Luk 24

Nibasanga ekituuro ekitarumu muntu

(Mat 28:1-10; Mar 16:1-8; Yoh 20:1-10)

1Ha Sande, ekiro ekibanza wiiki, emamba neetandika kusara, abakazi bakazindukira ha kituuro, baatwarayo amagita agarukuboyo aga bakaba bateekaniize. 2Bakasanga ibaale likumbiibwe liihirwe ha munwa gw'ekituuro; 3baitu obu bataahiremu, batasangemu mutumbi gwa Yesu. 4Obu bakaba nibakyahunirra bati, abasaija babiri abajwaire engoye ezirukwengengeta baabemerra ha rubaju. 5Abakazi abakaba bakyakwasirwe obutiini, bainama hansi, nubwo abasaija babakagwize bati: “Nimuserurra ki omwomeezi omu bafu? Hanu taroho, ahumbuukire. 6#Mat 16:21; 17:22,23; 20:18,19; Mar 8:31; 9:31; 10:33,34; Luk 9:22; 18:31-33.Mwijuke eki yabagambiire akyali omu Galiraaya ati: 7‘Omwana w'omuntu ali w'okuheebwayo omu mikono y'abasiisi, abambwe ha musaraba, baitu ha kiro kya kasatu ahumbuuke.’ ”

8Nubwo abakazi baijukire ebigambo bye; 9baaruga ha kituuro, baagaruka omu rubuga. Ebi byona baabigambira bali ikumi n'omu n'abandi boona. 10Abakazi abo nubo Mariya Magadaleena, Yohanani, hamu na Mariya nyina Yakobbo. Bbo, hamu n'abakazi abandi abakaba bali nabo, ebi byona baabigambira abakwenda. 11Baitu abakwenda batabiikirize, bikabazookera nk'orugambo orutarukugasa. 12Nubwo Petero yaimukire, yagenda yahika ha kituuro nairuka. Obu yainamire alingwizemu, atarole kindi kwihaho engoye zonka. Yagaruka owaabu ahuniriire habw'ebi ebyabaireho.

Yesu naabonekera abakaba nibagenda Emmausi

(Mar 16:12-13)

13Ha kiro eki kyonyini, babiri omulibo bakaba nibagenda omu kyaro ekirukwetwa Emmausi, kikaba kiri nka kilomita ikumi n'emu okuruga Yerusaalemu. 14Bakaba nibabazaaho ebi byona ebyabaireho. 15Obu bakaba nibakyabibazaaho nibakaguzangana, Yesu wenka yabahikaho, yatandika kugenda nabo; 16baitu amaiso gaabo gaaswekererwa, tibaamumanyirra.

17Yesu yabakaguza ati: “Bigambo ki ebi murukugenda nimubazaaho?” Baayemerra baina amaiso g'obujune. 18Omu halibo, ibara lye Kileyopa, yamugarukamu ati: “Niiwe mugenyi wenka hali abo abaizire Yerusaalemu, atarukumanya bigambo byona ebibaireho biro binu?” 19Nandiki Yesu ati: “Bigambo ki ebi?” Baamugarukamu bati: “Ebyabaireho Yesu owa Nazareeti, ow'akaba ali murangi w'amaani omu bikorwa n'omu bigambo omumaiso ga Ruhanga n'omumaiso g'abantu. 20Baanyakatagara baitu abakuru n'abalemi nkooku baamuhaireyo kucwerwa omusango gw'okufa, baamubamba ha musaraba. 21Baitu itwe tukaba nitunihira ngu, nuwe akaba ali w'okucungura ihanga lya Isirairi. Okwongera hali ebi, kiro kinu nkyo kya kasatu kuruga obu byabaireho. 22Kandi hati abakazi abamu ab'omu kitebe kyaitu batuhunirizireege. Bazindukiire ha kituuro omu rukyakya, 23omutumbi gwe tibagusangireyo; baitu bagarukire nibagamba ngu, babonekiirwe bamalaika ababagambiire nkooku ayomiire. 24Bagenzi baitu abamu bagenzirege ha kituuro, kandi baasanga biri nkooku abakazi bagambire, baitu uwe tibamurozire.”

25Nubwo Yesu yabagambiire ati: “Ha! Badoma inywe, abatarukurahuka kwikiriza byona abarangi ebi baagambire! 26Kikaba kitarukwetaagwa Kristo okubonabonesibwa omuli ebi byona, nukwo ataahe omu kitiinisa kye?” 27Yesu yabandiza ha bya Musa n'abarangi naabasoborra ebyamugambirweho omu Byahandiikirwe.

28Obu baahikire haihi n'ekyaro nambere bakaba nibagenda, Yesu yasisana nk'arukuhinguraho; 29baitu baamwesengereza bati: “Ikara na itwe, obwire buhoireyo kandi izooba liri haihi kugwa.” Nubwo yataaha omunju kwikara nabo. 30Obu akaba aikaliire nabo ha byokulya, yakwata omugaati, yasiima Ruhanga, yagucwamu, yagubaha. 31Aho amaiso gaabo gaiguka, baamumanyirra; baitu uwe yababuraho. 32Baagambirangana bati: “Obu abaire naabaza na itwe omu muhanda naatusoborra Ebyahandiikirwe, emitima yaitu teyakirege omurro?”

33Omu kasumi ako konyini baimuka, baagaruka Yerusaalemu; baasangayo ikumi n'omu beesoroize hamu n'ab'oruganda. 34Baabahurra nibagamba bati: “Mazimakwo MUKAMA ahumbuukire, kandi abonekiire Simooni!” 35Nubwo n'ababiri baabasoboroire ebyabaireho omu muhanda, kandi nkooku baamumanyiriire obu yacwire omugaati.

Yesu naabonekera abeegesebwa be

(Mat 28:16-20; Mar 16:14-18; Yoh 20:19-23)

36Obu bakaba nibakyabaza ebi, Yesu wonyini yabeemerra hagati, yabaramukya ati: “Obusinge bube hali inywe.” 37Baayekanga, baatiina nibateekereza ngu barozire omuzimu. 38Baitu uwe yabagambira ati: “Nimutuntuzibwa ki? Nimwekaguliza ki omu mitima yanyu? 39Murole engaro zange n'ebigere byange; ninyowe kwo. Munkwateho murole, habwokuba omuzimu tigugira amagufa n'enyama, nk'ebi murukurora nyinabyo.” 40Obu yamazire kugamba ebi, yabooleka engaro ze n'ebigere bye. 41Obu bakaba bakyalemerwe kwikiriza habw'okuhinirra na habw'omuhimbo, nubwo yabakagwize ati: “Hanu mwinaho ekyokulya?” 42Baamuha ekicweka ky'encu etalikire, 43yagikwata, yagirya bamuroleriire.

Yesu naaraga abakwenda be

44Nubwo yabagambiire ati: “Binu nibyo bigambo ebi nabagambiire nkyali na inywe ngu, byona ebyampandiikirweho omu Biragiro bya Musa, n'omu Bihandiiko by'abarangi, n'omu Zabbuli biri by'okuhikirizibwa.” 45Nubwo yasuukwire amagezi gaabo beetegereze Ebyahandiikirwe. 46Yabagambira ati: “Kinu nikyo ekyahandiikirwe ngu, Kristo naasemerra kubonabonesibwa, nukwo ha kiro kya kasatu ahumbuuke omu bafu; 47kandi ngu, omu ibara lye okwegarukamu n'okuganyirwa ebibi birangirirwe omu mahanga goona, okubandiza Yerusaalemu. 48Niinywe muli bakaiso b'ebigambo ebi. 49#Ebik 1:4.Kandi ninyija kubatwekera Taata eki yaraganiize. Baitu mwikale omu rubuga okuhika obu muliheebwa amaani agarukuruga omwiguru.”

Yesu naatwarwa omwiguru

(Mar 16:19-20; Ebik 1:9-11)

50 # Ebik 1:9-11. Nubwo Yesu yabeebembiire, yabahikya haihi na Betaniya. Yaimukya emikono ye, yabaha omugisa. 51#Sir 50:20.Obu akaba naakyagubaha, yabarugaho, yatwarwa omwiguru. 52Baamuramya, hanyuma baagaruka Yerusaalemu baijwire okusemererwa kwingi; 53kandi baikara nibaija omunju ya Ruhanga nibamukugiza.

Currently Selected:

Luk 24: BRR2008

Highlight

Copy