Akisy. 46

Yau Yakob ekal keŋ daadaŋ Ijipit

(Awos. 6:14-25)

1Kisyak Isirael arotokin a nen, ya ibore daadaŋ ŋini ayakar, ani edoli iŋes Beeriseba, tolemik amuronot neni ka Akuj a papa keŋ Isaka. 2Kirworik Akuj neni a Isirael nakwaare anakiruja tema, “Yakob! Yakob!” Toboŋok iŋes tema, “Ayai.” 3Tema Akuj, “Arae ayoŋ Akuj, Akuj a papa kon. Nyikuryan alosit atiyaar Ijipit, anerae eketipituni ayoŋ iyoŋ anakwap a ŋin. 4Ikitiyaar ayoŋ ka iyoŋ Ijipit, ido ekenyakuni ayoŋ iyoŋ ne; ikidari iyoŋ Yosepu akitodol natwanare kon.”

5Torotok Yakob alo Beeriseba; tonapasi ŋituŋa a Isirael papa kec Yakob ka ŋidwe kec ŋulu cicik ta ŋaberu kec; kiwuakis nagaari ŋuna eyakuuni Parao ayaya ikes. 6Tomyaasi ikes ŋibaren kec ka Yaasi ŋiboro ŋulu keryamunito ikes anakwap a Kanaan. Tolomutu Yakob ka ŋiletok keŋ daadaŋ Ijipit, 7iŋes ka ŋidwe keŋ ŋulusapa ka ŋipapae keŋ ŋulusapa ta ŋidwe keŋ ŋulupesur ka ŋipapae keŋ ŋulupesur. Yau Yakob ŋiletok keŋ daadaŋ Ijipit.

8Ŋirorwa a Ŋisirael ikes lu: Yakob ka ŋidwe keŋ ŋulu arukoryata Ijipit. Ruben iŋes lokoku a Yakob ŋolo kiyae. 9Ŋidwe a Ruben ŋulusapa lu: Anok, Palu, Esiron ka Karimi. 10Ŋidwe a Simeon ŋulusapa lu: Yemuel, Yamin, Oad, Yakin, Soar ka Saul, ŋolo arae aberu ŋina a Kanaan auruuni. 11Ŋidwe a Lepi ŋulusapa lu: Gerison, Koas ka Merari. 12Ŋidwe a Yuda ŋulusapa lu: Er, Onan, Sela, Peres ka Sera (nai aris Er ka Onan ketwaka alo Kanaan.) Ŋidwe a Peres ŋulusapa lu: Esiron ka Amul. 13Ŋidwe a Isakar ŋulusapa lu: Tola, Pua, Yasub ka Simiron. 14Ŋidwe a Sebulon ŋulusapa lu: Sered, Elon ka Yaleel. 15(Ŋidwe a Yakob ŋulusapa ŋul ŋulu auruuni aberu keŋ Lea alo Padanaram, pa imarakinitae Dina nakoku keŋ. Arae ŋidwe a Yakob ŋulusapa ka ŋulupesur ta ŋipapae keŋ daadaŋ ŋatomoniuni ka ŋiuni). 16Ŋidwe a Gad ŋulusapa lu: Sepon, Agi, Suni, Esibion, Eri, Arodi ka Areli. 17Ŋidwe a Aser ŋulusapa lu: Imina, Isipa, Isipi ka Beria. Anyaritae ekiro anakaato kec Sera. Ŋidwe a Beria ŋulusapa lu: Eber ka Malikiel. 18(Ŋidwe ŋul, ikes abu Yakob toryamu ikwapei ŋidwe ka ŋipapae keŋ aneni a Silpa, a ŋina aini Laban neni anakoku keŋ Lea. Arae ŋidwe ŋul daadaŋ ŋitomon ka ŋikanikapei). 19Ŋidwe a Rakel a aberu a Yakob ŋulusapa lu: Yosepu ka Benjamin. 20Abu Yosepu touru ŋidwe lu anakwap a Ijipit: Manase ka Epraim aneni a Asenat anakoku a Potipera a ŋolo arae esacaradoti a On. 21Ŋidwe a Benjamin ŋulusapa lu: Bela, Beker, Asibel, Gera, Naaman, Ei, Ros, Mupim, Upim ka Arid. 22(Ŋidwe ŋul, ikes abu Yakob toryamu ikwapei ŋidwe ka ŋipapae keŋ. Arae ikes daadaŋ ŋitomon ka ŋiomwon). 23Lokoku a Dan iŋes Usim. 24Ŋidwe a Napitali ŋulusapa lu: Yasiel, Guni, Yeser ka Silem. 25(Ŋidwe ŋul, ikes abu Yakob toryamu ikwapei ŋidwe ka ŋipapae keŋ aneni a Bila a ŋina aini Laban neni anakoku keŋ Rakel. Arae ikes daadaŋ ŋikanikaarei). 26Ekimar a ŋituŋa a ekal a Yakob a ŋulu arukorete ka iŋes Ijipit pa imarakinitae ŋaberu a ŋidwe keŋ, arae daadaŋ ŋatomonikanikapei ka ŋikanikapei. 27Ani imorikinio nen Yosepu ka ŋidwe keŋ ŋulusapa ŋiarei ŋulu keurunio alo Ijipit, toruwor ekimar a ŋituŋa a ekal a Yakob daadaŋ a ŋulu kelosito Ijipit ŋatomonikanikaarei.

Tolom Yakob nakwap ŋina a Gosen

28Kiyakiya Yakob Yuda toberari neni a Yosepu, ikotere itenakini ikes lorot ŋolo elosi Gosen. Ani edolunete ikes Gosen, 29kitemok Yosepu agaari keŋ, tolot akisiryam papa keŋ Yakob alo Gosen. Ani edoli Yosepu neni a papa keŋ, toramar lomosiriŋ keŋ, kigwor etunakina lomosiriŋ a papa keŋ apaki ŋina aoyan. 30Tema Yakob neni a Yosepu, “Apedori tokona ayoŋ atwanare, ikwapei adaunia akiŋolikin iyoŋ atemar eriŋa iyari.” 31Tema Yosepu neni a ŋikaitotoi keŋ ka papa keŋ ta ekal a papa keŋ, “Alosi ayoŋ neni a Parao, otema neni keŋ, ‘Apotu neni kaŋ papa kaŋ ka ŋituŋa keŋ ŋulu aya nakwap a Kanaan. 32Erae ŋikilyok ŋikeyokok a ŋamesekin; iyokiyete ŋibaren, ido aramut ikes ne ŋamesekin, ŋaatuk ka ayaut ŋiboro kec daadaŋ.’ 33Ani ikinyarae iyes Parao ikiŋisi atemar, nyo etic kus? 34Toboŋokisi iŋes temasi, ‘Isua ŋiketiyak kon, ikirae ŋikeyokok a ŋibaren ŋinapei anasorokanut kosi tari tokona, isua kaapei ka atapapaa kosi.’ Tolimutu ŋun ikotere ilomete nakwap ŋina a Gosen, anerae aneni a Ŋijipitian, erae ŋikeyokok a ŋamesekin ŋisiilyanotin.”

Currently Selected:

Akisy. 46: NIB2008

Highlight

Copy