Luk. 19

Yesu ka Sakayo

1Toloma Yesu Yeriko erae ekalunyan. 2Ayai nen ekile ŋolo anyaritae Sakayo ŋolo apolokinit ŋikatubok ocur, torae daŋ ekabaran. 3Acamit iŋes aanyun atemar ikoni ituŋanan ebe Yesu ai, nai ikwaŋina auruwuania iŋes, toŋop epite ŋolo iŋolikinia iŋes Yesu, anerae alalak ŋituŋa. 4Tosodi nai iŋes toem kiŋaren ŋituŋa, todoka kidiama ekitoe, ikotere eanyuwari Yesu ŋolo etorunit lorot ŋol. 5Ani edoli Yesu lokitoe ŋol, kireo kidiama tolimok Sakayo tema, “Sakayo, todoku atipei, acamit ayoŋ aruwor epeyonon nakoloŋit na alokai kon.”

6Todoku Sakayo atipei, kijau iŋes Yesu ka alelyan. 7Togeut ŋituŋa daadaŋ ŋulu eteete iŋes akiŋuruŋura ebasi, “Alot ituŋanan en aruwor epeyonon ŋolo ke ekasecan!”

8Tonyou nai Sakayo tolimok Yesu tema, “Topupok Ekapolon! Alosi ayoŋ ainakin atyaket ŋina ke ekaabari lokulyak, nabo ani keyai ituŋanan ŋini sek amodiyarit ikeebore, atacakini ŋatacakinet ŋaomwon.”

9Tolimok Yesu iŋes tema, “Abu aiuno kai na nakoloŋit na; anerae erae ekile lo daŋ ekanateker ka Aburaam. 10Anerae abuni Lokoku a Ituŋanan akiwarit ka aiun ŋulu eoliyorito.”

Akitadapet ŋina a ŋisiliŋa a ŋulu etiyaunitae ke egolid

(Mat. 25:14-30)

11Ani eriŋa ŋituŋa epupete ŋuna erworo Yesu, tolimok iŋes ŋituŋa akitadapet, anerae aapiyarito ikes Yerusalem, nabo totamakinito ŋituŋa atemar kori eapi atipei Apukan ka Akuj atakanun. 12Kirworik Yesu tema, “Ayai ekabaran ŋolo anyouni tolot nakwap ŋina alwanan ecamit akituruworo erwosit, ani ekaku, toboŋu lore keŋ. 13Tosodi iŋes tonyarau ŋiketiyak keŋ ŋitomon eriŋa iŋes nyerotokino, tokorak ikes ŋisiliŋa ŋitomon ŋulu etiyaunitae ke egolid itiriyanit tolimok tema, ‘Kicurutaata ikes tari ŋina aboŋunio ayoŋ.’ 14Nai aremokino ŋituŋa ŋulu ka akwap keŋ iŋes, kiyakiyasi ŋituŋa neni alosi iŋes temasi, ‘Nyikicamit isua ituŋanan ŋin eruwor erwosit kosi.’

15“Toboŋu iŋes lore kedaun akituruwor erwosit. Tonyarau iŋes ŋikeeketiyak ŋulu ainakinit iŋes ŋisiliŋa ecamit aanyun etyae ŋolo kepotu ikes kipoidaut. 16Bu ŋolo ke ekiŋaren tolimok iŋes tema, ‘Ekapolon, aryamu ayoŋ alosiliŋ kon ŋice ŋitomon.’ 17Tolimok ekapolon iŋes tema, ‘Ejok nooi, irae iyoŋ eketiyan ŋolo ikikinyomitae! Ikwaŋina ikikinyomitere iyoŋ anibore a ŋini cici, ipolokini iyoŋ ŋitaunio ŋitomon.’ 18Tosodi bu ŋolo a ŋiarei tema, ‘Ekapolon, aryamu ayoŋ alosiliŋa kon ŋice ŋikan.’ 19Tolimok ekapolon ŋolo daŋ tema, ‘Ipolokini iyoŋ ŋitaunio ŋikan.’

20“Bu eketiyan ŋoloce tema, ‘Ekapolon, ekonisiliŋ lo; ewuait ayoŋ alidakinit narac. 21Akakerit ayoŋ iyoŋ, anerae irae iyoŋ ekile ŋolo atyonon. Ilemanari iyoŋ ŋini nyerae ikon, nabo ilemi iyoŋ ŋini pa itakinit.’ 22Tolimok ekapolon eketiyan ŋol tema, ‘Irae iyoŋ eketiyan ŋolo aronon! Akatubokini ayoŋ iyoŋ a ŋakiro a ŋuna ilimu iyoŋ elope! Iyeni iyoŋ atemar arae ayoŋ ekile ŋolo atyonon ŋolo alemanari ibore ŋini nyerae ikaŋ, nabo alemi ŋini nyitakina ayoŋ. 23Nyo bo ani kikote neni, pa iwuakinia iyoŋ esiliŋ kaŋ nabeŋki, ikotere ani aboŋuni ayoŋ, orukau kiyatakin?’

24“Tolimok ekapolon ŋituŋa ŋulu awuasi a nen tema, ‘Tolemasi esiliŋ aneni keŋ, inakis ŋolo a ŋisiliŋa a ŋulutomon.’ 25Tolimokis ikes ekapolon temasi, ‘Ekapolon, eyakasi sek iŋes ŋitomon!’ 26Toboŋok ekapolon ikes tema, ‘Akalimokini ayoŋ iyes atemar, ŋinituŋanan eyakar ibore, iyatakinio. Nai ituŋanan ŋini emamukar ibore, edemaryo tari ŋinidio cici daŋ ŋini eyakar iŋes! 27Nai ani ikwa ŋimoi kaŋ lu, ŋulu nyakacamito ayoŋ akipuka ikes, torikutu ikes ne toŋolae ete ayoŋ!’”

Toloma Yesu Yerusalem

(Mat. 21:1-11; Mar. 11:1-11; Yoa. 12:12-19)

28Ani kedau Yesu erwor ŋakiro ŋun, torubak elosi Yerusalem kiŋarenik ikes. 29Ani eapikini iŋes ŋitaunio ŋulu a Betepage ka Betania, ŋulu aya diye emoru a ŋikito a ŋulu enyaritae Olipa, kiyakiya iŋes ŋikasyomak keŋ ŋiarei kiŋaren, 30tolimok ikes tema, “Apesi lore ŋolo eyai kiŋaren kus; ani ilomarete, iryamunete eenitae isigirya ŋini emam ituŋanan adok, tolacut torikut nege. 31Ani kikiŋit idiotuŋanan iyes atemar, ‘Kaanukiro ilacata iyes isigirya?’ Tolimokis iŋes atemar, ‘Ekapolon iitanit iŋes.’ ”

32Toloto ikes toryamut ibore daadaŋ ikoni neni alimokinitor Yesu ikes. 33Ani eriŋa ikes elacete isigirya, kiŋita ŋilopeyek ikes temasi, “Kaanukiro ilacata iyes isigirya?”

34Toboŋokis ikes temasi, “Ekapolon iitanit iŋes.” 35Torikut nai ikes isigirya neni a Yesu, kidokokis ŋikecelowi kidiama, ido kiŋarakis Yesu adokar nisigirya. 36Ani erotokini iŋes a isigirya, topetakis ŋituŋa ŋilowi kec lorot.

37Ani eapuuni Yesu Yerusalem neni etiyaaror erot ŋolo eteni moru a ŋikito a ŋulu enyaritae Olipa, tolomak asepic a ŋikasyomak alelyan ka akipuro Akuj iworoete nooi, ikotere ŋakiro ŋuna kepotu ikes toanyut. Temasi ikes, 38“Erereŋ erwosit ŋolo ebunit alokiro ke Ekapolon! Toyai ekisil nakuj ka akipuro neni ka Akuj alokidiama nooi!” 39Tolimokis Ŋiparisayon ŋice ŋulu aya nasepic a ŋituŋa Yesu temasi, “Eketataman, kiyayak ŋikonikiyakia kililiŋa!”

40Toboŋok Yesu ikes tema, “Akalimokini ayoŋ iyes atemar, ani kililiŋa ikes, ecelunete ŋamoru nu.”

Kigwor Yesu aŋuna a ŋituŋa a ŋulu a Yerusalem

41Toapiya Yesu Yerusalem; ani iŋolikini, kikalou aŋuna a ŋituŋa a ŋulu ke etaun a ŋol, 42tema, “Okoe, kerae ca toyenete iyes nakuwar na ibore ŋini erae ikisilet! Nai tokona iwuaitae anakonyen kus! 43Epote ŋirwa ŋulu ikirikauniata iyes ŋimoi kus itoroosi alowaetin a daadaŋ. 44Ikinyasunete ikes iyes ka ŋidwe kus ŋulu eya tooma ŋakorya kus; emam amoru tari apei daŋ ŋina imyekinio ewuoi, anerae pa iyenete iyes apaki ŋina ebunio Akuj aiun iyes!”

Toloma Yesu Kai ka Akuj

(Mat. 21:12-17; Mar. 11:15-19; Yoa. 2:13-22)

45Toloma Yesu Kai ka Akuj, kirita ŋimucurus. 46Tolimok ikes tema, “Elimunitoe a Nakigireta ebe, ‘Enyarao Akai kaŋ Akai ŋinakilipet.’ Nai tokona ituruwosi iyes iŋes akai ŋina eŋopitotor ŋikokolak!”

47Etatami Yesu ŋirwa daadaŋ alo Kai ka Akuj. Acamito ŋisacaradotin ŋulu apolok ka ŋiketatamak a Ŋikisila ta ŋikatukok akiar Yesu; 48nai toŋopik ikes epite ŋoloaret iŋes, anerae apupete ŋituŋa daadaŋ ŋakiro a Yesu, emam ŋini acamit tari apeikirot ebucar.

Currently Selected:

Luk. 19: NIB2008

Highlight

Copy