Bar 14

Okugonzangana n'okugumiisiriza abaceke

1 # Bak 2:16. Omuntu ow'okwikiriza okuke mumutangirre, baitu mutarukuteezangana empaka ha biteekerezo bye. 2Omuntu omu aikiriza nkooku asobora kulya buli kintu kyona, baitu ondi ow'okwikiriza kuke alya emikubi yonka. 3Ogu arukulya buli kintu aleke kugaya atarukulya buli kintu kandi atarukulya buli kintu nawe aleke kucwera omusango ogu arukubirya; habwokuba Ruhanga amazire kumutangirra. 4Niiwe oha arukucwera omuheereza w'ondi omusango? Obu araaba naayemerra rundi naagwa, nikimanywa mukama we wenka. Kandi alikwatirirwa, habwokuba mukama we aina obusobozi obw'okumwemereza.

5Omuntu omu, ekiro kimu akyeta kikuru kukira ebindi; kunu ondi, ebiro byona abinganiza. Leka buli omu ayecweremu wenka. 6Ogu anyakukuza ekiro, akikuza habw'okuhaisa MUKAMA ekitiinisa. N'ogu anyakulya buli kintu, nawe alya habw'okuhaisa MUKAMA ekitiinisa, habwokuba alya nasiima Ruhanga; n'ogu atalya kintu, akizira habw'okuhaisa MUKAMA ekitiinisa, kandi nawe asiima Ruhanga. 7Busaho n'omu ayeyomeeza, kandi busaho ayefeera. 8Obu twomeera, twomeezibwa MUKAMA; kandi obu tufa, nabwo tufeera MUKAMA. Nukwo nu, obu twomeera rundi tufa, tuli ba MUKAMA. 9Eki nikyo Kristo yaferiire kandi yahumbuuka, nukwo asobole kuba MUKAMA wa boona: aboomiire n'abafiire.

10 # 2Kor 5:10. Habwaki ocwera mugenzi waawe omusango? Rundi habwaki ogaya mugenzi waawe? Ningira itwena tulyemerra omumaiso g'ekitebe kya Ruhanga ekicwerwaho emisango; 11#Is 45:23.nkooku kyahandiikirwe kiti:

“Mukama agamba ati:

Ninyowe Atahwaho, kandi buli muntu alinteereza amaju,

orulimi rwa buli omu rulihaisaniza Ruhanga.”

12Habweki, buli omu omuli itwe alyetonganirra hali Ruhanga.

Okutaleeta kyesiitaza

13Habweki, tutongera kucwerangana emisango, baitu tucwemu kutagaruka kuleetera mugenzi waitu ekyesiitazo rundi ekindi kyona ekirukwekiika omu muhanda gwe. 14Mmanyire kandi ningumiza kimu omu MUKAMA Yesu nkooku hataroho kintu na kimu eky'omuziro habwakyo; baitu kiba ky'omuziro hali ogu anyakuteekereza ngu, ky'omuziro. 15Iwe eki orukulya, obu kiraaba nikikora kubi mugenzi waawe, obu muba mutakyagonzangana. Otaikiriza eki orukulya kuhwerekereza ogu Kristo ou yaferiire. 16Nahabweki, iwe eki orukweta kirungi otakireetereza okugambwaho kubi. 17Habwokuba obukama bwa Ruhanga tibiri byokulya rundi byokunywa, baitu nukwo okuhikirra, okuteekaana, n'okusemererwa oku tuheebwa Mwoyo Ahikiriire. 18Ogu anyakuheereza ati Kristo, nuwe asemeza Ruhanga kandi asiimwa abantu.

19Hati nu, ka twekambire ebireeta obusinge n'ebirukwombeka ekitebe ky'abaikiriza. 20Muleke kusiisa omulimo gwa Ruhanga habw'ebyokulya. Mazimakwo ebintu byona birungi, baitu ekibi nukwo omuntu okusiitaza abandi habw'eki arukulya. 21Haakire okutalya nyama, rundi okutanywa marwa, rundi okutakora kintu kyona ekirukwesiitaza mugenzi waawe. 22Okwikiriza oku oinakwo, oikale nakwo nikumanywa iwe na Ruhanga. W'omugisa ogu atarukwetuntuza obu aba naakora ebi arukuteekereza ngu bihikire. 23Baitu ogu anyakugurukyagurukya, kakuba alya, omusango gwamusinga; habwokuba eki akora takikora habw'okwikiriza; ningira kyona ekitaruga omu kwikiriza kiba kibi.

Currently Selected:

Bar 14: BRR2008

Highlight

Copy