Kus 10

Malaika ayakwasire akazingo k'ekitabu

1Aho narora malaika ondi ow'amaani naasirimuka naaruga omu iguru, ali omu kicu, n'omuhangazima guli haruguru y'omutwe gwe. Ha maiso ge nigangasana nk'izooba, amaguru ge gali nk'enyomyo z'omurro. 2Omu mukomo gwe akwasire akazingo k'ekitabu akasuukwirwe. Okuguru kwe okw'obulyo yakuta ha nyanja, kandi okw'obumoso yakuta ha bwerre. 3Yayamirra n'iraka likooto nk'entale erukubbuukura. Obu yayamiriire, enkuba musanju zaagamba. 4Enkuba omusanju obu zaamazire kugamba, nkaba nyeteekaniize kuhandiika, baitu nahurra iraka erirukuruga omwiguru nirigamba liti: “Enkuba musanju, ebi zaagamba obiculerre, otabihandiika.”

5 # Kurug 20:11; Bir 32:40; Dan 12:7; Amos 3:7. Malaika ou naboine ayemeriire ha nyanja na ha bwerre, omukono gwe ogw'obulyo yagwimukya haiguru, 6yarahira Ogu anyakwomeera ebiro byona, ayahangire iguru, ensi, anyanja, n'ebinyakubirumu byona, naagamba ngu, tihakyaroho kukeerereza okundi, 7baitu omu biro malaika owa musanju ebi aliterramu engwara, nubwo Ruhanga alihikiriza entegeka ye ey'ensita nkooku yagambiire abarangi abamuheereza.

8 # Ezek 2:8—3:3. Nubwo iraka eri nahuliire niriruga omwiguru, lyayongera lyangambira liti: “Genda oihe akazingo k'ekitabu ekyanjurwirwe omu ngaro za malaika anyakwemeriire ha nyanja na ha bwerre.” 9Nagenda hali malaika ogu, namusaba ampe akazingo k'ekitabu. Uwe yangarukamu ati: “Nkako, kakwate okalye; nikaija kukuruma omu nda, baitu omu kanwa karakunurra nk'obwoki.” 10Akazingo ako nakaiha omu mukono gwa malaika nakalya; omu kanwa kange kakaba nikanura nk'obwoki, baitu obu namazire kukalya, narumwa omu nda. 11Malaika yangambira ati: “Osemeriire kugaruka kuranga ebiriizira abantu ab'enganda nyingi, amahanga, engambo, n'abakama.”

Currently Selected:

Kus 10: BRR2008

Highlight

Copy