JUAN 2

Dejja jjahuanaquiapoa Caná meshijo ani eponajo

1Majoya aje tres cahuime huiso poajo fiesta ejjahuanaquijji acapoa cuaa provincia Galilea pueblo Caná meshijo. Jesosaja enaese María majo pea-ai aniapoa. 2Macuiñajjicuaa Jesosa, o shajja-ajjajji poanicuana pea-ai iyaacapoa o jjahuanaquije ebajji, ojee onijje eijjiaijjiapea-aijji. 3Majoya ojee ijjiaijjianiya uvajjajjana' ishijeyocapoa cuaa. Jamajjeya Jesosaja enaese onijje mimiapoa jama ba'a: —Ojaya uvajjajjana' oe poanaje, ishijeyocanaje cuaa.—

4Jesosaa oja enaese saja-acapoa jama ba'a: —¿Apiojji eya miyaya jama aña uvajjajjanajo? Eya jjeyanei apoa pojjima' nequi so'o jiquio dejjaja ajjima'neineicuana ecuea eajji.—

5Majoya Jesosaja enaeseya ma bobi iyacuayajji poanicuana huohuicapoa jama ba'a: —Ojjaña jiquio Jesosaa huohuicaje esohui huisotii oe acue.—

6Ma equijo seis meshimisiaicuana nequiapoa. Ena queahuiso 60 litros nequijji poa oe meshimisiaijo. Ma enajoya judiocuaa ojaya eme shacuacapoquiapoa ojaya etiiquianaja esohui jayojja eajji. 7Jesosaa bobi iyacuayajji poanicuana jama huohuime acapoa ba'a: —Ena shocue ojjaña meshimisiaicuanahuasijje, cuatajeameecue.—

Jamajjeya ma seis meshimisiaicuanahuasijje ena shocapoa, cuatajeameecapoa cuaa. 8Majoya aje Jesosaa ma enashojji poanajecuana jama acapoa ba'a: —E'e, jjeya oepojji meshimisiaijo nequi ena dojocue miquiana huohuijji poani dejja etiiyasijje oja ishiajjajji.—

Jamajjeya oepojji ena dojocapoa oque. 9Majoya bobi iyacuayajji huohuijji poani dejjaa ena uvajjajjana' pojji'ya ishiajjacapoa. Jamatii ojaya bajjima poa achacua shai nequi sho ma uvajjajjana' poa. Ma ena shojji poanajecuanaja ca ebatii poa achacua nequi sho ena oja jjequijojoya. Majoya bobi iyacuayajji huohuijji poani dejjaa pea ma jjahuanaquije dejja iyaacapoa. 10Ohuaya huohuicapoa jama ba'a: —Epeejji, ojjaña fiesta ameejji poanicuaa uvajjajjana' queapame, queabiquianee ishimeecani cuana ebionei. Majoya ojjaña jejjeajo ohuaya pea uvajjajjana' queabiquiapishana quiacani. Miyaya caca oe uvajjajjana' queabiquianee, queapamenee nequia'yonaje quijje eishimee'yojji— jamaya poa bobi iyacuayajji huohuijji poani dejja.

11Jamaya Jesosaa ena acapoa uvajjajjana' pojji'ya fiestajo anicacuanaja ishijji provincia Galilea, pueblo Caná meshijo nequiya. Jamaya ohuaya dejjaja ajjima'neinei acoocapoa. Queahuisocuaa bacapoa oya queaca'aneenee nequi. Jesosa shajja-ajjajji poanicuana jjashahuabaqui'yapoa ojo ohua jama acaje bamajje.

12Majoya aje quijjepishana Jesosa pueblo Capernaúm meshiyasijje poquiapoa. Oja nae, oja chahuacuana, o shajja-ajjajji poanicuana pea-ai onijjetii poquiapoa ojee. Oya iyecahuihuiso ma meshijoya aniapoa.

Jesosaa dejjacuana ehuone enaa jehui'yojji quiapoequi huoojeacuayajeacapoa Eyacuiñajjija equi-aiquiquibojo nequi

(Mt 21.12-13; Mc 11.15-18; Lc 19.45-46)

13Queahuiso judiocuana Jerusalén meshijo jjachichaquicapoa fiesta ya'yojjijo eshahuaba'yojji ma yahuajonei Eyacuiñajjiya oja etiiquianaja bacuacuana nahuecapoajo. Jamajjeya Jesosa Jerusalenyasijje poquipea-aiapoa. 14Majoya aje Jesosa Jerusalén meshi bañaquimajje Eyacuiñajjija equi-aiquiquibojo nequiñaquiapoa. Majotii nequiya ohuaya dejjacuana oja ehuonecuana quiapoequi enaa jehui'yojji macayahuecuana, ovejacuana, huia'cuana pea-ai bacanequiapoa. Dejjacuaa bejjo pea bejjo sosejje quiapoequi bacanequiapoa pea-ai. 15Jamajjeya Jesosaa iyehuiso jjono jeapashajjajjajeacuajicapoa ma dejjacuana huoojeacuayajeajji. Majoya ma dejjacuana ehuone quiapoequi, oja ovejacuana, oja macayahuecuana pea-ai huoojeacuayajeacapoa esecueyasijje. Ma dejjacuanaja bejjo cuiahuojjojeacapoa meshiyasijje. Ma bejjojaajji poanaje mesacuana jeapajjajeacapoa pea-ai Jesosaa. 16Huia' quiapoequicuana Jesosaa tecueacapoa jama ba'a: —¡A'a jja oe ecue Chiija equi-ai aquiana quiajji jayojja equi ajji! Jamajjeya quiaa huia' quiapoequiya jjeyahuanei aquiana dojocuayaqui'yocue esecueyasijje.—

17Jesosaa jama acaje bamajje o shajja-ajjajji poanicuaa shahuabaca'yapoa Eyacuiñajjija esohui ma yahuajonei Davidya tehuecapoa ojo jama ba'a: “Ecue Chii, miquea equi-ai ecuea queanahueneenee. Miquea equi-ai nahuejo eya manoje'yo.”

18Majoya judío dejja etii poanicuaa Jesosa huohuiajjacapoa jama ba'a: —¿Ajea esohuijo miyaya huoojeacuayajeanaje cuana? Jamajjeya miyaya dejjaja ajjima'neinei jjeyahuanei acue ecuanaja ebajji miya oja huoojea e'ejojonei poani.—

19Jesosaa saja-acapoa cuana jama ba'a: —Bacue, miquiaaya jiquio Eyacuiñajjija equi-ai quecuajeabichajea'yajo eyayenei tres cahuime huisotii iyaje'yo.—

20Judío etii poanicuaa Jesosa saja-acapoa jama ba'a: —¡Chojja de! Queahuisoneenee, 46 shequiajame huisonei, jiquio equi-ai iyajeyocapoquiapoa cuaa. ¿Achajjajo acuaeya equi-ai quecuajeabichajeaca'yajo tres cahuime huisoneitii miyayenei iyacuaji'yome?—

21Jesosa Eyacuiñajjija equi-aineijo pojjeama miminequiapoa, oya ca ojaya eyamineijo miminequiapoa. Quijje oya emano'yo jaa, tres cahuime huiso pomajje shequije'yo. 22Quijjenei Jesosa shequi'yajo o shajja-ajjajji poanajecuaa esohui ma Jesosa miminaje Eyacuiñajjija equi-aiquiquibojo nequi shahuabaca'yapoa, Eyacuiñajjija esohui etehuejo jjashahuabaqui'yapoa pea-ai.

Jesosaja ojjañacuana ebaneitii

23Judiocuana ojee jjachichaquicapoa fiesta ya'yojjijo eshahuaba'yojji ma yahuajonei Eyacuiñajjiya oja etiiquianaja bacuacuana nahuecapoajo. Jesosa pea-ai Jerusalén meshijo nequiapoa. Ma meshijoya Jesosaa queahuiso dejjaja ajjima'neineicuana acapoquiani bamajje queahuisocuana ojo jjashahuabaquica'yapoa. 24Jamatii Jesosaja ma dejjacuanaja ejjashahuabaquijji ebaneitii poa. Becacuana queaquehuatii jjashahuabaquipoquiapoa ojo. Jamajjeya Jesosaa macuanaja ejjashahuabaquijji jayojja mi-acapoa. 25Jesosaa ohuayanei ojjañacuanaja ejjashahuabaquijji bacapoquianitii queaja'anee jamatii oya peaja huohuijjimaa. Ohuaya ojjañacuanaja ejjashahuabaquijji, eyamiquipajje bacapoquianitii queaja'a.

Currently Selected:

JUAN 2: ESE

Highlight

Copy