Mar 7

Enyegesa y'abaisenkuruitwe

(Mat 15:1-9)

1Abafalisaayo obu baamwesoroliizeho n'abandi ha beegesa b'ebiragiro abakaba barugire Yerusaalemu, 2bakarora abamu ha beegesebwa ba Yesu nibalya batanaabire engaro. 3(Habwokuba Abafalisaayo n'Abayudaaya boona tibalya batanaabire omu ngaro, nibalinda emigenzo y'abaisenkurubo; 4obu baarugaga omu katale, tibalyaaga batakoogere; kandi baina emigenzo endi nyingi ei baalindaga: Nk'okwogya ebikopo, ebinaga, n'ebibindi eby'omulinga.) 5Abafalisaayo n'abeegesa b'ebiragiro nukwo kumukaguza bati: “Habwaki abeegesebwa baawe batahondera emigenzo y'abaisenkuruitwe, baitu balya batanaabire engaro?” 6#Is 29:13.Yabagarukamu ati: “Bagobya inywe, Isaaya ebi yarangire hali inywe bikahika nkooku kyahandiikirwe kiti:

‘Ab'ihanga linu bampaisaniza n'ebigambo byabo,

baitu emitima yabo tendoho;

7bandamiza busa, nibeegesa ebyatairweho abantu ngu

niyo nyegesa ya Ruhanga.’

8“Muleka Ebiragiro bya Ruhanga, mugumira ha migenzo y'abantu.”

9Yayongera yabagambira ati: “Ka mwina amagezi maingi ag'okwanga Ebiragiro bya Ruhanga, nukwo mugumire ha migenzo yanyu! 10#Kurug 20:12; Bir 5:16; Kurug 21:17; Lev 20:9.Ningira Musa akagamba ati: ‘Otiinege sso na nyoko;’ kandi ati: ‘Anyakujuma ise rundi nyina, mazimakwo aitwege’; 11baitu inywe mugamba muti: ‘Omuntu kakuba agambira ise rundi nyina ati: Eki naakuhaire niyo Korbaani’ (amakuru gaakyo ngu: kihongiirwe Ruhanga) 12muba mutakyamwikiriza kukorra ise na nyina ekirungi kyona. 13Nukwo mudibya ekigambo kya Ruhanga habw'emigenzo yanyu ei mugweterangana. Kandi mukora n'ebindi bingi nk'ebi.”

Ebisiisa omuntu

(Mat 15:10-20)

14Akagaruka yayeta abantu, yabagambira ati: “Inywena mumpurre kandi mwetegereze; 15busaho kintu ekiruga aheeru y'omuntu ekisobora kumusiisa; baitu ekimuruga omu nda nikyo kimusiisa. 16Anyakwina amatu, ahurre.” 17Obu yarugire omu bantu, amazire n'okutaaha omu nju, abeegesebwa be baamukaguza amakuru g'orufumo oru. 18Yabagarukamu ati: “Na inywe timukeetegeriize? Timurukumanya ngu, ekintu kyona ekiruga aheeru kikataaha omu muntu tikisobora kumusiisa? 19Habwokuba tikitaaha omu mutima gwe, baitu kitaaha omu nda ye, kirabamu, kituruka aheeru.” (Nukwo yagumize ati ebyokulya byona nkooku biri birungi.) 20Yayongera ati: “Ekiruga omu muntu nikyo kimusiisa; 21habwokuba omu mutima gw'omuntu omunda nuho haaruga ebiteekerezo ebibi, obusiihani bw'abahuuru, obusuma, obwisi, n'obusiihani bw'abaswire n'abaswirwe, 22okwegomba kubi, itima, obucwangya, orwanju, ihali, okuhangirra, okwehaisa, n'obudoma. 23Ebibi ebi byona biruga omu muntu omu nda, kandi nibyo bimusiisa.”

Okwikiriza kw'omukazi omunyaihanga

(Mat 15:21-28)

24Yesu yaimuka yarugayo, yagenda omunsi ya Taya na Sidooni. Obu yahikireyo, yataaha omu nju, atagonze muntu weena amanye nambere ali; baitu nabwo atasobole kwesereka. 25Ahonaaho omukazi ow'akaba aina muhara we aroho omwoyo omubi, obu yamuhuliireho, yaija, yagwa ha bigere bye. 26Kandi omukazi ogu akaba ali Mugiriiki, nzaarwa ya Fonisiya. Yamwesengereza abinge omwoyo omubi guruge ha muhara we. 27Yesu yamugarukamu ati: “Leka abaana bonyini babanze balye, baigute, habwokuba tikirukuhika kwaka abaana ebyokulya, okabinagira embwa.” 28Baitu omukazi yamugambira ati: “Ego, Waitu, baitu embwa ezibunda hansi y'emeeza nazo zirya oburagalika bw'ebyokulya by'abaana.” 29Nandiki Yesu ati: “Habw'okugarukamu oti, ogende n'obusinge; muhara waawe, omwoyo omubi gumurugireho.” 30Omukazi yataaha omuka, yasanga omwana abyamire omu kitabu, omwoyo omubi gumurugireho.

Yesu naakiza omusaija ow'akaba afiire amatu n'omunwa

31Yesu yagaruka naaruga omu kicweka kya Taya, yaraba Sidooni, yahika ha nyanja ya Galiraaya naaraba omu isaza ly'Embuga Ikumi. 32Nuho baamuleetiire omusaija kiigaramatu kandi arukuhebebera; baamwesengereza amuteho emikono. 33Obu yamwihire omu kitebe ky'abantu, amutwaire ha rubaju, yata enkumu ze omu matu ga kiigara, kandi yacwa amacwanta, yamukora ha rulimi; 34obu yarozire haiguru, yasinda, yamugambira ati: “Efata,” amakuru gaakyo ngu: “Iguka.” 35Amatu ge gaiguka, orulimi rwe rwabohorroka, yabaza kurungi. 36Kandi Yesu yabateererra kutagambiraho muntu n'omu; baitu nambere yahikize kubateererra, bbo bakakizaaho kukirangaaniza. 37Kandi bakahunirra muno nibagamba bati: “Ebintu byona abikozire kurungi, naahuliza abafu b'amatu kandi naagambisa abafu b'eminwa.”

Currently Selected:

Mar 7: BRR2008

Highlight

Copy