2 Abakor 4

Omusana oguleetwa Amakuru Amarungi ga Kristo

1Nahabweki itwe abaahairwe obuheereza bunu habw'embabazi za Ruhanga, titurukuterebuka. 2Tukanga ebirukukwasa ensoni n'ebirukukorwa omu nsereko. Tituli bagobya, tituhindahindura ekigambo kya Ruhanga, baitu amazima tugooleka bbwa, nukwo abantu boona batusiimire omu mitima yabo omumaiso ga Ruhanga. 3Amakuru gaitu Amarungi noobu garaaba gaswekeriirwe, baitu gaswekeriirwe habw'abo boona abarukuhwerekerra. 4Nubo abo abatarukwikiriza, habwokuba omukuru w'ensi enu aswekeriire emitima yabo, nukwo abatange kurora omusana ogw'Amakuru Amarungi ag'ekitiinisa kya Kristo, anyakuli kisisani kya Ruhanga. 5Itwe titwegambaho itwenka, baitu turangirra Yesu Kristo nkooku ali MUKAMA, kandi itwe tuli baheereza banyu habwe. 6#Kub 1:3.Ruhanga ayagambire ati: “Leka omusana gujwere omu mwirima,” nuwe yamulikire omu mitima yaitu, yatuha kwoleka abantu ekitiinisa kya Ruhanga ekyazookere omu Kristo.

Itungo eryahwirwe omu bibindi by'ibunba

7Baitu itungo eri, itwe twinalyo omu bibindi by'ibumba habw'okwoleka obusobozi obuteerengwa nkooku buli bwa Ruhanga, tibuli bwaitu. 8Tugosirwe embaju zoona, baitu titufunziibwe; tusobiirwe, baitu tirurukuterebuka. 9Tuhiiganizibwe, baitu titunagiriziibwe; tutiirwe hansi, baitu tituhwerekereziibwe. 10Obutoosa tugenda twina okufa kwa Yesu omu mibiri yaitu, nukwo obwomeezi bwe nabwo buzookere omu mibiri yaitu. 11Itwe obu tuba tukyali boomeezi, butoosa tuba mu kabi k'okufa habwa Yesu, nukwo obwomeezi bwe buzookere omu mibiri yaitu erukufa. 12Nahabweki orufu rukorra omuli itwe, baitu obwomeezi omuli inywe.

13 # Zab 116:10. Itwe nkooku twina omwoyo gumu ogw'okwikiriza nk'ogwa Daudi ayahandiikire ati: “Nkaikiriza, nikyo nabaliize.” Na itwe nitwikiriza, nikyo turukubaliza. 14Nitumanya ogu ayahumbwire MUKAMA Yesu omu bafu nkooku alituhumbuura hamu nawe, nukwo itwena atuhikye nambere ali. 15Habwokuba byona biroho habwanyu. Kandi emigisa ya Ruhanga nkooku erukugenda neekanya omu bantu abarukweyongera obwingi, nukwo emigisa ye ekanyise eti okusiima kwaitu, kandi Ruhanga aheebwe ekitiinisa.

Mugumire omu kwikiriza

16Nahabweki titurukuterebuka. Omubiri gwaitu noobu guraaba nigujunda, baitu omwoyo gwaitu gugaruka buhyaka buli kiro. 17Omuhito gunu omuke ogw'akasumi kake nigututeekaniriza ekitiinisa ekitahwaho kandi ekitainganwa. 18Itwe titurukuta maiso ha bintu ebirukurorwa, baitu tugata ha bintu ebitarukurorwa; habwokuba ebirukurorwa bihwaho, baitu ebitarukurorwa tibihwaho.

Currently Selected:

2 Abakor 4: BRR2008

Highlight

Copy