IINDUMISO 92
92
Umbongo wolungiselelo lukaThixo
Umhobe; ingoma, ngemini yesabatha.
1Kulungile ukubulela kuYehova,
Nokulibethela uhadi igama lakho, Wena usenyangweni;
2Ukuyixela kwakusasa inceba yakho,
Nokunyanisa kwakho ebusuku,
3Ngoweentambo ezilishumi nangomrhubhe,
Ngokulubetha uhadi ngofefe.
4Ngokuba ùyandivuyisa, Yehova, ngomsebenzi wakho,
Ngezenzo zezandla zakho ndinokumemelela.
5Azizikhulu izenzo zakho, Yehova!
Zinzulu kakhulu iingcinga zakho.
6Isityhakala asinakwazi;
Isinyabi asikuqondi oko.
7Ekudubuleni kongendawo njengomfuno,
Ekutyatyambeni kwabasebenzi bonke bobutshinga,
Kukuze batshabalale ngonaphakade.
8Ke wena, Yehova, ungophezulu ngonaphakade.
9Ngokuba ùyabona, iintshaba zakho, Yehova,
Ngokuba ùyabona, iintshaba zakho ziya kutshabalala;
Baya kuchithwa-chithwa bonke abasebenzi bobutshinga.
10Ùyaluphakamisa uphondo lwam njengolwenqu;
Ndigalélwe ioli entsha.
11Iliso lam liyababonela abandilalelayo,
Indlebe yam iyabeva abasukela phezulu kum benobubi.
12Amalungisa aya kudubula njengesundu,
Aya kukhula njengomsedare• weLebhanon.
13Etyelwe nje endlwini kaYehova,
Aya kutyatyamba ezintendelezweni zoThixo wethu.
14Aya kuhluma eselenezimvi,
Aya kuba etyebile, eluhlaza;
15Ukuze axele ukuba uthe tye uYehova,
Uliwa lam, kungekho bugqwetha kuye.
Currently Selected:
IINDUMISO 92: XHO75
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1975. Used with permission. All rights reserved.
