Mat. 24

Kirwor Yesu epite ŋolo inyasunere Akai ka Akuj

(Mar. 13:1-2; Luk. 21:5-6)

1Torotok Yesu alo Kai ka Akuj. Ani eriŋa elosi, potu ŋikeekasyomak kitoodikis iŋes epite ŋolo edukitere Akai ka Akuj. 2Nai tolimok Yesu ikes tema, “Iteete iyes ŋiboro lu daadaŋ a? Akalimokini ayoŋ iyes kire atemar, nyidoŋi nege tari amoru apei daŋ ŋina nyeukoryo.”

Ŋican ŋulu eponito alokiŋaren

(Mar. 13:3-13; Luk. 21:7-19)

3Ani iboi Yesu alomoru a ŋikito a ŋulu enyaritae Olipa, potu ŋikasyomak keŋ kiŋita iŋes aneni kec make temasi, “Tolimokinae isua apaki ŋina etakanuniata ŋakiro ŋun daadaŋ, nabo nyo ikitaanyuni isua abunore kon ka asalunet ŋina ka akwap?”

4Toboŋok Yesu ikes tema, “Tocoito nyikimodik idiotuŋanan iyes. 5Anerae epote ŋikalalak irworosi alokiro kaŋ ebasi, ‘Arae ayoŋ Kristo!’ emodikinete kitooliyosi ŋikalalak. 6Ani iirarete iyes ŋijiesyo ka ŋiemuto ŋulu a ŋijiyesyo, nyikibul, anerae itemokino ŋul totakanut, nai nyitoodiunito ikes atemar adol asalunet. 7Ejikinosi ŋituŋa aŋakwapin, ejikin apukan ka apukan, eyakaun ŋironia ka emaranikini akwap anakiboisyo a ŋuna egelegelya. 8Nai erae ŋun daadaŋ ageunet a ŋican, ikwaŋina egeunia aberu aryeba edoli akidoun.

9“Ikikamunete ikes iyes ikisican ka itaari; ikiremokinosi iyes ŋituŋa daadaŋ aŋuna ke ekiro kaŋ. 10Ejamakinete ŋikalalak anupit Akuj ŋirwa ŋul, eluwonokin ŋituŋa make todiŋanakin. 11Nabo epote ŋikadwarak ŋulu alalak ŋulu alyokonok, tomodikis kitooliyosi ŋikalalak. 12Aŋuna elalaaror aronis, editeuni amina Akuj alotuŋa a ŋulu alalak. 13Nai ŋini etitinyikini tari nasalunet, eiunio. 14Itatamio Ŋakiro ŋuna Ajokak ŋuna ka Apukan ka Akuj nakwapin daadaŋ, toyenut ŋituŋa daadaŋ, ani irikakin todolu asalunet.

Ekenyasunan ŋolo aronon nooi

(Mar. 13:14-23; Luk. 21:20-24)

15“Iŋolikinete iyes ŋiboro ŋulu aronok eyakasi neni einakinitae Akuj, ikwaŋina koloŋ alimunitor ekadwaran Daniel, (toyenu ekasyoman apolou a ŋakiro a nu!) 16Itemokino nai ŋulu eyakasi Yudaya, toema lomoru, 17ŋini edokit akai, nyedoku kwap alemun ibore alokai keŋ; 18ka ŋini eyai lomanikor, nyeboŋu aomun ekeelou. 19Erokyarosi ŋakiro aneni a ŋaberu a ŋuna epotiyete kori itanakete ŋirwa ŋul! 20Kilipa Akuj tomamukaun asuronot ŋin nakiporo kori akoloŋit ŋina a Sabato. 21Anerae alorwa a ŋul, eyakaunosi ŋakisicaneta ŋuna nyetakanuna ŋinapei kesubia Akuj akwap tari tokona, kori nyepote nabo jik ŋican ŋul. 22Nai etuuruwuan Akuj ŋirwa ŋul. Kerae nyituuruwuanit, kemam ituŋanan epuun. Nai aŋuna aminar Akuj ŋulu aseunit iŋes, abu kituuruwuan ŋirwa ŋul.

23“Ani kikilimok iyes ituŋanan tema, ‘Kiŋolikisi, Kristo iŋes lo,’ kori tema, ‘Iŋes ye,’ nyinupa ŋakiro keŋ. 24Anerae epote atakristo ka ŋikadwarak ŋulu alyokonok. Epote ikes akitiya ŋakitoodyanakineta ka ŋaumonokineta ŋuna ailiilok, ikotere itooliyorete tari ŋituŋa ŋulu seuna, erae kepedorete. 25Topupokisi! Akalimokinit ayoŋ iyes ŋakiro nu eriŋa nyedoluno.

26“Kori ani kikilimokis iyes ŋituŋa temasi, ‘Eyai iŋes ama nariet!’ nyiloto inaa, kori ani ketemasi ‘Elo!’ nyinupa. 27Anerae ikoni abunore a Lokoku a Ituŋanan neni imilyaunia akimilyaunet alo Kide tari To. 28Neni eyai ibore ŋini atwan, iŋes iudakin ŋataruk.

Abunore a Lokoku a Ituŋanan

(Mar. 13:24-27; Luk. 21:25-28)

29“Ani elunyari ŋican ŋulu a ŋirwa a ŋul, iryoniar akoloŋ, nyecauni elap, ecakunosi ŋikacer anakuj, nabo emaranikinete ŋisubuna daadaŋ ŋulu alokidiama. 30Totakanu nai akitoodikinet a Lokoku a Ituŋanan anakuj. Ikalounete ŋibukui daadaŋ anakwap iŋolikinete Lokoku a Ituŋanan ebuni alodowuon eyakar apedor ka akica ŋina apolon nooi. 31Iyakuuni iŋes ŋimalaikan keŋ apaki ŋina ekutakinere arupepe ŋina apolon, tocunakis ŋiseuna keŋ alowaetin ka akwap a daadaŋ, ameun anakisyakinet tari nasalunet.

Akitatamet ŋina ke ebobore

(Mar. 13:28-31; Luk. 21:29-33)

32“Toyenutu akitatamet ŋina a kire alobobore. Ani ipuriteunete ŋaten keŋ ka tolibut ŋakwii, iyenunete iyes atemar aapuu akamu. 33Ikwaŋinapei, iyes daŋ ŋina iŋolikiniata ŋakiro ŋun daadaŋ etakanunete, toyenutu atemar aapuu Lokoku a Ituŋanan, adolu lokekia kus. 34Akalimokini ayoŋ iyes kire atemar, nyelunyar anyamet na eriŋa nyetakanuna ŋakiro ŋun daadaŋ. 35Edaunosi nakuj ka akwap, nai nyedaunosi ŋakaakiro jik.

Emam ituŋanan ŋini eyeni apaki ŋina ebunio Lokoku a Ituŋanan

(Mar. 13:32-37; Luk. 17:26-30, 34-36)

36“Nai ŋuna ka akoloŋit a ŋin, kori ke esaa a ŋol, emam ituŋanan eyeni, nyeyenete tari ŋimalaikan ŋulu anakuj, kori tari Lokoku, nai mati Papa bon. 37Ikokinete ŋirwa ŋulu ebunio Lokoku a Ituŋanan ŋulu koloŋ a Noa. 38Anerae ŋirwa ŋul, eriŋa ŋakipi nyerapuwara akwap, apotu ŋituŋa kimuja ka tomatas. Apotu ŋikilyok kiitanasi, nabo epotonoryo ŋapesur kiitae akitodol akoloŋit ŋina alomarya Noa nataker. 39Nyeanyuna ikes ŋadikiro jik tari ŋina aponiata ŋakipi tomunyasi ikes daadaŋ. Ikokini nen abunore a Lokoku a Ituŋanan. 40Apaki ŋin eyakaun ŋikilyok ŋiarei lomanikor, eayo epei toesikinae ŋoloce. 41Eryamunio ŋaberu ŋaarei iryeete, eayo apei kimyekinae ŋinace.

42“Aŋun totenito, anerae nyiyenete iyes Akoloŋit ŋina ebunio Ekapolon kus. 43Toyenutu nu, kerae toyenunite elope akai esaa ŋolo ebunio ekokolan nakwaare, kekienyit iŋes ka pa kimyekinit ekokolan ituwuokini akai keŋ. 44Aŋun, itemokino iyes daŋ totenito, anerae ebuni Lokoku a Ituŋanan apaki ŋina nyitamakinitotor iyes atemar ebunio.

Eketiyan ŋolo kikinyoma ka ŋolo nyikinyoma

(Luk. 12:41-48)

45“Ŋae nai erae eketiyan ŋolo aoson ŋolo kikinyoma, ŋolo aseu ekapolon keŋ apolokin ŋuluceketiyak tokoranakini akimuj edoli apaki? 46Erereŋ eketiyan ŋol ŋina ebunio ekeekapolon, toryamu iŋes itiyae ikoŋina! 47Akalimokini ayoŋ iyes kire atemar, iwuakini ekapolon iŋes topolok ebari keŋ daadaŋ. 48Nai ani kerae iŋes eketiyan ŋolo aronon, etemari alotau keŋ, ‘Adid ekapolon kaŋ,’ 49togeu akibuŋa ŋiketiyak ŋuluce, kimuj ka tomatas ka ŋikamerak; 50eboŋuni nai ekapolon ke eketiyan a ŋol akoloŋit ŋina nyetamunitor iŋes ka esaa ŋolo nyeyeni iŋes. 51Isicani ekapolon iŋes nooi, kimorik ka ŋikaŋisoswae; kigwor aina tokonyanak ŋikyal.

Currently Selected:

Mat. 24: NIB2008

Highlight

Copy