Kub 9

Ruhanga naaragaana endagaano na Noha

1 # Kub 1:28. Kandi Ruhanga yaha Noha n'abaana be omugisa naagamba ati: “Muzaale, mukanye, mwijuze ensi. 2Enyamaiswa zoona ez'omunsi, ebinyonyi byona eby'omu mwanya, buli kintu kyona ekinyakwekururra ha itaka, n'encu zoona ez'omu nyanja, biraabatiinaga kandi biraabeekengaga; mubiremege. 3Ekintu kyona ekyomeezi kandi ekinyakugenda, murakiryaga; nkooku nabahaire ebimera kubirya, nukwo ndukubaha binu byona. 4#Lev 7:26,27; 17:10-14; 19:26; Bir 12:16,23; 15:23.Kyonka, mutalirya enyama ey'ekisoro ekitasazirwe, ekikamiirwemu esagama. 5Mazima kwo esagama y'omuntu ndigijunaana, ndibajunaana esagama y'ekisoro ei mwaliiraine omu nyama yakyo, ndijunaana omuntu ha bw'esagama y'omuntu mutaahi we rundi ey'ekisoro ei mwaliiraine omu nyama yakyo. 6#Kurug 20:13; Kub 1:26.Weena anyakuseesa esagama y'omuntu, n'eyeeriseeswa omuntu ondi; habwokuba Ruhanga akahanga omuntu omu kisisani kye. 7#Kub 1:28.Baitu inywe, muzaale mukanye, mwijuze ensi kandi mugireme.”

8Nubwo Ruhanga yagambiire Noha na batabani be ati: 9“Hati naragaana endagaano na inywe kandi na baijukuru baanyu eribakwataho, 10kandi nagiragaana na buli kihangwa kyona eki munyina kyo, ebinyonyi, ente n'ebisoro byona eby'omunsi ebi munyina byo, ebintu byona ebyarugire omu lyato. 11Ningumya endagaano yange na inywe erukugamba ngu ebintu byona ebyomeezi, tibirigaruka kuhwerekerezibwa okusandaara kw'amaizi, kandi tihaligaruka kubaho kusandaara kw'amaizi kuhwerekereza ensi.” 12Ruhanga yagamba ati: “Kanu nuko kokurorraho ak'endagaano ei ndukuragaana na inywe na buli kyomeezi kyona eki munyina kyo, kandi kaliba k'abantu akasumi ak'omumaiso. 13Nata omu bicu omuhangaizima gwange, guraabaga kokurorraho ak'endagaano ei ndagaine na inywe. 14Obu ndaaleetaga ebicu haiguru, kandi omuhangaizima gukazooka omu bicu, 15ndaijukaga endagaano ei ndagaine na inywe n'ebyomeezi byona; amaizi tigaligaruka kusandaara kuhwerekereza inywe n'ebyomeezi byona. 16Omuhangaizima obu gurazookaga omu bicu, ndaaguroraga nyijuke endagaano ey'ebiro n'ebiro ei naragaine n'ebyomeezi byona, ebinyakuli omunsi.” 17Ruhanga yayongera yagambira Noha ati: “Kanu nuko kokurorraho ak'endagaano ei ndagaine na iwe n'ebihangwa byona ebiri omunsi.”

18Batabani ba Noha abaarugire omu lyaato nubo: Seemu, Haamu na Yafeesi. Haamu, nuwe yazaire Kanaani. 19Omu batabani ba Noha abo basatu, nuho haarugire abantu boona abali omunsi.

20Noha nuwe yabandize kulima itaka, akabyara orugonjo rw'emizabbibbu; 21yanywa eviini yatamiira, yabyama omu heema ye ali busa. 22Haamu ise Kanaani obu yarozire ise nkooku ali busa, yamanyisa bagenzi be ababiri abakaba bali aheeru. 23Nubwo Seemu na Yafeesi bakwasire ekyokujwara, bakyeta ha mabega, baagenda kinyumanyuma, baasweka ise bo; tibaamurora njuuro. 24Noha eviini obu yamurugireho, yamanya mutabani we omuto eki yamukozire, 25yamukyeena naagamba ati: “Kanaani naakafe kubi, araabaga mwiru w'abairu hali bagenzi be.” 26Yayongera yagamba ati: “MUKAMA Ruhanga wange ahe Seemu omugisa; Kanaani abege mwiru we. 27Ruhanga akanyise Yafeesi, aikalege omu heema za Seemu; Kanaani abege mwiru we.” 28Kuruga ha kusandaara kw'amaizi, Noha akongera yayomeera emyaka endi bikumi bisatu n'ataano. 29Emyaka yona Noha ei yayomiire ekahika rwenda n'ataano; yafa.

Currently Selected:

Kub 9: BRR2008

Highlight

Copy