Mat 8

Yesu naakiza omugenge

(Mar 1:40-45; Luk 5:12-16)

1Yesu obu yasirimukire orusozi, ebitebe bingi bikamuhondera. 2Omugenge akaija nambere ali, yateeza amaju omu maiso ge naagamba ati: “MUKAMA wange, obu oraaba noogonza, noosobora kunkiza.” 3Yesu yagorra omukono, yamukwataho naagamba ati: “Ego, ningonza, kira.” Ahonaaho ebigenge bye byakira. 4#Lev 14:1-32.Yesu yamugambira ati: “Otakisura okagambiraho muntu n'omu; baitu genda oyeyoleke nyakatagara, ohonge ekihongwa Musa eki yaragiire, bube bwakaiso hali abantu nkooku okiziibwe.”

Yesu naakiza omuheereza w'omukuru w'ab'amahe

(Luk 7:1-10)

5Yesu obu yataahire omu Kafaranaumu, omukuru w'ekihanda ky'ab'amahe, Omuroma, yaija nambere ali, yamwesengereza 6naagamba ati: “Waitu, omuheereza wange abyamire omu ka azingamire, naasaasa muno.” 7Yesu yamugambira ati: “Ka nyije, mmukize.” 8Baitu mukuru w'ekihanda ky'abamahe yamugarukamu ati: “MUKAMA wange, tinsemeriire kukutaahya omwange; baitu gamba ekigambo kyonka, omuheereza wange araakira. 9#Baru 3:33-35.Habwokuba na nyowe ndi muntu arukulemwa; nyina n'abaserikale aba ndukulema. Obu ndagira omu nti: ‘Genda’, agenda; n'ondi nti: ‘Ija’, aija; n'obu ndagira omuheereza wange nti: ‘kora kinu’, akikora.” 10Yesu obu yamuhuliire, yahunirra, yagambira abakaba bamuhondiire ati: “Mazimakwo nimbagambira nti: Tinkaroraga muntu n'omu omu Isirairi anyakwina okwikiriza nk'oku. 11#Luk 13:29.Nimbagambira nti: Baingi baliruga Burugaizooba na Bugwaizooba, baikarre kulya hamu na Abbrahamu, Isaaka, na Yakobbo omu bukama bw'omu iguru 12#Mat 22:13; 25:30; Luk 13:28.baitu abaana b'obukama balibingirwa aheeru omu mwirima, nambere abantu baliririrra kandi bakanena ensaya.” 13Yesu nubwo yagambiire mukuru w'ekihanda ky'ab'amahe ati: “Genda; kikukolerwe nkooku oikiriize.” Kandi omu kasumi ako konyini omuheereza we yakira.

Yesu naakiza nyinazaara Petero

(Mar 1:29-34; Luk 4:38-41)

14Yesu obu yataahire omunju ya Petero, yasanga nyinazaara abyamire, arwaire omuswija; 15yamukwata ha mukono, omuswija gwakira, yaimuka, yatandika kumuheereza.

Abandi Yesu aba yakirize

16Rwebagyo, izooba obu lyagwire, bakaleetera Yesu abantu baingi abakaba bakwasirwe emyoyo emibi; yagibinga n'ekigambo kye, kandi yakiza boona abakaba barwaire. 17#Is 53:4.Kinu kikahikiriza omurangi Isaaya eki yagambire ati: “Akeetaho obuceke bwaitu kandi yayetweka endwara zaitu.”

Ebyekwaso by'abali b'okuhondera Yesu

(Luk 9:57-62)

18Yesu obu yarozire ekitebe kingi kimwehinguliriize, yaragira abeegesebwa kwambuka kugenda nseeri y'enyanja. 19Omwegesa w'ebiragiro yaija, yamugambira ati: “Mwegesa, ndaakuhonderaga hoona h'oraakagendaga.” 20Yesu yamugarukamu ati: “Eboha ziina ebiina n'enyonyi ez'omu mwanya ziina ebiju; baitu Omwana w'omuntu taina h'okuta omutwe.” 21#Tob 4:3,4.Ondi ha beegesebwa yagamba ati: “Waitu, kambanze ngende nziike taata.” 22Yesu yamugarukamu ati: “Iwe mpondera, leka abakafiiri baziike abafu baabu.”

Yesu naaculeeza ihunga

(Mar 4:35-41; Luk 8:22-25)

23Yesu obu yataahire omu bwato, abeegesebwa be baagenda nawe. 24Nubwo haimukire ihunga ly'amaani lyateera ha nyanja, ebigonzi byaseeseka omu bwato; baitu Yesu akaba agwijagiire. 25Abeegesebwa baagenda baamusisiimura bati: “Waitu, tujune, twafa!” 26Yabagarukamu ati: “Nimutiina ki inywe abaina okwikiriza okuke?” Nubwo yaimuka, yacoomera omuyaga n'enyanja, byateeka. 27Abantu baahunirra, nibagamba bati: “Mara onu muntu ki arukuragira ihunga n'enyanja bikamuhurra?”

Yesu naakiza abasaija abaakwasirwe emyoyo emibi

(Mar 5:1-20; Luk 8:26-38)

28Yesu obu yahikire nseeri y'enyanja, omu nsi y'Abagadarene, akatangaana abasaija babiri nibaruga omu bituuro, abakaba baroho emyoyo emibi. Bakaba bali b'akabi, hataroho n'omu ayasoboraga kuraba omuhanda ogu. 29Baatokera haiguru nibagamba bati: “Nootwenza ki, iwe Mwana wa Ruhanga? Oizire hanu kutucanza akasumi katakahikire?” 30Haihi aho hakaba haroho igana ly'empunu nizirya. 31Emyoyo emibi yamwesengereza neegamba ati: “Obu oraaba nootubinga, otusindike omu igana ly'empunu.” 32Yagigambira ati: “Mugende”. Nubwo emyoyo emibi yabarugamu, yagenda yataaha omu mpunu. Igana lyona ery'empunu lyajumbuutuka, lyakonkomoka enengo y'orusozi, zaagwa omu nyanja, zaafeeramu.

33Abasaija abakaba nibaziriisa bairuka, baagenda omu rubuga baasubirra buli kintu, n'ebyabaireho abasaija abakaba baina emyoyo emibi. 34Nubwo abantu boona ab'omu rubuga baaturukire okutangaana Yesu. Obu baamurozire, baamwesengereza aruge omu mitaano yabu.

Currently Selected:

Mat 8: BRR2008

Highlight

Copy