IINDUMISO 98
98
UThixo makabongwe ngenxa yobulungisa bakhe
Umhobe.
1Vumani kuYehova ingoma entsha,
Ngokuba wenzé imisebenzi ebalulekileyo;
Símzuzele uloyiso isandla sakhe sokunene, nengalo yakhe engcwele.
2Ulwazisile uYehova usindiso lwakhe,
Ubutyhilile emehlweni eentlanga ubulungisa bakhe.
3Ukhumbulé inceba yakhe nokunyanisa kwakhe kwindlu kaSirayeli;
Zilubonile zonke iziphelo zehlabathi usindiso loThixo wethu.
4Dumani kuYehova, nonke hlabathi,
Gqobhokelani ekumemeleleni, nibethe uhadi.
5Mbetheleni uhadi uYehova,
Uhadi nelizwi lengoma;
6Ngamaxilongo nezwi lesigodlo
Dumani phambi koKumkani uYehova.
7Malugqume ulwandle nenzaliseko yalo,
Elimiweyo nabemi balo.
8Imilambo mayibethe izandla,
Zimemelele kunye iintaba
9Phambi koYehova, ngokuba esiza kugweba ihlabathi.
Uya kuligweba elimiweyo ngobulungisa,
Izizwe ngokuthe tye.
Currently Selected:
IINDUMISO 98: XHO75
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1975. Used with permission. All rights reserved.
