3Yoh 1
1
Okuramukya
1 #
Ebik 19:29; Bar 16:23; 1Kor 1:14. Nyowe omukuru, ninkuhandiikira iwe Gaayo, enganzi yange, ou ngonza omu mazima.
2Omugonzibwa, ninsaba byona bikugendere kurungi, kandi obe mwomeezi omu mubiri nkooku oli kurungi omu mwoyo. 3Nkasemererwa muno abamu ha bagenzi baitu obu baizire bammanyisa nkooku orukwekambira amazima kandi noogahondera kwo. 4Busaho ekisobora kundeetera omuhimbo okukira kuhurra abaana bange nkooku barukuhondera amazima.
Yohaana naamusiima habw'obwenda
5Omugonzibwa, obu okoonyera ab'oruganda, munomuno abagenyi abatamanyirwe, obu nookora ekintu eky'obwesigwa. 6Kandi abo nubo abaamanyisize ekitebe kyona ky'abaikiriza ha ngonzi zawe. Kyakubaire kirungi kwongera kubaboherra omu rugendo rwabo omu mulingo ogusiimwa Ruhanga ou oheereza. 7Bakaimukya orugendo oru habwa Kristo kandi bataikirize kutwara akantu koona abakafiiri aka bakaba nibagonza kubaha. 8Habweki tusemeriire kugumya abantu nk'abo, nukwo tusobole kubakoonyera ha mulimo ogw'okurarangya amazima.
Mwerinde engeso mbi eza Diyoterefe
9Nyowe nyina ebi naahandikiire ekitebe ky'abaikiriza, baitu Diyoterefe anyakugonza kwebembera boona, taikiriza ebi ndagira. 10Habweki obu ndiija, ndibaijukya ebi akora nantebya kubi. Tagarukira hali eki kyonka, baitu ayanga n'okujwahukirra ab'oruganda, nangwa naatanga n'abo abagonza kubajwahukirra, kandi ababinga omu kitebe ky'abaikiriza.
Engeso nungi eza Demeetirio
11Omugonzibwa, otakuratira abarukukora ebibi, baitu okuratire abarukukora ebirungi. Ogu anyakukora ebirungi, nuwe wa Ruhanga; kandi anyakukora ebibi, takaroraga Ruhanga. 12Demeetiriyo, abantu boona bamubazaaho kurungi, kandi n'amazima nago nigamuheera obwakaiso. Na nyowe ninkigumya, kandi mumanyire obwakaiso bwange nkooku buli bw'amazima.
Eky'okumalirra
13Mbaire nyina bingi eby'okubahandiikira, baitu tindukwenda kubihandiikisa akacumu na bwino. 14Ninihira kubarora bwango, nukwo tubaze niturorangana.
15Obusinge bube na iwe. Banywani baitu nibakuramukya. Ondamukize banywani baitu, buli omu.
Currently Selected:
3Yoh 1: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.