1 Abakor 4

Abakwenda ba Ruhanga mubateekerezeho kurungi

1Inywe musemiriire kutumanya nkooku tuli baheereza ba Kristo kandi bakeeto b'ensita za Ruahanga. 2Kandi ekikuru hali abakeeto nukwo okuba beesigwa. 3Inywe kuncwera omusango rundi kugucwerwa Enkurato z'abantu, tinkifaaho muno. Na nyowe nyenka tinyecwera musango. 4#Ama 17:11.Timmanyire kintu eki ndukujunaanwa, baitu eki tikiri nikyo ekirukunyihaho musango. MUKAMA nuwe ancwera omusango. 5Nahabweki mutalicwa emisango obwire butakahikire, MUKAMA atakagarukire, nuwe alimulika ebintu ebiserekerwe omu mwirima hati, kandi alyata ensita z'omutima. Obu nubwo Ruhanga alisiima buli muntu nkooku kimusemeriire.

6Bagenzi bange, binu byona mbyebalizeeho kandi mbibalizeeho Apolo nukwo bibagasire. Na inywe mutwegereho mutarukuhingura ha Byahandiikirwe, haleke kubaho omuli inywe arukwenyumiza ngu, naagonza omukwenda omu kandi naagaya ondi. 7Kiki eki orukukiza abandi? Kandi kiki eki oina eki otarahairwe? Obu oraaba wakihairwe, nooyenyumiriza ki nk'atarakihairwe?

Emitalibano Abakwenda baaboine

8Inywe timwina ekirukubabura! Mutungire byona ebi murukwenda! Mufookere balemi tutabakonyiire! Kakuba mwalemerekwo, twakusemiriirwe, na itwe twakulemere na inywe. 9Baitu ningira ngu, itwe abakwenda Ruhanga akatuta enyuma y'abandi boona, nk'abantu abaacweriirwe omusango ogw'okufa, habwokuba tufookere eky'okusungwa ensi yoona, nitusungwa abamalaika n'abantu. 10Itwe tuli basema habwa Kristo, baitu inywe muli b'amagezi omu Kristo. Itwe tuli baceke, baitu inywe muli b'amaani. Inywe nimuheebwa ekitiinisa, baitu itwe nitugaywa. 11Okuhika na hati niturumwa enjara kandi twina iroho, tujwaire obutengo, nituterwa entomi, kandi titwina bwikaro, 12#Ebik 18:3.nitutalibana, nitwekorra itwenka n'emikono yaitu. Obu batujuma, itwe tubasabira omugisa; obu batuhiiganiza, itwe tugumiisiriza; 13obu batuhangirra, itwe tubagarukamu n'obuculeezi; n'okuhika hati tufookere ekinugwa omunsi kandi ekitagasa omu byona.

Paulo naahabura Abakorinto

14Binu byona timbihandiikire kubaswaza, baitu nimbahabura nk'abaana bange abagonzibwa. 15Noobu muraaba mwina abarukubahabura baingi omu Kristo, baitu timwina baisiinywe baingi. Habwokuba ninyowe nafookere isiinywe omu Kristo Yesu habw'okubarangirra Amakuru Amarungi. 16#1Kor 11:1; Baf 3:17.Nahabweki nimbeesengereza, mukwate engeso zange. 17Nikyo nabatumiireho Timoteo, omwana wange omugonzibwa kandi omwesigwa omu MUKAMA, abaijukye emikorre yange omu Kristo, nkooku ndukugyegesa hoona omu bitebe by'abaikiriza. 18Abamu nibeehemba nibagira ngu, owanyu tindukwijayo. 19Baitu owanyu ndiijayo bwango, MUKAMA obu aliba agondeze; obu nubwo ndimanya abarukwehemba ebi barukukora, hatali ebi barukugamba bugamba. 20Habwokuba obukama bwa Ruhanga tibuba omu bigambo bugambo, baitu buba omu bikorwa. 21Nimwenda ki? Nyije n'omwigo, rundi nyije n'omutima gw'engonzi n'obuculeezi?

Currently Selected:

1 Abakor 4: BRR2008

Highlight

Copy