Mar 11

Kristo naataaha omu Yerusaalemu n'ekitiinisa

(Mat 21:1-11; Luk 19:28-40; Yoh 12:12-19)

1Obu bairiire haihi na Yerusaalemu, bahikire Betifage na Betaniya haihi n'orusozi rw'emiti Oliva, nubwo Yesu yatumire babiri ha beegesebwa be, 2yabagambira ati: “Mugende omu kyaro kiri eki muroleriire; obu muraaba nimutaahamu muti, murarora omwana gw'endogoyi ogutakatembwaga muntu; mugusibule, muguleete. 3Obu haraabaho arukubakaguza ati: ‘Nimusibura gwaki?’ Mumugarukemu muti: ‘Mukama waitu nagwetaaga, kandi naija kugugarra bwango.’” 4Baagenda, baasanga omwana gw'endogoyi gusibikirwe haihi n'irembo ha ruguudo rubaju; baagusibura. 5Abantu abakaba beemeriireho nukwo kubakaguza bati: “Omwana gw'endogoyi nimusibura gwaki?” 6Baabagarukamu Yesu eki yabagambiire, nabo baabaleka baagenda. 7Baaleetera Yesu omwana gw'endogoyi, baagutaho ebijwaro byabu, yagwikarraho. 8Abantu baingi baayarra ebijwaro byabu omu muhanda, abandi baayarra amataagi g'emiti aga bacwire omu ngonjo. 9#Zab 118:25,26.Boona abakaba babeebembiire n'abakaba babahondiire bakatoka bati: “Hangiriza! Ahaisanizibwe ogu arukwija omu ibara ly'Atahwaho! 10Bw'omugisa obukama bwa isenkuru-itwe Daudi oburukwija! Hangiriza anyakusinga haiguru muno!”

11Yesu yataaha Yerusaalemu, yagenda omu Nju ya Ruhanga obu yamazire kurora ebintu byona, kandi obwire buli haihi kwira, yaturuka mu rubuga yagenda Betaniya hamu na ikumi na babiri.

Yesu naakyena omuti ogutarukwana

(Mat 21:18-19)

12Obu bwakiire nyenkya, bakaba nibaruga Betaniya, yarumwa enjara. 13Obu yalengera omuti omutini ogujumbire, yagenda kurora obu araaba nasobora kugusangaho ekijuma. Baitu obu yaguhikireho, atasangeho kantu kwihaho ebikoora byonka, habwokuba kakaba katali kasumi k'emitini kwaniramu. 14Yagugambira ati: “Okuruga hati hatalibaho n'omu agaruka kukulyaho ekijuma.” Abeegesebwa be eki bakakihurra.

Yesu naabinga abatundiraga omu Nju ya Ruhanga

(Mat 21:12-17; Luk 19:45-48; Yoh 2:13-22)

15Baahika Yerusaalemu. Yataaha omu Nju ya Ruhanga, yatandika kubingamu abakaba nibatundiramu n'abakaba nibagurramu; kandi yajuumika emeeza ez'abakaba nibahingisa sente, n'entebe ez'abakaba nibatunda amaiba; 16kandi ataikirize muntu weena kurabya ekintu omu Nju ya Ruhanga. 17#Is 56:7; Yer 7:11.Yayegesa naabakaguza ati: “Kitahandiikwe kiti: ‘Enju yange eraayetwaaga Nju y'okusabiramu, ey'amahanga goona’? Baitu inywe mugifoire bwingira bw'abanyagi.” 18Baanyakatagara abakuru n'abeegesa b'ebiragiro obu bahuliire eki baaserra omuhanda ogw'okumwita. Baitu bakamutiina, habwokuba enyegesa ye ekahuniriza abantu boona. 19Obwire obu bukaba nibusweka, Yesu yaruga omu rubuga.

Okwegera ha muti ogutarukwana

(Mat 21:20-22)

20Nyenkya kara Yesu n'abeegesebwa be obu bakaba nibahingura, baarora omuti omutini gwomiire kimu okuhika ha mihama. 21Petero yaijuka ekyabaireho, yagambira Yesu ati: “Mwegesa, dora! Omutini ogu wakyenere, hati gwomere.” 22Yesu yagarukamu ati: “Inywe mwesigege Ruhanga. 23#Mat 17:20; 1Kor 13:2.Mazima nimbagambira nti: Omuntu weena aligambira orusozi runu ati: ‘Sinduka, ogwe omu nyanja’ kandi atarukugurukyagurukya, baitu naikiriza ngu, eki arukugamba nikiija kubakwo, kirimukolerwa. 24Nikyo ndukubagambirra nti: kyona eki muraasabaga nimwesengereza, nimwikiriza nkooku muraakitunga, mazimakwo muraakiheebwaga. 25#Mat 6:14,15.Obu muraabaga mwemeriire nimusaba, mwina ekigambo kyona ha muntu, mubanzege mumuganyire; na Isiinywe anyakuli omu iguru nukwo abaganyire ebibi byanyu. 26[Baitu kakuba mutaganyira, na Isiinywe anyakuli omu iguru talibaganyira bibi byanyu.]”

Ekikaguzo ha busobozi bwa Yesu

(Mat 21:23-27; Luk 20:1-8)

27Baayongera baahika Yerusaalemu. Yesu obu akaba naagendagenda omu Nju ya Ruhanga, abanyakatagara abakuru abeegesa b'ebiragiro, n'abakuru b'abantu baija nambere ali, 28baamukaguza bati: “Busobozi ki oburukukukoza ebintu binu, kandi nooha yabukuhaire kubikora?” 29Yesu yabagarukamu ati: “Na nyowe kambakaguze ekekaguzo kinu; obu murangarukamu, numwo ndabagambira obusobozi oburukunkoza ebi byona. 30Okubatiza kwa Yohaana kukaruga hali Ruhanga rundi omu bantu? Mungarukemu.” 31Baitu bbo baahakanizangana bonka bati: “Obu turagarukamu ngu: ‘Kukaruga hali Ruhanga,’ naija kutukaguza ati: ‘Habwaki mutaramwikiriize?’ 32Boojo tugarukemu tuti: ‘Kukaruga omu bantu?’ ” Baitu bakatiina abantu, habwokuba boona bananukire Yohaana nkooku akaba ali murangi mali. 33Nahabweki baagarukamu Yesu bati: “Titumanyire.” Yesu nubwo yabagambiire ati: “Na nyowe tindukwija kubagambira obusobozi oburukunkoza binu.”

Currently Selected:

Mar 11: BRR2008

Highlight

Copy