Mat 11

Abaatumirwe Yohaana Omubatiza nibakaguza Yesu

(Luk 7:18-35)

1Yesu obu yamazire kwegesa abeegesebwa be ikumi na babiri, yarugayo yagenda kwegesa n'okurangirra Amakuru Amarungi omu mbuga zaabu.

2Yohaana ow'akaba ali omu nkomo, obu yahuliire Kristo ebi arukukora, yatuma abeegesebwa be 3okumukaguza buti: “Niiwe ogu arukugenda kwija, rundi tutegereze ondi?” 4Yesu yabagarukamu ati: “Mugarukeyo, mugambire Yohaana ebi murukuhurra n'ebi murukurora: 5#Is 35:5,6; Is 61:1.abafu b'amaiso nibarora, abalema nibarubata, abagenge nibakizibwa, abafu b'amatu nibahurra, abafiire nibahumbuurwa, abaseege nibarangirirwa Amakuru Amarungi. 6W'omugisa ogu atarukunyesiitaraho!”

7Abeegesebwa ba Yohaana obu baamazire kurugayo, Yesu yakaguza ebitebe by'abantu hali Yohaana ati: “Omwirungu mukagenda kurorayo ki? Orubingo orurukutengesebwa omuyaga? 8Obu, mukagenderayo ki? Kurora omuntu ajwaire engoye ezirukunekaneka? Abo abajwara engoye ezirukunekaneka baikara omu bikaali by'abakama. 9Obu, mukagenderayo ki? Kurora omurangi? Ego, nimbagambira nti: Naakira n'omurangi. 10#Mara 3:1.Nuwe ogu ou kyahandiikirweho kiti:

“‘Dora, nintuma omukwenda wange akwebembere, nuwe akusemereze omuhanda.’ 11Mazima nimbagambira nti: Omu bantu abaazairwe abakazi, busamu n'omu arukukira Yohaana Omubatiza ekitiinisa; baitu omuto omu bukama bw'omwiguru nuwe arukumukira. 12#Luk 16:16.Okuruga omu biro bya Yohaana Omubatiza n'okuhika hati, obukama bw'omwiguru burwanirirwa n'amaani, kandi ababurwanirra babunyaga n'amaani. 13Habwokuba Ebiragiro n'abarangi, boona bakaranga ebirukwija kubaho okuhika ha biro bya Yohaana; 14#Mara 4:5; Mat 17:10-13; Mar 9:11-13.obu muraaba nimwikiriza ebyarangirwe ebi, Yohaana ogu nuwe Eriya ayanihirwaga kwija. 15Anyakwina amatu, ahurre.

16“Abantu ab'obusinge bunu ndabalengesaniza na ki? Nibasisana nk'abaana abaikaliire omu butale, nibeetangana bati:

17“‘Tukabaterra endere, timwazina; twabaterra empamo, timwarra.’ 18Yohaana obu yaizire atarukulya byokulya kandi atarukunywa marwa, baagamba ngu: ‘Aroho omwoyo mubi’, 19kandi Omwana w'omuntu obu yaizire naalya kandi naanywa, baagamba bati: ‘Dora omukoizi kandi omutamiizi, enganjani y'abasorooza b'omusoro n'abasiisi!’ Amagezi ga Ruhanga gamanyirwa ha bikorwa byago.”

Omusango gw'embuga ezitarukwegarukamu

(Luk 10:13-15)

20Nubwo Yesu yatandika kujunaana embuga nambere yakoliire ebyamahano ebirukukira obwingi, habwokuba bateegarukemu. 21#Is 23:1-18; Ezek 26:1—28:26; Yow 3:4-8; Amos 1:9,10; Zek 9:2-4.“Olikibona iwe Korazini! Olikibona iwe Betisaida! Ebyamahano ebyakoliirwe omuli inywe, kakuba byakoliirwe Taya na Sidooni, baakubaire beegarukiremu ira, bajwaire ebiguniya, beesiigire n'iju! 22Baitu nimbagambira nti: Ha kiro ky'okucwerwa omusango, Tiiro na Sidooni ziriganyirwa okukira inywe. 23#Is 14:13-15; Kub 19:24-28.Na iwe Kafaranaumu olinyumizibwa ohike haiguru? Nangwa, oligarurwa hansi okuzimu. Omanye ebyamahano ebyakoliirwe omuli iwe, kakuba byakoliirwe omu Sodomu, yakwikaireho okuhika hati. 24#Mat 10:15; Luk 10:12.Baitu nimbagambira nti: Ha kiro ky'okucwerwa omusango, ensi ya Sodomu eriganyirwa kukira iwe.”

Mwije nambere ndi mbahuumuze

(Luk 10:21-22)

25Omu kasumi ako, Yesu yagamba ati: “Taata, MUKAMA w'iguru n'ensi ninkusiima, habwokuba ebintu binu okabisereka ab'amagezi n'abarukwetegereza, wabisuukurra abaana bato. 26Ego Taata, eki nikyo wasiimire. 27#Yoh 3:35; Yoh 1:18; 10:15.Isenyowe akankwasa ebintu byona, kandi busaho n'omu amanyire Mwana okwihaho Ise, kandi busaho n'omu amanyire Ise okwihaho Mwana, na weena Mwana ou agonza kumusuukurra. 28#Sir 6:24-30; 24:19; 51:23-26.Mwije nambere ndi inywena abajwahire n'abalemeriirwe mbahuumuze. 29#Yer 6:16.Muhimbe ekikoligo kyange, mwegere hali nyowe; habwokuba ndi muculeezi kandi ninyebundaaza omu mutima, na inywe mulitungira emyoyo yanyu ekihuumuro. 30Habwokuba ekikoligo kyange tikirukulemeera, kandi n'omutumba gwange nigwanguhirra.”

Currently Selected:

Mat 11: BRR2008

Highlight

Copy