Luqa 20

Ssulṭa n Siḏiṯneɣ Ƹisa

1Ijjen n nhar ḏeg wussan nni, Ƹisa aqaṯ ḏi ṯemziḏa ṯameqqrant iseȓmaḏ iwḏan itbeccar-iṯen, usin-d ɣares arruyas n ȓfuqaha ḏ imseȓmaḏen n ccariƹa ḏ imeqqranen n Ayṯ-Israʼil. 2Kkaren nnan-as: "Ini-yaneɣ cek, manis ḏac d ṯekka ssulṭa nni iy zi teggeḏ ṯimesȓayin-a? Wi ḏac yucin ssulṭa nni?"

3-4Inna-asen Ƹisa: "Uȓa ḏ nec akenniw sseqsiɣ x yijjen n ṯmesȓayṯ. Inim-ayi: Yaḥya, man ssulṭa iy zi iṭehhar s waman, ma zi Arebbi ma zeg yiwḏan?"

5Mcawaren jarasen nnan: "Ssulṭa nni, meȓa nenna-as qa ṯekka-d zi Arebbi, ataf aḏaneɣ yini Ƹisa mayemmi war zzayes ṯuminem ca? 6Walakin meȓa nenna-as ssulṭa nni qa ṯekka-d zeg yiwḏan, ataf marra iwḏan aḏaneɣ rejmen minzi umnen belli Yaḥya ḏ nnabi." 7Uca nnan-as i Ƹisa: "Neccin war nessin ca manis d ṯekka ssulṭa nni nnes."

8Indeq-d Ƹisa inna-asen: "Iwa uȓa ḏ nec war ḏawem qqareɣ ca manis ḏayi d ṯekka ssulṭa-ya iy zi teggeɣ ṯimesȓayin-a."

Ȓmaƹna n ixemmasen iy ḏi iǧa ccarr

9Ibḏa Ƹisa issawaȓ ak ccaƹb s ȓmaƹna-ya ṯanita inna-asen: "Ijjen n ssiyyed iẓẓu aḍiȓ ḏeg yijjen n umarjeƹ nnes, ijja ḏayes ixemmasen ṣafi iruḥ isafar aṭṭas n ȓweqṯ. 10Wami d yuweḍ ȓweqṯ n uȓqeḍ n uḍiȓ, ikkar issekk ijjen n uxeddam nnes ɣar ixemmasen nni bac aḏas d ucen ȓḥaqq nnes n umarjeƹ n uḍiȓ. Walakin min ggin ixemmasen nni? Uwṯin-ṯ, ssekken-ṯ-id ixwa. 11Iruḥ issekk-asen ijjen n uxeddam nneɣni, walakin uȓa ḏ wenni uwṯin-ṯ ƹedden xas ssekken-ṯ-id ixwa. 12Issekk-asen ḥetta ḏ ij uxeddam wis ṯȓaṯa, uȓa ḏ wenni jarḥen-ṯ uzzȓen xas.

13Ssenni bab n umarjeƹ n uḍiȓ inna, min ɣa ggeɣ? Ṣafi, nec aḏasen ssekkeɣ memmi iƹizzen imken aṯ ggwḏen. 14Ixemmasen nni min ggin? Wami ufin mmis yusa-d, kkaren nnan i wayawya: Aqa wenni iy ɣa iwarṯen! Aṯ nneɣ bac aḏas nawi amarjeƹ-a n uḍiȓ! 15Nḍaren-ṯ-iḏ ɣar barra i umarjeƹ uḍiȓ nɣin-ṯ.

Iwa, min ḏasen ɣa igg bab n umarjeƹ nni uḍiȓ i ixemmasen nni? 16Aḏ d yas netta s yixef nnes aḏ ineɣ ixemmasen nni marra, aḏ ijj amarjeƹ nni uḍiȓ i inneɣni."

Wami sȓin i manaya nnan: "Arebbi istar!"

17Ixzar ɣarsen inna: "Min ixes aḏ yini wawaȓ-a iy yurin ḏi Lkitab?

<Azru iy ƹiffen ibennayen,

iwqeƹ ḏeg umcan aṣebḥan ḏi ṯɣemmarṯ n dsas.>

18Wenni ɣa iwḍan x uzru-ya aḏ irez.

Wenni xef ɣa iwḍa uzru-ya aḏ ineȓbeẓ."

19Ȓexddenni imseȓmaḏen n ccariƹa ḏ arruyas n ȓfuqaha rezzun aḏ ṭṭfen Ƹisa, fehmen belli issawaȓ xasen s ȓmaƹna-ya walakin ggwḏen zi ccaƹb.

Ḍḍariba n lmalik Qayṣar

20Bḏan imseȓmaḏen nni n ccariƹa ḏ arruyas n ȓfuqaha ḥeṭṭan Ƹisa, rezzun aṯ ṭṭfen x can wawaȓen nnes ḥima aṯ sellmen i lḥakem ḏ ssulṭa nnes. Ruḥen ssekken-as i Ƹisa can yiwḏan sneƹmiȓen aqaṯen nican walakin niṯni ḏ ibergagen. 21Sseqsan-ṯ nnan-as: "A Lmuƹallim, nessen belli cek ṯeqqareḏ ȓḥaqq ṯseȓmaḏeḏ s ȓḥaqq. War teggeḏ bu uḏemawen, ṯseȓmaḏeḏ s ȓḥaqq mammec ixes Arebbi a nƹic. 22Ini-yaneɣ, ma ṯsemmeḥ ccariƹa nneɣ a nxeǧes ḍḍariba i uzeǧiḏ Qayṣar niɣ lla?"

23Issen Ƹisa ixarwiḍen nni iy ḏaysen, inna-asen: 24"Awim-ayi-d dinar nni n ḍḍariba ḥima aṯ ẓreɣ." Inna-asen: "Wi yiȓan teṣwirṯ-a ḏ yisem-a iy ḏayes?"

Nnan-as: "N Qayṣar."

25Indeq-d Ƹisa inna-asen: "Min iǧan n Qayṣar ucem-as-ṯ i Qayṣar, min iǧan n Arebbi ucem-as-ṯ i Arebbi." 26Niṯni war zemmaren ca aḏ cemṯen Ƹisa zi can wawaȓ nnes zzaṯ i ccaƹb. Qqimen tƹejjben ḏeg ujawab nnes, war ufin ca min ɣa inin.

Siḏiṯneɣ Ƹisa itbeccar x ṯuḏarṯ n ȓebda

27Kkaren can yiwḏan zi ȓḥizeb n iṣadduqiyen qarrben-d ɣar Ƹisa. (Qqaren niṯni belli iwḏan war d tekkaren ca zi ȓmewṯ.) Sseqsan Ƹisa nnan-as: 28"A Lmuƹallim, qa yura-aneɣ Musa aryaz meȓa immuṯ ijja ṯamɣarṯ nnes war kiḏes d ijji bu ṯarwa, ṯajjaȓṯ nni labud at yawi uȓwes nnes bac akiḏes d ijj ṯarwa i wumas nni immuṯen. 29Neccin tuɣa akiḏneɣ sebƹa n wawmaṯen, imȓec umezwaru immuṯ war d ijji bu ṯarwa. 30-31Ṯamɣarṯ nni yuwi-t wis ṯnayen immuṯ war d ijji bu ṯarwa. Amenni ƹaweḏ wis ṯȓaṯa aȓ wis sebƹa. 32Aȓ uneggaru uȓa ḏ ṯamɣarṯ nni ṯemmuṯ. 33Yum Lqiyama, umi ɣa ṯiȓi ṯemɣarṯ nni? Aqa uwin-t s sebƹa iḏsen."

34Yarra xasen Ƹisa inna-asen: "Wah, ṯarwa n ddunect-a meǧcen twasmeǧacen. 35Walakin inneɣni iḥesseb-iṯen Arebbi aɣarsen ṯiȓi ṯuḏarṯ n ȓebda, xmi d ɣa kkaren zi ȓmewṯ ataf niṯni war meǧcen ca war twasmeǧicen ca. 36War zemmaren ca aḏ mmṯen, aḏ iȓin amecnaw lmalaʼikaṯ. Niṯni ḏ ṯarwa n Arebbi, xeȓqen-d ḏi Yum Lqiyama.

37Walakin cuf, yinni immuṯen aḏ d kkaren zi ȓmewṯ. Uȓa ḏ Musa isbeyyan-d manaya ḏi ȓqiṣṣa n uxcab#20.37 Maci maƹruf min iƹna uxcab-a, walakin imken ḏ can arbiƹ am ṯabɣa niɣ am can ṯcejjarṯ ṯamezyant ḏayes isennanen. wami inna qa Siḏi Arebbi ḏ Arebbi n Brahim ḏ Arebbi n Isḥaq ḏ Arebbi n Yaƹqub.#20.37 Siḏna Musa tuɣa irass ȓebhayem n uḏeggwaȓ nnes qqaren-as Yaṯrun ḏ ȓefqi n Midyan. Ijjen n nhar indeh ȓebhayem ɣar ṣṣaḥra ḥetta aȓ mani yuweḍ ɣar uḏrar n Arebbi umi qqaren Ḥurib. Ḏinni iy ḏas d ṯmeḍhar lmalaʼika n Siḏi Arebbi ḏeg uceƹƹar n ṯmessi zi ȓwesṭ n yijjen n uxcab. Iẓra Musa axcab nni iḥarreq bȓa ma ṯ tecc ṯmessi. Inna ḏi nnefs nnes: "Aḏ raḥeɣ ḥima aḏ xzareɣ ṯamesȓayṯ-a ig iseḏhacen. Mayemmi axcab-a war iḥarreq ca?" Wami iruḥ ḏinni aḏ ixzar, iẓri-ṯ Siḏi Arebbi ibarreḥ-as-d zi ȓwesṭ n uxcab inna-as: "A Musa a Musa." Inna-as Musa: "Ha aqayi." Inna-as Arebbi: "War tqarreb ca ḏanita. Kkes ṯisiȓa zeg iḍaren nnec ȓaḥeqqac amcan-a iy xef ṯbeddeḏ netta ḏ ijjen n ṯmurṯ muqeddsa." Uca inna-as: "Nec ḏ Arebbi n ȓejḏuḏ nnec ḏ Arebbi n Brahim ḏ Arebbi n Isḥaq ḏ Arebbi n Yaƹqub." Ȓexddenni iseḏḥa Musa isaḏar aɣembub nnes iggweḏ aḏ iẓer Arebbi. 38Netta ḏ Arebbi n yinni iddaren maci n yinni immuṯen, ȓaḥeqqac netta marra iwḏan aɣares iȓin ddaren."

39Nnan-as can imseȓmaḏen n ccariƹa: "A Siḏi, ṯenniḏ mliḥ!" 40U ssenni war izƹim ḥadd aṯ isseqsa ƹaḏ ktar.

Lmasiḥ netta ḏ Siḏes n Dawed

41Indeq-d Ƹisa inna-asen: "Mayemmi qqaren qa Lmasiḥ ḏ mmis n Dawed? 42Qa Dawed inna netta s yixef nnes ḏi Lkitab n Zzabur:

<Siḏi Arebbi inna-as i Siḏi: Qqim-d x ufusi inu,

43aȓ d ɣa ggeɣ ȓƹaḏyan nnec swadday i iḍaren nnec.>

44Mammec ɣa yiȓi Lmasiḥ ḏ mmis n Dawed? Netta Dawed iqqar-as i Lmasiḥ A Siḏi."

Lmunafiqin

45Inna-asen Ƹisa i imeḥḍaren nnes u marra ccaƹb itesȓa-yas: 46"Ḥḍam ixef nwem zeg imseȓmaḏen n ccariƹa. Niṯni texsen aḏ uyuren s iseȓhamen nni nsen, texsen axasen seǧmen ḏi ȓeswaq, texsen aḏ qqimen ḏeg imucan imezwura ḏi ṯemziḏawin ḏ ȓefruḥ. 47Tetten ṯajjaȓin, smeḍharen-d ixef nsen tẓaǧan aṭṭas ḥima aḏ beyynen i yiwḏan belli niṯni ṣebḥen aṭṭas zaƹma. Yina, lḥisab nsen aḏ yiȓi iqṣeḥ aṭṭas!"

Currently Selected:

Luqa 20: RIF

Highlight

Copy