Luk 1
1
Ebirukwebembera
1Omugonzibwa Teyofilo: Abantu baingi bakakora ebi barukusobora okuhandiika ebintu ebyabaireho omuli itwe. 2Bakahandiika ebi twagambiirwe abo abaabirozire kuruga ha kubanza, nubo abo abaatumirwe kubitugambira. 3Na nyowe obu namazire kubyetegereza kurungi okuruga ha byabandiize, nkasiima okubikuhandiikira mbikurataniize. 4Kinu nkikozire nukwo omanye amazima g'ebintu ebi byona ebi wayegesiibwe.
Okuzaarwa kwa Yohaana Omubatiza nikurangwa
5 #
1 Byok 24:10. Omu kasumi ka Herode, omukama wa Bayudaaya, hakaba haroho nyakatagara, ibara lye Zakaliya, ow'omu kihanda ky'abanyakatagara ekya Abiya. Akaba aswire omukazi ow'omu baijukuru ba Arooni, ibara lye Elizabbeti. 6Bombi bakaba bali bahikiriire omumaiso ga Ruhanga bataina eki barukujunaanwa, nibahikiriza kurungi Ebiragiro bya MUKAMA n'emirwa ei yataireho. 7Bakaba bataina mwana, habwokuba Elizabbeti akaba ali ngumba, kandi bombi bakaba bakuzire muno.
8Kiro kimu Zakaliya akaba naakora omulimo gwe ogw'obunyakatagara omumaiso ga Ruhanga, ab'ekihanda kye obu bakaba bali b'okukora omulimo ogu. 9Engeso y'abanyakatagara nkooku ekaba eri, nuwe akaba akomerwe akaruuru kutaaha omunju ya Ruhanga kwotera omugaju. 10Omu kasumi ak'okwotera omugaju, ekitebe kyona eky'abantu kikaba kiri aheeru nibasaba Ruhanga. 11Malaika wa Mukama yamubonekera, ayemeriire ha rubaju rw'obulyo rw'ekiswa nambere baayoterraga omugaju. 12Zakaliya obu yamurozire yayekanga, yatiina muno. 13Baitu malaika yamugambira ati: “Zakaliya, leka kutiina. Okusaba kwawe Ruhanga akuhuliire; mukazi waawe Elizabbeti alikuzarra omwana w'obwojo, olimuruka ibara lye Yohaana.
14Mulikyanganuka muno kandi mulisemererwa,
n'abandi baingi balisemererwa habw'okuzaarwa kwe;
15 #
Kubar 6:3. habwokuba aliba mukuru omumaiso ga MUKAMA.
Talinywa marwa noobu kyakuba ekitamiiza kyona.
Alizaarwa aijwire Mwoyo Ahikiriire.
16Aligarra Abaisirairi baingi hali MUKAMA Ruhanga wabo;
17 #
Mara 4:5,6; Sir 48:10,11. alimwebembera aina amaani n'obusobozi nk'obwa
Eriya, aligarra emitima y'abazaire ha baana baabo,
aligarra abeereme omumuhanda gw'abahikiriire,
nukwo ateekanirize MUKAMA abantu abamusemeriire.”
18Nubwo Zakaliya yakagwize malaika ati: “Kinu nsobora nta kukinanukira? Nyowe ngurusire, na mukazi wange akaikwire.” 19#Dan 8:16; 9:21; Tob 12:15.Malaika yamugarukamu ati: “Ninyowe Gabulyeri anyakwemerra omumaiso ga Ruhanga. Ntumirwe kubaza na iwe n'okukumanyisa amakuru ganu amarungi. 20Hurra nu, habw'okutaikiriza obukwenda bwange obulihikirra omu kasumi kabwo, oraafa omunwa, oikale otarukubaza okuhika ha kiro ebi byona obu birihikirra.”
21Omu kasumi ako abantu bakaba bategeriize Zakaliya nibahunirra kandi nibeekaguza ekimukereriize omunju ya Ruhanga. 22Obu yaturukire aheeru atasobole kubaza nabo, nubwo baamanya nkooku abonekiirwe omunju egi; kandi uwe habw'okulemwa kugamba, akabeesa engaro. 23Obusumi bwe obw'okuheereza obu bwahoire, yagaruka omuka ye.
24Obu haahingwireho ebiro, mukazi we Elizabbeti yatwara enda, kandi yayesereka omunju kumara ameezi ataano, naagamba ati: 25“MUKAMA nukwo ankozire ati, obu yasiimire kunyihaho ensoni omu bantu.”
Okuzaarwa kwa Yesu nikurangwa
26Elizabbeti obu akaba aina enda y'ameezi mukaaga, nubwo Ruhanga yatumire malaika Gabulyeri omu rubuga rwa Galiraaya orwetwa Nazareeti, 27#Mat 1:18.hali omwisiki empikirre, ow'akaba ajumbiirwe omusaija, ibara lye Yosefu, ow'omu ruganda rwa Daudi; ibara ly'omwisiki ogu nuwe Mariya. 28Malaika akaija nambere ali yamuramukya ati: “Mirembe, iwe aijwire emigisa, MUKAMA ali na iwe!” 29Mariya, ebigambo ebi bikamukanga muno, nukwo kwekaguza amakuru g'okuramukya oku. 30Nubwo malaika yamugambiire ati: “Mariya, leka kutiina, habwokuba Ruhanga akusiimire. 31#Mat 1:21.Hati noija kutwara enda, olizaara omwana w'obwojo, olimuruka ibara lye Yesu.
32 #
2 Sam 7:12,13,16; Is 9:7. Aliba mukuru kandi alyetwa Omwana w'Anyakuli haiguru muno;
MUKAMA Ruhanga alimwikaliza ha kitebe kya isenkuru Daudi,
33kandi alirema abaijukuru ba Yakobbo ebiro byona,
n'obukama bwe tibulihwaho.” 34Baitu Mariya yakaguza malaika ati: “Eki kisoboka kita? Nyowe kantamanyire musaija.” 35Malaika yamugarukamu ati:
“Mwoyo Ahikiriire alikwizira,
kandi n'amaani g'Ogu Anyakuli haiguru muno galikuswekerra.
Omwana ow'alizaarwa nikyo alyeterwa ahikiriire,
kandi Omwana wa Ruhanga. 36Dora, mwenekati wanyu #1:36 Bunyoro bagamba nyakanyu Elizabbeti, ou baayeetaga ngumba, hati aina enda y'ameezi mukaaga, kandi kunu mukaikuru; 37#Kub 18:14.habwokuba busaho ekirema Ruhanga.” 38Nubwo Mariya yagambire ati: “Nyowe ndi hanu, omuzaana wa MUKAMA; kinkolerwe nkooku ogambire.” Aho malaika yamuburaho.
Mariya naabungira Elizabbeti
39Omu biro ebi Mariya akaimukya, yagenda bwango omunsi y'ensozi, omu kyaro kya Buyudaaya. 40Yataaha omunju ya Zakaliya, yaramukya Elizabbeti. 41Kandi Elizabbeti obu yahuliire okuramukya kwa Mariya, omwana yazaana omu ndi ye. Elizabbeti yaijura Mwoyo Ahikiriire, 42#Yudi 13:18.nukwo kugamba n'iraka likooto ati: “Oli w'omugisa omu bakazi boona! N'omwana omunda yawe aina omugisa! 43Kyandugira nkaha nyowe kubungirwa nyina MUKAMA wange? 44Habwokuba obu mpuliire okuramukya kwawe, omwana yazaana omunda yange habw'omuhimbo. 45W'omugisa onu ayaikiriize ekigambo kya MUKAMA nkooku kirihikirra hali uwe!”
Ekizina kya Mariya
46Mariya yagamba ati:
“Omutima gwange nigukugiza MUKAMA,
47n'omwoyo gwange nigusemerererwa Ruhanga Omujuni wange,
48 #
1 Sam 1:11. habwokuba arozire okwebundaaza kw'omuzaana we!
Dora, okuruga hati abantu ab'obusinge bwona baraanyetaga w'omugisa;
49habwokuba Omusobozi wa byona akankorra ebikuru, n'ibara lye niryera.
50Obusinge n'obusinge agirra embabazi boona abamutiina.
51Omukono gwe akagukozesa eby'amaani,
ararangize ab'emyehembo omu biteekerezo by'emitima yabo,
52 #
Yob 5:11; 12:19; Sir 10:14. abingire ab'obusobozi ha bitebe byabo, yanyumiza abaculeezi;
53abajara abaigusize ebirungi, abaguuda ababingire ngaro nsa.
54Akonyiire Isirairi omwiru we, obu yaijukire kwoleka embabazi ze
55 #
Kub 17:7. #
1 Sam 2:1-10. nkooku yaraganiize Abburahamu na baijukuru be ebiro byona.” 56Mariya akamara omwa Elizabbeti ameezi nk'asatu, hanyuma yagarukayo owaabu.
Okuzaarwa kwa Yohaana Omubatiza
57Akasumi k'Elizabbeti ak'okuzaara kaahika, yazaara omwana w'obwojo. 58Abataahi na beene baabo obu baahuliire nkooku MUKAMA yamugiriire embabazi, boona baasemererwa hamu nawe. 59#Lev 12:3.Omwana obu yahikize ebiro munaana, baija kumusara; bakaba nibagaonza kumuruka Zakaliya, nk'ibara lya ise; 60baitu nyina yabagambira ati: “Nangwa, naija kurukwa Yohaana.” 61Baamugarukamu bati: “Omu beene banyu busamu n'omu arukwetwa ibara eri.”
62Baakozesa oburorwaho kukaguza Zakaliya abamanyise ibara eri arukwenda kuruka omwana. 63Uwe yasaba eky'okuhandiikaho; yahandiika ati: “Ibara lye nuwe Yohaana.” Boona baahunirra. 64Ahonaaho akanwa ke kaiguka n'orulimi rwe rwabohorroka, yatandika kubaza naakugiza Ruhanga. 65Abataahi boona baatiina. Amakuru ago gaararanga omu nsi yoona ey'ensozi eya Buyudaaya. 66Boona abaagahuliire baagata ha mutima nibeekaguza bati: “Mara omwana ogu aliba ata?” Habwokuba omukono gwa MUKAMA gukaba gumuroho.
Ekizina kya Zakaliya
67Zakaliya ise, akaijura Mwoyo Ahikiriire yaranga ati:
68“Akugizibwe MUKAMA Ruhanga wa Isirairi;
habwokuba aizire kucungura abantu be.
69Atwimukiize omujuni ow'obusobozi, omu ruganda rwa Daudi omwiru we,
70nkooku yagambiire omu barangi be abarukwera okuruga ira lyona:
71kutujuna abanyazigwa baitu, n'okutwiha omu mikono y'abo boona abarukutunoba.
72Nukwo ayoleke embabazi ezi yaraganiize baisenkuruitwe, naijuka ekiragaano kye ekirukwera,
73nikyo ekirahiro eki yarahiire isenkuru-itwe Abburahamu ngu,
74obu tulikajunwa omu mikono y'abanyanzigwa baitu, tumuheerezeege tutarukutiina,
75nitwera kandi tuhikiriire omumaiso ge ebiro byaitu byona.
76 #
Mara 3:1. Na iwe mwana, olyetwa murangi w'Ogu Anyakuli haiguru muno;
habwokuba olyebembera MUKAMA okuteekaniza emihanda ye,
77n'okumanyisa abantu be okujunwa oku batunga okubaganyiza ebibi byabo.
78Kandi habw'embabazi nyingi eza MUKAMA waitu,
emamba enyakuruga omwiguru, obu erisara habwaitu,
79 #
Is 9:2. erimulikira abo abaikara omu mwirima n'omu kiituuru ky'okufa,
kandi eriteerekereza ebigere byaitu omu muhanda gw'obusinge.”
80Omwana akakura, yaba w'amaani omu mutima, kandi akaikara omu irungu okuhika obu yayeyolekiire Abaisirairi.
Currently Selected:
Luk 1: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
