IINDUMISO 28
28
Umthandazo wokucela usindiso
EkaDavide.
1Ndidanduluka kuwe, Yehova;
Liwa lam, musa ukuzenza isithulu;
Hleze, wakuthi cwaka kum,
Ndifane nabahla baye emhadini.
2Yiva izwi lokukhunga kwam ekuzibikeni kwam kuwe,
Ekuziphakamiseleni kwam izandla zam kwingcwele kangcwele.
3Musa ukundiqweqwedisa nabangendawo,
Nabenzi bobutshinga;
Abathetha uxolo kummelwane wabo,
Benobubi ezintliziyweni zabo.
4Bánike ngokwemisebenzi yabo, ngokobubi beentlondi zabo;
Bánike ngokwezenzo zezandla zabo;
Bábuyisele ngokwempatho yabo.
5Ekubeni bengayiqondi imisebenzi kaYehova,
Nezenzo zezandla zakhe,
Úya kubagungxula, angàbakhi.
6Makabongwe uYehova,
Kuba elivile ilizwi lokukhunga kwam.
7NguYehova amandla am nengweletshetshe yam;
Yakholosa ngaye intliziyo yam, ndancedeka.
Iyadlamka ke intliziyo yam,
Ndiyamdumisa ngengoma yam.
8UYehova ungamandla kubo;
Uligwiba losindiso kumthanjiswa wakhe yena.
9Sindisa abantu bakho,
Usikelele ilifa lakho,
Ubaluse, ubathwale kude kuse ephakadeni.
Currently Selected:
IINDUMISO 28: XHO75
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1975. Used with permission. All rights reserved.
