HECHOS 9

Saulo Jesosajo jjashahuabaqui'yapoa

(Hch 22.6-16; 26.12-18)

1Saulo queamaseneetii nequipoquiapoa Jesosaja epeejjicuananijje. Ohuaya Jesosaja epeejjicuana quecuamee'yosa-acapoquiapoa. Jamajjeya oya Eyacuiñajjija equi-aijo chacochacopoquiani ebionei etii poani dejja baa poquiapoa. 2Saulo poquisapoa judiocuanaja ejjachichaquijji equi-aicuana Damasco meshijo aniyasijje Jesosaja epeejjicuana cuama ani sa-ajjaa ejeanobiameejji. Jamajjeya ohuaya Eyacuiñajjija equi-aijo chacochacopoquiani ebionei etii poanija tehue papeni huohuiajjacapoa o poquimeejjijo cuamaya. Jesosaja epeejji eponacuana, dejjacuana pea-ai joya “Ejeojji eyacua” bajjanicuana sa-ajjaa epoquijji papeni jjeshecapoa ohuaya Jesosaja epeejjicuana dojo'yojji Jerusalenyasijje ejeanobiameeñaqui'yojji. 3Majoya aje o ejeojjijje poquijejo Damasco meshichipineijo eyajje jijijeya jeaja'ajeacuajicananapoa queasajajanee o nequi meshipejjeyasijjeyee. 4Jamajjeya Saulo jaabichajeananaquiapoa meshiyasijje. Majoya onijje mimije esohui shajja-ajjacapoa ohuaya jama ba'a: —Saulo, Saulo, ¿yajjajo acuae eya miyaya queaneenee pomeeaña?—

5O jama mimime poajo Saulohua huohuiajjacapoa jama ba'a: —¿A'ya acuae mi so'o, emeshimesenei?—

Jama saja-ame oya acapoa ba'a: —Eya ca iña Jesosa quio miyaya queaneenee pomeeañaya. 6Nequisohuacue, poquicue jocuama Damasco meshiyasijje. Majo aniya aje mi huohuicaje miquea eajji— jamaya oya acapoa.

7Majoya ma Saulonijje poqui dejjacuana jjajjasoaneineiquiapoa esohui Saulonijje mimiani shajja-ajjamajje. Pea dejja mimiani bajjimanei poa cuanaja. 8Majoya aje Saulo meshijo jaa nequisohua'yapoa. Oya jjabapojjaqui'yomajje queacojjamisineetii poa, jjabaqui'yoajja poa. Jamajjeya ma onijje poqui dejjacuaa oya emejo dojocapoa Damasco meshiyasijje. 9Ma meshijotiiya Saulo aniñaquiapoa tres cahuime huiso jjabaqui'yoajjatii aniapoa bobima'tii. Enacuana ishi pojjima'tii pea-ai aniapoa.

10Ma meshijoya aje pea dejja Jesosaja epeejji nequiapoa Ananías bajjani. Eyacuiñajjiya oya jjacahuibaquiani jayojja ani huohuicapoa jama ba'a: —Ananías.—

Ohuaya saja-acapoa jama ba'a: —Quioya iña ani, Emeshimesenei.—

11Majoya Emeshimeseneiya oya jama atiicapoa ba'a: —Nequisohuacue. Poquicue ma ejeojji “Epijajinei” bajjani jaahuasijje. Majo aniya Judasja equijo anica huohuiajjacue oe dejja Tarsocuiñajjijo. Oya Saulo bajjani majo ani mimiani Eyacuiñajjinijje. 12Ohuaya jjacahuibaquiani jayojja aniya oe dejja Ananías bajjani bacanaje. Ma dejjaa o aniyasijje nobiquimajjeya oja yamijo eme huanacaje bacanaje o queaja'a jjabaqui'yojji. Jamajjeya ohuaya miya ishoacani.—

13Onijje mimiani jama, Sauloque o poquijjijo shajja-ajjamajje Ananías jama poa ba'a: —Emeshimesenei, queahuisocuaa eya huohuicani ma dejjajo. Oya queamase poani miquea epeejjicuananijje. Queahuiso jeanobiameecapoquinaje Jerusalén meshijo nequiya. 14Jjeya oya jiquiacua poeyanaje papenijji Eyacuiñajjija equi-aijo chacochacopoquiani etii poanicuanaja huoojea Jesosaja epeejjicuana quiojo ani dojo'yohua ejeanobiameeñaqui'yojji— jamaya acapoa.

15Jamatii poquisapo-ajja ani Emeshimeseneiya oya jama huohuime acao'oyapoa ba'a: —Poquicue oque o baa. Eyaya oya babacanaje ejo echacochacopoquijji. Ohuaya judío pojjeamacuana sohuihuohuiquicaje ejo, ojaya emeshimesecuana pea-ai. Judiocuana huohuipea-aiquicaje ohuaya. 16Eyaya oya bameeje queaneenee oya nequipoquije ejo ecuea echacojji eapoquiajjijo.—

17Jamajjeya Ananías poquiapoa ma Saulo ani equiyasijje o baa. O ani equiyasijje nobiquiñaquimajje ohuaya oja eme huanacañaquiapoa oja yamibiajje. Jama acapoa ba'a: —Ecue dohue Saulo, Emeshimesenei Jesosa mi jiquiacua poeanijo jjanequija'aquinaje mijo. Ohuaya ca eya mi aniyasijje huoojeacanaje mi queacojjaja'a pomee'yohua. Miya Edojjoshahuapame yamijji pomeeya pea-ai eya huoojeacanaje.—

18O jama mimime pojeahuajo Sauloja cojjabiajje ani nahuooja esope jayojja jjacajjaquimajje oquenanaquiapoa. Majoya oya jjabaquinana'yapoa queaja'anee. Majoya Saulo nequisohua'yomajje jjaiñajeanobiameequiapoa enaojjohuasijje. 19Majoya oya bobi ijjia'yomajje jjaca'aqui'yapoa. Majotiiya oya queacahuihuisopishana aniapoa so'o Jesosaja epeejjicuananijje Damasco meshijotii.

Damasco meshijo nequiya Saulohua esohui huohuicapoa

20Ma pojjajotiiya aje Saulohua judiocuanaja equi-ai ejjachichaquijjijo nequiya huohuicapoa cuana Jesosa Eyacuiñajjija Bacuaejja e'ejojonei poani. 21Ma ohua esohui huohuicaje shajja-ajjajji poanicuana jjabaneineiquiapoa ojo. Jama poa cuana ojo ba'a: —¿A'a pojja'a oyaya jiquio ma yahuajopishana Jesosaja epeejjicuana Jerusalén meshijo ani jeanobiameejji ponequinajeya? Oyaya pojja'a jiquiacua poeyanaje jiquiojo ani Jesosaja epeejjicuana jeyomajje Eyacuiñajjija equi-aijo chacochacopoquiani etii poanicuanaja ebajji cuamaya dojo'yohua. Coma aje pojja'a, oyaya.—

22Saulohua ca meteamaneiya esohui huohuicanequiapoa majo ba'ecacuana. Judiocuana Damasco meshijo ba'eca oya esohui queaja'anee mimiani shajja-ajjamajje yajja saja-ame yajji jjabaquiapoa. Ohuaya Jesosa e'ejojonei Eyacuiñajjija huoojea poani ojjaña nahue'yojji esohui queaja'a huohuicanequiapoa.

Saulo quehuapoquiapoa judío dejjacuaa oya eiñaca poanijje

23Majoya aje quijje judío dejjacuana majo nequica jjaquecuapanaquiapoa Saulojo. 24Ma ciudad meijiyo epeeijji'ya quea-aonee nequiapoa. Jamajjeya epojjajo, mecajje pea-ai judío dejjacuana meijiyo epeei secuejjanicuanajo nequi jjaishoaquinequiapoa Saulo cuayaquije'yo bamajje o quecuajea'yojji. Majoya quijjepishana Saulohua shajja-ajjacapoa oya quecua'yosa-acani cuaa 25Jamajojoya aje oe mecajje onijje Jesosaja epeejjicuaa Saulo jjepai-aijo biomajje oya quehuajeaoqueacapoa cuaa ciudad Damasco esecuemiji meshiyasijje oya cuama equehuapoquijji.

Saulo Jerusalén meshiyasijje poqui'yapoa

26Majoya aje quijje Saulo Jerusalén meshi bañaqui'yomajje Jesosaja epeejjicuana majo ba'ecanijje jjachichaquisapoa onijje emimimimijji. Saulo ca Jesosaja epeejji pojjeamatii poso acapoa cuaa, jamajjeya quea-oyajja poa cuana onijje emimimimijji. 27Jamatiiya aje oe dejjaa Bernabé bajjaniya oya dojocapoa Jesosaja babaca dejjacuanaja ebajji. Ohuaya huohuiquicapoa cuana Saulohua ejeojjijje poquianiya Emeshimesenei ojo jjaja'aquije bacanaje. Jesosa miminaje Saulonijje huohuicapoa cuana Bernabeya. Ohuaya huohuipea-aicapoa cuana Saulohua Damasco meshijo nequiya esohui Jesosajo huohuicanequinaje cuana meteamaneiya. 28Jamajjeya Saulo Jerusalén meshijotii nequiapoa onijje. Oya jjapeequinequiapoa majo ba'eca Jesosaja epeejjicuananijje. Emeshimesenei Jesosajo esohui queahuiso ohuaya huohuicapoquiapoa cuana meteamaneiya. 29Oya miminequiapoa judiocuananijje ma griego esohuijo mimianinijje. Ojee nequi jjamimicuiajeanobiaquicapoa cuana Saulonijje esohui Jesosajo ohua huohuicajje. Jamajojoya aje Saulo quecuajea'yosa-acapoa cuaa quenequenemajje. 30Majoya aje Jesosaja epeejji poanicuaa Saulo judiocuaa quecuajea'yosa-acani shajja-ajjamajje oya dojocapoa Cesarea meshiyasijje. Majo nequi oya huoojeacapoa Tarso meshiyasijje ma o dojojji poanaje dejjacuaa.

31Jesosaja epeejjicuana ma esohuijo jjachichaquipoquiapoacuana Judea meshijo ba'eca, Samaria meshijo ba'eca, Galilea meshijo ba'eca pea-ai queaquijijjijaji ba'ecapoquiapoa. Queaca'a pocapoquiapoa macuanaya esohui Jesosajo bamajje. Oja epeejjicuana jjashahuabaquicapoquiapoa Eyacuiñajjijo oya queaca'aneetii popoquiani. Edojjoshahuapameya queahuisocuana pomeecapoquiapoa Jesosaja epeejji epojji.

Pedrohua Eneas bajjani dejja jeo'yoajja jaa jeomeeca'yapoa

32Majoya aje Pedro poquiapoa pea meshicuanahuasijje onijje Jesosaja epeejjicuana majo ba'eca baa, onijje anicuaa pea-ai. Majoya quijje oya poquiapoa Lida meshiyasijje pea majo ba'e Jesosaja epeejjicuana bapea-aiya. 33Ma meshijo nequiya ohuaya oe dejja Eneas bajjani bacapoa queamano jaa. Oya ocho shequiajame huiso jeo'yoajjatii jeojjishahuama'tii jaapoquiapoa oja equipajaajjijotii. 34Majoya Pedrohua oya jama acapoa ba'a: —Eneas, jjeya Jesosa Quitohua miya jeomeecaje'yo. Jjeyanei nequisohua'yocue. Mi quipajaajji poani bebo'yocue.—

Ohua esohui jama acajeahua Eneas nequisohuanana'yapoa. 35Ojjaña Lidacuiñajjicuaa Saroncuiñajjicuaa pea-ai oya nequisohuaje'yo, jeoje'yo shajja-ajjacapoa. Jamajjeya queahuiso macuiñajjicuana jjashahuabaquica'yapoa Jesosajo.

Pedrohua Dorcas bajjani epona shequimeeca'yapoa

36Ma shequiajajoya aje oe epona Jesosaja epeejji Tabitá bajjani aniapoa Jope meshijo. Griego esohuijo oya bajjani poa: Dorcas. Ma eponaaya queapamenee ba'emeesahuacapoquiapoa cuana ojjaña pojjajo. Aema'cuana pea-ai asahuacapoquiapoa ohuaya. 37Majoya quijje Dorcas queamanonee pomajje mano'yapoa. Oja yami emojeajji shacuamajje pea equecuayijjijamacoohuasijje huanaquicapoa cuaa. 38Jope meshi Lida meshichipineijo ojee jaapoa ma Pedro nequiapoa meshijo. Jesosaja epeejjicuanaja eba poa oya ma meshijoya ani. Jamajojoya aje beca dejja huoojeacapoa cuaa Pedro huohuiya jama ba'a: —Cua'a epoquicuaji Jope meshiyasijje, nequiñaquijjima oe epoquicuaji.—

39Jamajjeya Pedro poquicuajiapoa onijjetii Jope meshiyasijje. Jope meshi bañaquimajje oya dojosohuaquicapoa cuaa epona emano'yo jaa equecuayijji dojjohuasijje. Majotiiya aje eahuemano'yocuana pa-ani queahuiso Pedrojo jjachichaquicapoa. Eponacuaa Pedro bameecapoa daquicuana ma Dorcasya eshe aniya sococapoquinaje.

40Majoya aje Pedrohua ojjaña ojo ejjachichaqui anicuana huoojeacuayacapoa esecueyasijje. Oja ecuioshajjajo anioquemajje mimiapoa Eyacuiñajjinijje. Majoya mimimajje epona emano'yo jaa jama acapoa Pedrohua ba'a: —Tabitá, anisohua'yocue.— Ohua jama acajeahua epona jjabapojjananaqui'yapoa, shequi'yapoa. Pedro opejjejo ani bamajje oya anisohuanana'yapoa. 41Majoya Pedrohua oja emejo iñamajje jjequisohuaca'yapoa. Jama amajje ohuaya Jesosaja epeejjicuana, epona eahuemano'yocuana pea-ai iyaacapoa oya shequi'yonaje eshe ani'yo oja ebajji. 42Jamajjeya ojjaña Jopecuiñajjicuaa shajja-ajjacapoa Pedrohua epona shequimeeca'yonaje emano'yo jaa. Jamajojoya aje majo ba'ecacuanaya queahuiso jjashahuabaquica'yapoa Emeshimeseneijo. 43Pedro ca majotiiya aniapoa so'o queacahuihuisopishana Simón bajjanija equijo. Oya Simón ijjiacajjijeecuana quecuapojijji poa.

Currently Selected:

HECHOS 9: ESE

Highlight

Copy