a: —Emeshimesenei, miquea ojjañatiicuana ebajeyojeyo. Jamajjeya miquea ebanei ecuea miya queajeanee.—

Majoya Jesosa jama poa ba'a: —Ecuea epeejjicuana jaahuanapoquiacue jiquio ecua dejjaa oja ovejacuana jaahuananeicani jama pea-aiya acue cuana. 18E'ejojonei eyaya miya huohuiaña. Yahuajo miyaya esho'yahuaa cua miya huoshosa-anaje daqui huoshopoquianaje, cua miya poquisapoanajeyasijje miya poquinequinaje. Quijje miyaya dejjatiimajje yaa jeaaje peaja mique aa ejeyojji. Miya dojocaje cuaa cua mi poquisapo-ajja poajeyasijje.—

19Jamaya Jesosaa oya huohuicapoa ojaya Pedroja queaja'a ebajji quijje achajja oya Pedro mano'yome poaje. Pedro jama manoje'yo bamajje Eyacuiñajji queaca'aneetii queasajajanee nequi queahuisocuaa bacaje. Majoya Jesosaa Pedro huohuicao'oyapoa jama ba'a: —Pedro, ecue esohuijo jjashajja-ajjaquipoquicuetii.—

Oe Jesosa shajja-ajjajji poanaje Jesosaja queajeanee poa

20Majoya aje Pedrohua oja ejacajjajje bajeacapoa ma Jesosaja queajeanee poanaje dejja poeje. Ma dejjaya yahuajo ijjiaijjianiya Jesosa huohuiajjacanaje jama ba'a: “¿Ache mique babaca dejjaa miya iñameesahuacaje bejjo sosejje?” 21Pedrohua ma dejja poeje bamajje huohuiajjacapoa Jesosa jama ba'a: —Emeshimesenei, jiquio poeani dejja, ¿yajja oya acaje'yo cuaa?—

22Jesosaa oya jama saja-ame acapoa ba'a: —Eyaya oya eshetii nequimeesa-añajo oya eshetii nequipoquije e poeo'oyajo. ¿Apiojji acuae miyaya ojo huohuiajjaña? Miya ca oe ecue esohuijo jjashajja-ajjaquipoquicuetii.—

23Jamajjeya Jesosaja epeejjicuana mimimimiapoa ma Jesosaja queajeanee o shajja-ajjajji poanaje dejja eshetii ohua enequimeecapoquije posojo. Jesosaja jama ajjima' poa ba'a: “Oya eshetii nequipoquije.” Oya ca jama poa ojo ba'a: “Eyaya oya eshetii nequimeesa-añajo oya eshetii nequipoquije jama poeje o'oya eya. ¿Apiojji ojo huohuiajjaña?” jamaya Jesosa poa ojo.

24Jesosa shajja-ajjajji poanaje dejjaa, joya Jesosaja queajeanee poanaje dejjaaya e'ejojonei esohui tehuecanaje quio ohua bacapoquiapoa huisotii. Jamajjeya esejaya eba ojaya esohui e'ejojonei poani.

25Jesosaa queahuisonee ma dejjaja ajjima'neineicuana acapoquiapoa jiquio meshijo nequiya jamatii ojjaña oja acuana tehuejeyojjima poacuanaja. Ojjañatii oja acuana etehuejeyopoajojjemo chama' poquiae papeni queahuiso jiquio meshijo jaa ojjaña oja acuana etehuejeyojji.

Currently Selected:

JUAN 21: ESE

Highlight

Copy