Mat 20

Orufumo rw'abakozi b'omu rugonjo rw'emizaabbibbu

1“Obukama bw'omwiguru nibusisana nyineeka ayazindukire nyenkya kara kugulirra abakozi b'okulima omu rugonjo rwe rw'emizaabbibbu. 2Obu yamazire kwikirraniza nabo empeera y'ekiro kimu, yaboohereza omu rugonjo rwe orw'emizaabbibbu. 3Obu yaturukire nka ha saaha isatu, yarora abandi beemeriire omu katale bataina eki barukukora; 4yabagambira ati: ‘Na inywe mugende omu rugonjo rwange mukole, ninyija kubaha ekibasemeriire.’ Baagenda. 5Yayongera yaturuka nka ha saaha mukaaga na ha saaha mwenda, nabwo yakora ati. 6Kandi ha saaha ikumi n'emu yaturuka aheeru, yasanga abandi beemeriire, yabakaguza ati: ‘Habwaki musiibire hanu ekiro kyona mutaina eki murukukora?’ 7Baamugarukamu bati: ‘Habwokuba busaho muntu atwesire.’ Yabagambira ati: ‘Na inywe mugende omu rugonjo rwange mukole.’

8 # Lev 19:13; Bir 24:15. “Izooba obu lyagoroobere, mukama w'orugonjo rw'emizaabbibbu yagambira omukeeto we ati: ‘Yeta abakozi, obahe empeera yabo, obandize ha b'enyuma, omalirirre ha b'okubanza.’ 9Abaatandikire ha saaha nka ikumi n'emu obu baizire, buli omu yatunga empeera y'ekiro kimu. 10Ab'okubanza obu baizire, baanihira ngu nibaija kusasurwa kukiraho; baitu buli omu omuli bo nawe akasasurwa empeera y'ekiro kimu. 11Obu bakaba nibakyagiheebwa, baahyemera nyineeka, 12nibakaguza bati: ‘Abaizire hanyuma bakozire esaaha emu yonka, kandi obainganiize na itwe abakozire ekiro kyona tutiirwe n'omusana?’ 13Uwe yagarukamu omu hali bo ati: ‘Mugenzi wange, tinkukozire kubi. Tituragainege empeera y'ekiro kimu? 14Twara eyawe, ogende; ngondeze kusasura owa hanyuma nkooku nkusaswire. 15Haroho arukuntanga kukozesa ebyange nkooku ndukugonza? Rundi nondora eriiso libi habw'obwenda bwange?’ 16#Mat 19:30; Mar 10:31; Luk 13:30.Nahabweki ab'enyuma baliba b'okubanza, kandi ab'okubanza baliba b'enyuma.”

Yesu naabazaaho okubonabonesibwa kwe omurundi gwa kasatu

(Mar 10:32-34; Luk 18:31-34)

17Yesu obu akaba naagenda Yerusaalemu, akagarra abeegesebwa be ikumi na babiri ha rubaju. Obu bakaba nibakyagenda yabagambira ati: 18“Hati nu, nitugenda Yerusaalemu; Omwana w'omuntu naija kuheebwayo hali abanyakatagara abakuru n'abeegesa b'ebiragiro, balimucwera omusango gw'okumwita, 19kandi balimuhayo hali Abanyamahanga kumusekeereza, okumuteera enkoba, n'okumubamba ha musaraba; baitu alihumburwa hahingwireho ebiro bisatu.”

Nibasaba obukuru omu bukama bwa Ruhanga

(Mar 10:35-45)

20Nubwo nyina batabani ba Zebedaayo yaija nabo hali Yesu, yateeza amaju omumaiso ge aina eki arukumusaba. 21Yesu yamukaguza ati: “Noyenda ki?” Yamugarukamu ati: “Ikiriza abaana bange banu baikarre, omu ha mukono gwawe ogw'obulyo ondi ha gw'emoso omu bukama bwawe.” 22Baitu Yesu yagarukamu ati: “Timurukumanya eki murukusaba. Nimusobora kubagana ha mabone aga ndukwija kubonabona?” Baamugarukamu bati: “Nitusobora.” 23Nandiki Yesu ati: “Amabone aga ndukwija kubonabona na inywe muligabona, baitu okwikarra ha mukono gwange ogw'obulyo n'ogw'emoso, tali nyowe arukukigaba, baitu ky'abo aba kiteekaniriziibwe Isenyowe.” 24Kandi ikumi obu baahuliire eki, babiihirirwa banyineemu abo ababiri. 25#Luk 22:25,26.Baitu Yesu yayeta boona, yabagambira ati: “Mumanyire abalemi b'Abanyamahanga nkooku babalemesa itwale, kandi n'abakuru baabo nkooku babaragiza obusobozi. 26#Mat 23:11; Mar 9:35; Luk 22:26.Tikiriba kiti omuli inywe; baitu arukwenda kuba mukuru omuli inywe, naasemerra kuba muheereza wanyu; 27kandi arukwenda kuba w'okubanza omuli inywe, naasemerra kuba muheereza wanyu, 28nkooku Omwana w'omuntu ataraiziire kuheerezibwa baitu okuheereza, n'okuhayo obwomeezi bwe okucungura baingi.”

Yesu naakiza abafu b'amaiso babiri

(Mar 10:46-52; Luk 18:35-43)

29Obu bakaba nibaruga Yeriko, ekitebe kikooto ky'abantu kyahondera Yesu. 30Kandi abafu b'amaiso babiri abakaba baikaliire ha muhanda rubaju, obu baahuliire ngu, Yesu naahingura, baayamirra nibagamba bati: “Omwana wa Daudi, tugirre embabazi!” 31Ekitebe ky'abantu kyabacoomera nikibaigaliriza ngu baculeere; baitu bbo baatokera haiguru okukiraho bati: “Waitu, Omwana wa Daudi, tugirre embabazi!” 32Yesu yayemerra, yabeeta, yabakaguza ati: “Nimugonza mbakorre ki?” 33Baamugarukamu bati: “Waitu, nitugonza amaiso gaitu gaiguke.” 34Yesu yabakwatirwa embabazi, yabakora ha maiso, ahonaaho baarora, kandi baamuhondera.

Currently Selected:

Mat 20: BRR2008

Highlight

Copy