Yoh 20
20
Abeegesebwa nibasanga ekituuro ekitarumu muntu
(Mat 28:1-8; Mar 16:1-8; Luk 24:1-12)
1Ha kiro ky'okubanza omu wiiki #20:1 Nikyo ekiro eki tweta Sande. Mariya Magadaleena akaija ha kituuro nyenkya kara, obwire butakakiire. Yasanga ibaale liihirwe ha munwa gw'ekituuro. 2Nukwo kwiruka yagenda hali Simooni Petero n'omwegesebwa oli, Yesu ou yagonzaaga. Yabagambira ati: “MUKAMA, omukituuro bamwihiremu, kandi titurukumanya nambere bamutaire.” 3Aho Petero n'omwegesebwa oli baaturuka, baagenda ha kituuro. 4Bombi bairuka, baitu omwegesebwa oli yasiga Petero, yamubanza ha kituuro. 5Obu yainamire kulinguzaamu, yarora engoye eza bafuta zitairwe aho, baitu uwe atataahemu. 6Nubwo Simooni Petero yaija amuhondiire, yataaha omu kituuro, yarora engoye eza bafuta zitairwe aho, 7n'ekitambaara ekikaba kiri ha mutwe gwe kitali hamu n'engoye eza bafuta; baitu kikubirwe, kitairwe ha wakyo kyonka. 8Nubwo omwegesebwa oli, ayabandize kuhika ha kituuro, nawe yataahamu, yarora, yaikiriza. 9Obusumi obu bwona, bakaba batakeetegeriize ekyahandiikirwe ekirukugamba ngu, kimuhikiriire kuhumbuuka omu bafu. 10Hanyuma abeegesebwa abo baagarukayo owaabubo.
Yesu naabonekera Mariya Magadaleena
(Mat 28:9-10; Mar 16:9-11)
11Baitu Mariya yasigara ayemeriire aheeru y'ekituuro, narra. Nubwo yainamire kulinguza omu kituuro, 12yarora bamalaika babiri bajwaire ebirukwera, baikaliire nambere omutumbi gwa Yesu gukaba gutairwe, omu ha musego, ondi ha mirambi. 13Nukwo bbo kumukaguza bati: “Mukazi iwe, noolizibwa ki?” Yabagarukamu ati; “Habwokuba MUKAMA wange bamutwaire, kandi tindukumanya nambere bamutaire.” 14Obu yagambire eki yahinduka, yarora Yesu ayemeriire aho, baitu atamanye nkooku ali nuwe. 15Nukwo Yesu kumukaguza ati: “Mukazi iwe, noolizibwa ki? Nooserra oha?” Kandi Mariya habw'okugira ngu nuwe omulimi w'orugonjo oru, yamugarukamu ati: “Waitu, obu araaba ali niiwe omutwaire, ngambira nambere omutaire, ngende mmwiheyo.” 16Nubwo Yesu yamwesire ati: “Mariya.” Uwe yakubuutuka, yamwetebuka omu Ruhebburaayo ati: “Rabboni!” (amakuru gaakyo: Mwegesa). 17Yesu yamugambira ati: “Otankwataho, habwokuba tinkatembere hali Isenyowe, baitu genda hali bagenzi bange obagambire oti: nintemba hali Isenyowe kandi Isiinywe, hali Ruhanga wange kandi Ruhanga wanyu.” 18Mariya Magadeleena yagenda, yagambira abeegesebwa ati: “Ndozire MUKAMA waitu”; kandi yabamanyisa ebigambo ebi yamuragiire.
Yesu naabonekera abeegesebwa be
(Mat 28:16-20; Mar 16:14-18; Luk 24:36-49)
19Ha kiro eki omu kairirizi, ekiro eky'okubanza omu wiiki, abeegesebwa bakaba beekingiire omu nju habw'okutiina Abayudaaya. Yesu akaija yabeemerra hagati, yabaramukya ati: “Obusinge bube na inywe.” 20Obu yamazire kugamba eki, yabooleka ebiganja bye n'orubaju rwe. Aho abeegesebwa baasemererwa habw'okurora MUKAMA. 21Yesu yayongera yagamba ati: “Obusinge bube na inywe, Isenyowe nkooku yantumire na nyowe nukwo ndukubatuma.” 22Obu yamazire kugamba eki, yabaikiza orwoya, nabagambira ati: “Mutunge Mwoyo Ahikiriire. 23#Mat 16:19; 18:18.Aba muliganyira ebibi biribaganyirwa; kandi aba mutaliganyira ebibi, tibiribaganyirwa.”
24Baitu Tomasi, arukwetwa Omurongo, omu ha ikumi na babiri, akaba atali nabo Yesu obu yaizire. 25Nukwo abeegesebwa abandi kumugambira bati: “Turozire MUKAMA.” Uwe yabagarukamu ati: “Obu ntaarole bihuta by'emisumaali omu biganja bye nkabitamu orukumu rwange, ntakakwasire n'engaro zange omu rubaju rwe, tindukwija kwikiriza.”
Naababonekera na Tomasi aroho
26Obu haahingwireho ebiro munaana, abeegesebwa be nabwo bakaba bali omunju, na Tomasi abarumu. Enyigi zikaba zikingirwe, baitu Yesu yaija yabeemerra hagati, yabaramukya ati: “Obusinge bube na inywe”. 27Nubwo yagambiire Tomasi ati: “Taahya hanu orukumu rwawe, kandi rora ebiganja byange; leeta engaro yawe ogite omu rubaju rwange; leka kuhakana, baitu ikiriza.” 28Tomasi yamugarukamu ati: “MUKAMA wange kandi Ruhanga wange!” 29Nandiki Yesu ati: “Waikiriza habw'okundora? Baina omugisa abaikiriza bataina eki baarozire.”
Eky'okumalirra
30Haroho n'ebikorwa ebindi bingi Yesu ebi yakoliire omu maiso g'abeegesebwa be, ebitarahandiikirwe omu kitabu kinu; 31baitu binu bikahandiikwa nukwo mwikirize Yesu nkooku ali Kristo, Omwana wa Ruhanga; kandi habw'okwikiriza oku, mutunge obwomeezi omuli Uwe.
Currently Selected:
Yoh 20: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
