HECHOS 7

Estebanya etii poanicuana esohui huohuicapoa o cojjaneijo nequiya

1Majoya aje Eyacuiñajjija equi-aijo chacochacopoquiani ebionei etii poani dejjaa jama huohuiajjame Esteban acapoa ba'a: —¿A'a ma onaa mijo jama acani esohui e'ejojonei poani?—

2Estebanya jama saja-ame acapoa cuana ba'a: —Enijjejaajji dejjacuana etii, shajja-ajjaneicue mo. Eseja etiiquiana Abrahamjo o Mesopotamia meshijo nequijo Eyacuiñajji queaca'aneetii queasajajanee jjaja'aquiapoa ojo o Harán meshijo ba'ejjimahuajo. 3Ma meshijotii nequi Eyacuiñajjiya oya jama acapoa ba'a: “Jjeya mique huapa pojjeamacuana, mique chii, mique nae pea-ai jiña'yocue epoqui'yojji ma eya mi huohuije meshiyasijje.” 4Jamajjeya Abraham provincia Caldea meshijo nequi poqui'yapoa Harán meshiyasijje cuamaya ba'e'yohua. Majotiiya aje oja chii quijjepishana mano'yapoa. Majoya aje Eyacuiñajjiya Abraham jiquio meshiyasijje yeca'yapoa jiquio jjeya ese ba'e'yohuasijjeya oya meshiyasijjeya. 5Jamatii Eyacuiñajjiya jiquio meshi ojaya epo'yojji quiajjima acapoa. Oya Abraham eshe nequiahua che oe bisonei meshicuana quiajjimanei acapoa. Eyacuiñajjiya oya huohuicapoa quijje jiquio meshi ojaya poaje'yo. Oja osecuacuanaja pea-ai epopoqui'yojji o mano'yajo huohuicapoa. Ma shequiajajotiiya o Eyacuiñajjiya huohuicapoajo Abraham bacuama'tii nequipoquiapoa. 6Majoya quijje Eyacuiñajjiya Abraham jama apea-aicapoa ba'a: “Mique osecuacuana quijje peaja meshijo ba'epoquije, ecue quia meshineijo pojjeama. Ma meshicuiñajjicuanajo mique osecuacuana chacochacopoquijetii peaja yajjijo. Queacamajaneenee popoquije cuana peajo echacochacopoquijjitii queashequiajahuisonee, 400 shequiajame huiso.”—#7.6 Nota: Jiquio esohui Eyacuiñajjiya Abraham acapoa Egipto meshijo. Ma meshijotiiya oja osecuacuana ba'ecapoquije jaajji pea jayojja.* 7Estebanya huohuitiicapoa cuana jama ba'a: —Eyacuiñajji jama poa pea-ai ba'a: “Eyaya maya Abrahamja osecuacuana queacamajanee chacomeepoquiajji poaje dejjacuana queaneenee pomeeje. Majoya quijje miquea osecuacuana ma peaja meshijo ba'eca'yo eyaya poquimeesahuaje'yo ojjañacuana. Poqui'yomajje eya bihuiacaje cuaa jiquio meshijotii nequiya.” 8Majoya Eyacuiñajjiya Abraham huohuipea-aicapoa o jjacuiishashajehuisejjaquijjijo, jama epojjijoya. O jama poaje bamajje Eyacuiñajjiya oja esohui shahuabatiitiicaje ma o ohua acanaje esohuiya. Jamajjeya Abrahamya oja bacuaejja Isaac ocho cahuime huiso ecuaya jaa cuiishasha jehuisejjacapoa. Oya jayojja pea-aiya Isaacya oja bacuaejja Jacob cuiishasha jehuisejjapea-aicapoa. Majoya quijje oja bacuacuana pea-ai Jacobya jama pea-aiya acapoquiapoa oya jayojja. Oja bacuaejjacuana 12 huisome Israelja osecua judiocuanaja babacuana poa.

9—Ma Jacobja bacuacuana yahuajonei eseja etiiquianacuana poa. Oja bacuacuaa echahuamese José botiamanei acapoa. Jamajjeya oya quiajeacapoa bejjo sosejje Egipto meshiyasijje onaja dojo'yojji. Jamatii Eyacuiñajji Josenijjetii nequipoquiapoa. 10Eyacuiñajjiya oya jaahuanacapoquiatiiapoa cuamaya jamatii ojaya queacamajanee poa. Oya José queasapaja'a pomeecapoa. Jamajjeya faraonya Egipto meshimeseya oya queapame queasapaja'a bacapoa onijjejaajji Egipto dejjacuanahuoojeajji epojji. Faraonya José nequimeecapoa onijje etii epojji, Egiptocuiñajjicuana chacomeepoquiajji epojji. José oja equi-aijo nequimeecapoa faraonya onijjetiiya.

11—Majoya quijje ojjaña Egipto meshijo ba'ecacuana, Canaán meshijo ba'ecacuana pea-ai bobiyasijje pocapoa. Queacamajanee pocapoa cuana bobijo. Eseja etiiquianacuana queashoeneenee bobima'nei pocapoa. 12Jacobya bobi Egipto meshijo yani shajja-ajjamajje oja bacuaejjacuana huoojeacapoa cuamaya bobi jjesheya. Jamajjeya oja huoojea oja bacuacuana eseja etiiquianaya poquicooapoa Egipto meshiyasijje. 13Majoya quijje oja bacuacuana poquio'oyajo cuamaya bobi jjesheya José jjabameequi'yapoa oja o'icuanajo oya oja chahuanei poani. O jama poajoya faraonya José bacapoa achejaajji oya. 14Majoya Joseya oja chii Jacob ojjaña oja huapa pojjeamacuana 75 huisome iyaaca'yapoa o nequiyasijje epoe'yojji. 15Jamajjeya Jacob poqui'yapoa oja huapa pojjeamacuananijje Egipto meshiyasijje ba'e'yohua. Ma meshijotii nequi oya quijje mano'yapoa. Majotii pea-aiya Jacobja bacuacuana, eseja etiiquiana, quijje manocapoqui'yapoa. 16Majoya aje quijje Jacobja esa' dojoca'yapoa cuaa Siquem meshiyasijje mojea'yohua, ma yahuajonei Abrahamya bejjo sosejje jjeshecapoa meshiyasijjeya. Ma meshi oja sa' mojea'yojji Hamorja bacuaejjacuanaja poa.

17—Jacobja osecuacuana jjahuisoquicapoquiapoa Egipto meshijotii ba'eca. Majoya Eyacuiñajjiya ma ohua yahuajonei Abraham huohuicapoa esohui, oja osecuacuana quijje peaja meshijo ani Eyacuiñajjiya poquimeecaje'yo esohuiya, ajeyocaje'yo. 18Quijje pea dejja emeshimese epojji nequi'yapoa Egipto meshijo. Ojaya José bajjimanei poa oya yahuajonei mano'yapoajojoya. 19Ma Egipto emeshimese dejja nequi'yohua eseja etiiquianacuana dasiacapoquiapoa. Queacamajanee ohuaya pomeecapoquiapoa cuana. Eseja etiiquianacuanaja bacuacuana esho'inei ohuaya jamatii jaajeameecapoquiapoa esecueyasijje emanojeapoqui'yojji. 20Ma eshequiajajo pea-aitiiya aje Moisés cuayapoa. Oya queabamenee poa pea ebacuasho'icuana jama pojjeama. Oja naeya, oja chiiya pea-ai tres ba'ime huiso oya tiimeecapoa oja equijotii. 21Majoya oya oja naeja cueisahuahuasijje ba'ehuanaquehuaqui ba'e Egipto emeshimeseja bacuaseya ebacua jjeshecapoa. Ohuaya Moisés tiimeecapoa oja bacuanei jayojja. 22Jamajjeya Moisés Egipto dejjacuaa sohuihuohuicapoquiapoa oya queasapaja'a epojji Egiptocuanaja esohuijonei. Oya queasohuica'anee poa. Ohuaya oja echacojjicuana pea-ai queapame acapoquiapoa.

23—Majoya Moisés 40 shequiajame huiso etii nequi poquiapoa onijjejaajji Jacobja osecuacuana baa, onijje aniya so'o. 24Ohuaya bacañaquiapoa oe Egiptocuiñajji dejjaa pea onijjejaajji dejja cuiasejjajeacaqui. Jamajjeya o nahuejo Moisesya o cuiasejjajeajji poequi dejja quehuacuiajeaca'yapoa. 25Moisés jjashahuabaquiapoa onijjejaajji Jacobja osecuacuaa oya bacaje Eyacuiñajjija huoojea o nahuejji epojji, o Egipto meshijo ani poquimeesahua'yojji epojji pea-ai. Jamatii oya jama epojji pojjeama bacapoa cuaa. 26Majoya pea pojjajo Moisesya beca dejjacuana onijjejaajji jjacuiaquiequi bacapoa. Ohuaya o jjabeimeequi'yojji nisho jama a-ajjacapoa ba'a: “Miquiana oyajaajji pea-aiya poani, ¿apiojji acuaeya minijjejaajji pea-ai cuiaña?” 27Ma onijjejaajji cuiapoequi dejjaa Moisés iñajeashiñajeacapoa. Jama oya acapoa ba'a: “¿Ache dejjaa miya ecuanaja etii epojji ecuana jaahuanajji pomeecani? ¿Ajea esohuijo miya poeyanaje jiquiacua ecuana baa? 28¿A'a cuaeya eya pea-ai cuiaje'yo ma ecua miyaya omamecajje Egipto dejja cuia'yonaje jama pea-ai cuia'yomeya aje?” 29Ohua esohui jama acajje Moisés poquiquehuapoa Egiptocuiñajjicuana yajjajo queahueshanee Madián meshiyasijje. Ma meshijoya oya peajaajji jayojja ba'yapoa oja meshineijo jama pojjeama. Oya bacuaejja beca poa ma meshijo ani eponajo jjahuanaquimajje.

30—Majoya quijje 40 shequiajame huiso jjayejjequiajo oe Eyacuiñajjija ángel jjaja'aquiapoa Moisesjo. Ohuaya se-ejjama' meshijo nequiya Sinaí eyiyopejjejo nequiya oe tata jijiqui bacapoa. 31Ma tata jijiqui quiyojeyoajja baneineicapoa Moisesya. Jamajjeya ohuaya jjanequichipiquimajje ebajji yajjajje quiyojeyoajja shajja-ajjacapoa Emeshimesenei mimije onijje. 32Oya jama mimime poa ba'a: “Eya iquio ma yahuajonei miquea etiiquiana Abrahamja, Isaacja, Jacobja pea-ai Eyacuiñajjitii poani.” O jama mimime poajo Moisés queametenee poa, cacacacapoa. Jamajjeya oya jjabajeasohuaquijjima poa Eyacuiñajji onijje mimiajo. 33Majoya Eyacuiñajjiya Moisés jama apea-aicapoa ba'a: “Miyaya mique jeojjishejee huijjiajeacue jiquio e minijje mimiani meshi ecueanei poanijojoya. 34Eyaya queaja'anee bapoquiañatii ecue babaca Jacobja osecuacuana Egipto meshijo ani queaneenee acaquitii Egipto dejjacuaa. Queaneeneejo pani cuana shajja-ajjaña. Majoya eya nequioquenaje oja osecuacuana Egipto meshijo ani poquimeesahua'yohua. Jamajjeya eyaya miya huacuaya huoojea'yaña Egipto meshiyasijje” jama mimimeya poa Eyacuiñajji onijje.

35—Jamajjeya oya dejjaya ma yahuajo onijjejaajjicuaa cajaa acapoaya oja etii epojji o nahuejji epojji pea-ai Eyacuiñajjiya huoojeaca'yapoa, oyaya. Ma dejjaya Eyacuiñajjiya huoojeaca'yapoa Egipto meshiyasijje majo ba'eca huohuipoquiajji, o poquimeesahua'yojji epojji pea-ai. Eyacuiñajji mimiapoa Moisesnijje oe angeljo ma tata jijiquijo nequi. 36Moisesya eseja etiiquianacuana Egipto meshijo ani cuayameequica'yapoa. Ohuaya dejjaja ajjima'neineicuana Egipto meshijotii nequiya acapoa. Majoya bae-aisahuajo nequiya se-ejjama' meshiyasijje poquimajjeya pea-ai dejjaja ajjima'neineicuana acapoa Israelja osecua judiocuana queapame poquimeesahua'yojji. Cuarenta shequiajame huiso jamaya acapoquiapoa ohuaya. 37Ma oya dejjaya Moisesya Israelja osecua judiocuana jama huohuime acapoa ba'a: “Eyacuiñajjiya pea dejja Jacobja osecuacuana nequimeecaje e jayojja pea-ai epojji oja esohui huohuipoquiajji epojji.” 38Majoya aje quijje Jacobja osecuacuana se-ejjama' meshijo jjachichaquicapoa. Eyacuiñajjija ángel Moisesnijje mimiapoa o eseja etiiquianacuananijje pea-ai emimijji Sinaí bajjani eyiyojo nequi. Majo nequiya Moisesya Eyacuiñajjija esohui o queapame ba'epoquijji jjeshecapoa eseya quijje oya jayojja eba'epoquijji pea-ai.

39—Eseja etiiquianacuana ca Moisesja esohuijo jjashajja-ajjaquisapo-ajjanei poa. Cajaa acacuaapoa oja esohui. Jamajojoya aje huacuaya Egipto meshiyasijje poqui'yosapoa cuana. 40Majoya Israelja osecua judío dejjacuaa Aarón jama acapoa ba'a: “Jjeya eyacuiñajjinishocuana acue oro ecuana huidojopoquia'yojji epojji. Ecuanajaya ca jjeya ba'yojjimatii Moisés, ¿yajja shai oya po'yonaje ma ecuana Egipto meshijo ani cuayameequi'yojji poanaje?” jamaya acapoa cuaa. 41Majoya macaja bacuasho'inisho necacuaapoa oja eyacuiñajjinisho epo'yojji onaja ebihuiapoquia'yojji. Oja ehuonecuana naa jehuica'yapoa cuaa o quiajji. Majoya fiesta oja ne macaja bacuasho'inisho bihuiajji acapoa cuaa. 42Jamajojoya aje cuana jama poani bamajje Eyacuiñajjiya nahuepajeacacuanapoa oja mimishijo. Majametacuana eyajo nequi bihuiacanijo, Eyacuiñajjiya bihuiameepajeajjima acapoa cuana. Yahuajonei Eyacuiñajjija esohui tehuecapoa esohuihuohuijji poacuaa ba'a:

“Eyacuiñajji jama poani ba'a:

Jacobja osecuacuana,

¿a'a quiaa se-ejjama' meshijo nequiya queashequiajahuiso,

40 shequiaja huisome nequiya, eya bihuiapoquianaje?

¡Chojja!

Ecue bajji pojjeama,

e quiajji pojjeama miquiaaya ehuonecuana naa jehuipoquia'yapoa.

43Miquiaaya caca oe eyacuiñajjinisho Moloc anijji daquiequisisi dojonequiapoa.

Pea eyacuiñajjinisho dojonequiapoa quiaa Refán bajjani

majametanisho ma miquiaaya neapoa eyacuiñajjinisho miquianaja bihuiajji.

Jamajojoya aje quiana peajaajjicuana emejeyo

dojomeeje'yo queahuesha Babilonia meshiyasijje”

jamaya Eyacuiñajji poa.

44—Majoya Eyacuiñajjiya Moisés huohuicapoa o anijji daquiequi oya oja iyameejjijo. O anijji daquiequi acapoa cuaa ma ecua Eyacuiñajjiya Moisés huohuicapoa jama iyamee yajjijoya. Eseja etiiquianacuaa Eyacuiñajji anijji daquiequi dojocanequiapoa se-ejjama' meshijabojo nequiya. 45Jamajjeya eseja etiiquianacuaa o anijji daquiequi oja bacuacuana quiacapoa. Oya daquiequitiiya edojonequijji cua o poquijeyasijje quiacapoa. Majoya aje quijje macuaaya eseja etiiquiana Josuenijjeya oya daquiequitiiya yecanequiapoa onijjetii jiquiacua jiquio Canaán meshiyasijje ba'e'yomajje. Jamajjeya Eyacuiñajjiya ma Canaancuiñajjicuana huoojeaca'yapoa queahuesha eseja etiiquiana majo ba'e'yojji. Jiquio meshijotiiya aje o anijji daquiequi eanitiiapoa David enequiahuajo. 46Eyacuiñajjiya David bacapoa ojaya queajeanee. Majoya Eyacuiñajji anijji queapamenee Davidya equi queaquemo iyameesa-acapoa cuana, ma eseja etiiquiana Jacobya bihuiacapoquiapoa Eyacuiñajjija epojji. 47Davidja bacuaejja Salomonya caca Eyacuiñajji anijji equi queaquemo queapamenee iyameecapoa cuana, Davidya pojjeama. 48Jamatii Eyacuiñajji Eyajo nequi queaca'aneetii poani aniajja dejjaja iya equijo. Yahuajonei esohuihuohuijji poa dejjaa jama tehueme acapoa Eyacuiñajjijo. Jama poani Emeshimesenei ba'a:

49“Eya Eyacuiñajji poani Eyajo nequi.

Jiquio meshi ca e jeojji nequijji poani jayojja queabiso.

¿Aya equi queapame e anijji epojji iyacame?

Ayapishana.

Emeshimeseneiya jama huohuiajjame apea-aicani cuana ba'a:

¿Achacua eya queapame anije majo ejomishocajji?

Achacuapishana.

50Ojjañatii aquianacuana jiquio meshijo ecueanei ani, ecue pana”

jamaya Emeshimesenei poa.—

51Majoya aje Estebanya huohuitiicapoa cuana jama ba'a: —Miquianaya caca oe queamimishica'aneetii poani. Queaquijijjica'a, jjashajja-ajjaquisapo-ajjanei poani quiana Eyacuiñajjija esohuijo. Edojjoshahuapamejo jjashahuabameequi'yoajjatii poani. Ma ecua miquianaja babacuana nequipoquiapoa jama pea-aitiiya quiana poani. 52¿Ache esohuihuohuijji poa dejjacuana miquianajaya etiiquiaa yahuajonei queapame acapoa? Achepishana. Ojjaña esohuihuohuijji poacuana cuiajeyoca'yapoa cuaa ma Eyacuiñajjija huoojea quijje poeje huohuijji poa dejjacuanaya. Jjeya pea-ai oja huoojea queapameneetii dejja mimishima'nei poeyanaje. Miquiaaya oya siajje amajje ba'ehuanasohuajeameenaje emanomee'yojji. 53Miquianaya Eyacuiñajjija esohuijjitii nequiani ma angelcuaa Moisés tehuemeecapoa esohui huisotiijji. Jamatii miquianaya jjashajja-ajjaquiajjatii poani ma esohuijoya— jama huohuimeya acapoa Estebanya.

Esteban mano'yapoa

54Majoya aje o jama poani shajja-ajjamajje queaqueneneenee poa etii poanicuana Estebannijje. Oja ese' ijjiayaicapoa cuaa equijijji nequisohuajo quenequeneneimajje. 55Majoya aje Edojjoshahuapameya oja yamijo nequiya Esteban Eyahuasijje jjabajeasohuaquimeecapoa. Eyacuiñajji Eyajo nequi queaca'aneetii queasajaja nequi bajeasohuacapoa. Jesosa Eyacuiñajjija ebañeimijijje nequi pea-ai ohuaya bacapoa. 56Majoya Esteban jama poa ba'a: —Jjabajeasohuaquicue quiana. Eyaya ca Eya ejjaca'apejoqui nequi baña. Dejjapojji epo Eyacuiñajjija ebañeimijijje nequi bapea-aiaña.—

57Esteban jama poani shajja-ajjamajje oja emejo jjashajjahuosoquiapoa cuana oja esohui shajja-ajjasapo-ajjaneijjejojo. Taaasajajeacapoa cuana janobajjimanei. Majoya oque tohuananacapoa cuana o iñaca'ajji. 58Majoya oya jjequiyiyejeacapoa cuaa ciudad esecueyasijje queahuesha ejajahuejjajea'yojji meiya. O jajahuejjajea'yojji epojjicuaa oja daqui-ao huijjiajeamajje oe dejja Saulo bajjani quiacapoa oja jaahuanajji.

59Ma dejjacuaaya Esteban meiya jajahuejjajeaca'yoquitii oya mimiapoa Eyacuiñajjinijje jama ba'a: —Emeshimesenei Jesosa, ecue dojjoshahua jjo jjequisohua'yocue Eyahuasijje.— 60Majoya oya ecuioshajjajo nequimajje taaapoa janobajjimanei jama ba'a: —Emeshimesenei, ¡a'a jiquio jjeya eya aca'yani cuaa queamimishi shahuaba'yojji quijje o queaneenee pomee'yojji!— Esteban jama taaame pomajje mano'yapoa.

Currently Selected:

HECHOS 7: ESE

Highlight

Copy