Ebik 2

Okwija kwa Mwoyo Ahikiriire

1 # Lev 23:15-21; Bir 16:9-11. Ekiro kya Pentikooti obu kyahikire, boona bakaba beesoroliize omu kiikaro kimu. 2Ahonaaho okuhirra kukaruga omu iguru, kwaija nk'ekiyaga ky'amaani, kwaijuliza kimu enju nambere bakaba baikaliire. 3Haazooka endimi nk'ez'omurro, zayebaganiizemu, nizaakira ha mutwe gwa buli omu omuli bo. 4Boona baijura Mwoyo Ahikiriire, baatandika kubaza endimi ezindi, nkooku Mwoyo yabahaire kuzibaza.

5Kasumi ako, omu Yerusaalemu, hakaba harumu Abayudaaya, abantu abeekambiire ediini, abakaba barugire omu mahanga goona agali omu nsi. 6Ekitebe ky'abantu obu kyahuliire okuhirra oku, baayesorooleza hamu nibatangaara, habwokuba buli muntu akahurra abakwenda nibabaza omu rulimi rw'owaabu. 7Boona baahunirra kandi baatangaara, nibeekaguza bati; “Banu boona abarukubaza tibali Bagaliraaya? 8Hati kinu kiri kita, buli omu omuli itwe kubahurra nibabaza orulimi rw'owaitu nambere twazaalirwe? 9Omuli itwe haroho Abapaati, Abameedi n'Abeeramiiti, hamu n'abantu abaikara Mesopotamiya, Buyudaaya na Kapadokiya, Ponto na Asiya, 10Firigiya na Panfiliya, Misiri n'ebicweka bya Libbiya haihi na Kirene. Otaireho n'abagenyi abaarugire Rooma, nubo Abayudaaya n'abandi abahindukire bataaha omu diini y'Ekiyudaaya, 11Abakureete n'Abaharabu. Itwena nitubahurra nibabaza omu ndimi zaitu ebikuru Ruhanga ebi yakozire.” 12Boona baahunirra kandi baasoberwa, nukwo kukaguzangana bati: “Mara kinu nikimanyisa ki?” 13Baitu abandi baasekereza abakwenda nibagamba bati: “Batamiire amarwa g'omutararra.”

Petero naabasoborra ebikaba byaruga kubaho

14Nubwo Petero yayemeriire hamu na ikumi n'omu, yabaliza haiguru naagamba ati: “Inywe bantu ba Buyudaaya, na boona abaikara Yerusaalemu, kinu mukyetegereze kandi mutege amatu kuhurra eki ndukwija kubagambira. 15Abasaija banu tibatamiire, nkooku murukuteekereza; habwokuba hati saaha isatu za nyenkya. 16Baitu kinu nikyo ekyarangirwe omurangi Yoweri ati:

17 # Yow 2:28-32. ‘Omu biro bya ha mpero

abantu boona ndibaseesaho Mwoyo wange.’

Nukwo Ruhanga arukugamba.

‘Batabani banyu na bahara banyu baliranga ebya

Ruhanga, abasigazi banyu balibonekerwa,

n'abagurusi banyu baliroota ebirooto.

18Ego, kandi omu biro ebi ndiseesa Mwoyo wange

ha bairu bange na ha bazaana bange; nabo baliranga.

19Ndyoleka ebyamahano omwiguru n'ebihuniriza omunsi:

esagama, omurro, n'okucuuka kw'omwika.

20Izooba liriraara n'okwezi kulinanata nk'esagama,

ekiro kya MUKAMA kitakahikire,

ekiro kikuru kandi ky'ekitiinisa kitakabaireho.

21Kandi omuntu weena alyamirra ibara lya MUKAMA nubwo alijunwa.’

22“Inywe basaija ba Isirairi, muhurre eki ndukwija kubagambira: Yesu owa Nazareeti, omuntu Ruhanga ou yabamanyisize n'eby'amaani, n'ebyamahano, n'ebihuniriza ebi yamukoleze hagati yanyu, inywena nkooku murukumanya 23#Mat 27:35; Mar 15:24; Luk 23:33; Yoh 19:18.Yesu ogu obu yamazire kuheebwayo, entegeka ya Ruhanga nkooku ekaba eri kara koona ebintu binu bitakabaireho, mukamubamba ha musaraba, mwamwisa emikono y'abantu abatalemwa Biragiro byaitu. 24#Mat 28:5,6; Mar 16:6; Luk 24:5.Baitu Ruhanga akamuhumbuura, yamwiha omu busaalizi bw'orufu, habwokuba kikaba kitarukusoboka uwe kwikara omumaino garwo. 25#Zab 16:8-11.Kandi Daudi akamugambaho ati:

‘Obutoosa nyikaza Atahwaho mu maiso gange,

habwokuba andi haihi

na nyowe tinditengesebwa.

26Nikyo omutima gwange gurukusemerererwa,

nimbaza ebigambo by'omuhimbo

kandi obu nkyali mwomeezi ndaikaraga nimwesiga.

27Habwokuba tolindekera nkagenda Okuzimu,

toliikiriza Enganzi yawe kujunda.

28Ondagirra omuhanda gw'okumpikya ha kujunwa;

okwikara omumaiso gaawe kulinyijuza okusemererwa kwona.’

29“Bagenzi bange, busaho kugurukyagurukya: isenkuru itwe Daudi nawe akafa, yaziikwa, n'okuhika hati ekituuro kye kiri owaitu hanu. 30#Zab 132:11; 2 Sam 7:12,13.Habw'okusangwa ali murangi, na habw'okumanya Ruhanga nkooku yamurahiire ati: Omu ha baijukuru be alimwikaliza ha kitebe ky'obukama bwe, 31Daudi akamanya kara kandi yabaza ha kuhumbuuka kwa Kristo, nkooku atarasingirwe Kuzimu, kandi n'omubiri gwe nkooku gutarajunzire. 32Yesu ogu, Ruhanga akamuhumbuura; kandi eki itwena nitukijurra. 33Obu yamazire kunyumizibwa ali ha mukono gw'obulyo gwa Ruhanga kandi amazire kuheebwa Mwoyo Ahikiriire, Ise ou yamuraganiize, nuwe akozire ekihuniriza kinu eki murukurora kandi eki murukuhurra. 34#Zab 110:1.Mazimakwo Daudi atatembe omu iguru; baitu nuwe ayagambire ati:

‘Atahwaho akangambira MUKAMA wange ati:

Ikarra ha mukono gwange ogw'obulyo,

35okuhika abanyanzigwa baawe obu ndibafoora akatebe

ak'ebigere byawe.’

36“Ab'enju ya Isirairi boona leka bamanyire kimu Yesu ou mwabambire ha musaraba nkooku Ruhanga yamuhindwire, yamufoora MUKAMA kandi Kristo.”

Abantu enkumi isatu nibahinduka

37Abantu obu baahuliire ebi, omutima gwabasarra, baakaguza Petero n'abakwenda abandi bati; “Bagenzi baitu, turaakora ki?” 38Petero yabagarukamu ati; “Mwegarukemu. Buli omu omuli inywe abatizibwe omu ibara lya Yesu Kristo, nukwo muganyirwe ebibi byanyu. Kandi muliheebwa ekisembo kya Ruhanga, nuwe Mwoyo Ahikiriire. 39Habwokuba okuraganizibwa oku: kwanyu, n'okw'abaana banyu, kandi kw'abandi boona abakyali, boona MUKAMA Ruhanga aba araayetaga.” 40Petero akabasoborra n'ebindi bingi naabateererra ati: “Mwejune, muruge omu bantu b'obusinge bunu obuhabire.” 41Abo abaikiriize ebigambo bye bakabatizibwa. Ha kiro eki, ha muhendo gw'abaikiriza hakongerwaho abantu nk'enkumi isatu.

Enyikara y'abaikiriza ab'okubanza

42Abaikiriza abo boona bakaikara nibeekambira enyegesa z'abakwenda, nibateerana nabo omu kucwa omugaati n'omu kusaba. 43Abantu boona bakatiina habw'ebyamahano bingi n'ebihuniriza ebyakozirwe abakwenda. 44#Ebik 4:32-35.Abaikiriize boona baikaraga hamu, kandi n'ebintu byabo byona baabibaganaga hamu. 45Baatundaga ebintu byabo hamu n'itungo lyabo. Ebyarugamuga babibagana, baha buli muntu nkooku yayetaagaga. 46Buli kiro baayesoroolezaaga omunju ya Ruhanga kandi baateeraniraga mu maka gaabo kucwamu omugaati. Baalyaaga ebyokulya byabo n'okusemererwa, baina omutima murungi, 47nibakugiza Ruhanga kandi nibasiimwa abantu boona. Buli kiro MUKAMA yayongerahoga omuhendo gw'abo abarukujunwa.

Currently Selected:

Ebik 2: BRR2008

Highlight

Copy