1 Abakor 8

Ebirukukwata ha bintu ebihongiirwe embandwa

1Ebirukukwata ha byokulya ebihongiirwe embandwa, ebi itwena nitubimanya habwokuba “Twina amagezi”, nkooku murukugamba. Baitu “Amagezi” ago galeeta emyehembo; okugonza nukwo kwombeka. 2Anyakuteekereza ngu, aina eki amanyire, aba atakamanyire nkooku kimusemeriire. 3Baitu anyakugonza Ruhanga, nuwe amanywa Ruhanga.

4Hati nu, ha kulya ebihongiirwe embandwa, nitumanya “embandwa nkooku zitarohokwo”, kandi “Tiharoho Ruhanga ondi, kwihaho omu wenka.” 5Noobu haraaba haroho abarukwetwa baruhanga omwiguru rundi omu nsi mazimakwo haroho bingi ebirukwetwa “baaruhanga” rundi “embandwa”, 6baitu habwaitu haroho Ruhanga omu, Isiitwe, endugirro yaitu kandi ey'ebintu byona, na MUKAMA omu Yesu Kristo nambere ebihangwa byona byarugire, na itwe nambere twiha obwomeezi.

7Baitu amagezi ago, boona tibainago. Abamu, habw'okumanyiira embandwa, nibakyalya ebyokulya ebihongerwe; kandi emitima yabo habw'okusangwa eri miceke eyesiitara. 8Ebyokulya tinibyo bitusiimisa Ruhanga. Okutalya ebyokulya tikitufeereza kantu, kandi okulya tikitwongeraho kantu.

9Kyonka mwerinde, obugabe bwanyu butaliikara kwesiitaza abaceke. 10Kakuba omuntu naakurora, iwe arukwetegereza, oikaliire omu kibbali noolya, kandi asangirwe ali muceke omu mutima gwe, nawe tarukwija kutwalirizibwa okulya ebihongiirwe embandwa? 11Nukwo habw'amagezi gaawe, mugenzi waitu omuceke Kristo ou yafeeriire, ahwerekerra. 12Kusiisa oti bagenzi bawe noosiitaza emitima yabo emiceke, oba okozire ekibi hali Kristo. 13Nahabweki ebyokulya obu biraaba nibireetereza mugenzi wange kugwa, nyowe tindirya nyama ebiro byona, ndeke kunaga mugenzi wange omu kibi.

Currently Selected:

1 Abakor 8: BRR2008

Highlight

Copy