Akisy. 41

Kisileereu Yosepu apolou a ŋakiro a ŋuna erujat Parao

1Kelunyar ŋikaru ŋiarei, kiruja Parao ebe: Awoi iŋes alodiyete aŋolol Nile, 2tolomut kiŋa anaŋolol ŋaatuk ŋakanikaarei ŋuna ajokak ŋajul totumito, todaka ŋinya ŋulu enyaritae eoot. 3Kaku ŋaatuk ŋun, ayakasi ŋaatuk ŋace ŋakanikaarei, ŋuna asilok a ŋajul tosenyito. Tolomut anaŋolol, towua alodiyete ŋaatuk ŋunace alokipetot a aŋolol. 4Tosodo ŋaatuk ŋuna asilok a ŋajul tosenyito tonyama ŋuna ajokak a ŋajul totumito. Tokyenyu nai Parao a nen. 5Tojotoor nabo Parao kiruja akirujaet ŋina a ŋaarei, kiŋolik ŋakyes a ŋikinyom ŋakanikaarei elomunito anakasirimaete a apei; alorok ka ajokak ŋakyes ŋun. 6Ekaku a ŋakyes aŋun, tolomut nabo ŋakyes a ŋikinyom ŋace ŋuna ainiarito ŋuna enapapakinit ekuwuam ŋolo ekutunit alo Kide. 7Kilikosi ŋakyes ŋuna ainiarito ŋunalorok ŋuna eleleba ŋicok. Ani ekyenyuni Parao, toyenu atemar kirujae iŋes. 8Nyeyakaun etau a Parao ejok taparacu; aŋun, abu iŋes kiyaki ŋituŋa anyarare ŋikekukujak ŋulu aya Ijipit ka ŋikaosok keŋ daadaŋ. Tolimok Parao ikes ŋakirujaeta keŋ, nai mam ipei daŋ ŋini abu topedo akisileerekin Parao apolou a ŋakiro a ŋuna abu iŋes kiruja.

9Tosodi eketiyan a Parao ŋolo apolokinit ŋulu ayaununeete ekopo neni a Parao tema neni a Parao, “Atamu ayoŋ ŋadyakanareta kaŋ nakoloŋit na. 10Paaran akoloŋit apei, apotu ŋiketiyak a Parao kitoŋoa Parao, ido abu Parao ekewuak ayoŋ ka ŋolo apolokinit ŋulu epoete ŋamugati keŋ aeno alokai a ŋolo apolokinit ŋisigarya a ŋimabus. 11Ikipotu ayoŋ ka ŋolo akaenitere erujata apeikoloŋit nakwaare, kirujae isua ŋakiro ŋuna pa ekwaan apolou kec. 12Ikirukit isua a nen ka esorokit ŋolo arae Eburaniyat, eketiyan a ŋolo apolokinit ŋisigarya a ŋimabus. Ani elimokinio isua iŋes ŋuna aponi kirujae, abu iŋes ikisileerek isua apolou a ŋakirujaeta kosi; tolimok iŋes ŋinituŋanan apolou a ŋuna erujat. 13Ikwapei ikisileerekinitor iŋes isua apolou a ŋuna erujatae, apotu ŋakiro ŋun kiyookinos; aponi ayoŋ ekenyakakin lotic kaŋ, ido aponi ŋolo apolokinit ŋulu epoete ŋamugati a Parao kinenekinoe.”

14Aŋun, kiyakiya Parao ŋituŋa anyarare Yosepu, tolemunae Yosepu atipei alojera kiwonyunere. Kedau Yosepu abanyun akou ka akinap ŋilowi ŋice, bu nai kiŋaren a Parao. 15Tema Parao neni keŋ, “Erujat ayoŋ, ido mam ituŋanan epedori akisileerekin ayoŋ apolou a ŋakiro a ŋuna erujat. Adau ayoŋ akiirar ŋuna ikitapito iyoŋ ebe ani kiira iyoŋ ŋuna irujat ituŋanan, ipedori akisileereun apolou a ŋakiro a ŋuna irujat iŋes.” 16Tema Yosepu neni a Parao, “Meere ayoŋ; Akuj iŋes elimokini Parao aboŋokinet ŋina ajokan.” 17Tosodi Parao tema neni a Yosepu, “Anakiruja kaŋ, awoi ayoŋ alokipetot a aŋolol Nile; 18tolomut kiŋa anaŋolol ŋaatuk ŋakanikaarei ŋuna ajokak a ŋajul totumito, todaka ŋinya ŋulu enyaritae eoot, 19kaku ŋaatuk ŋun, ayakasi ŋaatuk ŋakanikaarei ŋuna aronok, ŋuna asilok a ŋajul nooi tosenyito. Nyiŋolikina ayoŋ ŋinapei ŋaatuk ŋuna esilok ŋajul ikwa ŋun anakwap a Ijipit a daadaŋ. 20Tonyama ŋaatuk ŋuna asenyito tosilok ŋajul ŋunace ŋuna esyaunak ŋunakanikaarei ŋuna atumito. 21Kedaut akirikar, mam ituŋanan abu toanyu atemar anyama ŋaatuk ŋun ŋunace, anerae apotu ŋaatuk ŋun torubakis esilok ŋajul ikwa ŋinapei sek. Okyenyu nai ayoŋ a nen. 22Ojotoor nabo ayoŋ, eruja nabo, eŋolik ŋakyes a ŋikinyom ŋakanikaarei elomunito anakasirimaete a apei; alorok ka ajokak ŋakyes ŋun. 23Ekaku ŋakyes ŋun, tolomut ŋakyes a ŋikinyom ŋace ŋakanikaarei ŋuna ainiarito todiim ka enapapakinit ekuwuam ŋolo ekutunit alo Kide. 24Kilikosi ŋakyes ŋunadiim ŋunakanikaarei ŋuna ajokak. Nai ani alimokini ayoŋ ŋikekukujak, mam ipei daŋ ŋini abu ekesileerek ayoŋ apolou a ŋakiro a ŋuna abu ayoŋ eruja.”

25Tema nai Yosepu neni a Parao, “Erae apolou a ŋakiro a ŋuna irujat Parao apei ka ikwaan, adau Akuj akitoodikin Parao ŋuna eapi Akuj akitiyakin. 26Ŋaatuk ŋunakanikaarei ŋuna ajokak a ŋajul ŋun, erae ŋikaru ŋikanikaarei ka ŋakyes ŋunakanikaarei ŋuna ajokak erae ŋikaru ŋikanikaarei; ŋakirujaeta ŋunaarei erae apei. 27Ŋaatuk ŋunakanikaarei ŋuna asenyak tosilok ŋajul ŋuna apote ekaku a ŋuna aya kaku a ŋuna ajokak, erae ŋikaru ŋikanikaarei, ikote nenipei ŋuna a ŋakyes a ŋuna amam ŋikinyom ka enapapakinit ekuwuam ŋolo ekutunit alo Kide. Erae ŋikaru ŋikanikaarei ŋulu a eron. 28Ikwapei sek alimokinitor ayoŋ Parao; adau Akuj akitoodikin Parao ŋuna eapi Akuj akitiyakin. 29Epote ŋikaru ŋikanikaarei ŋulu elalaa akimuj anakwap a Ijipit a daadaŋ. 30Ekaku a ŋikaru a ŋul, epote ŋikaru ŋikanikaarei ŋulu a eron, imuryakin ŋikaru daadaŋ ŋulu alalaa akimuj anakwap a Ijipit; irikari eron akwap. 31Mam ŋini etamuni ŋuna alalaa akimuj anakwap, aŋuna a eron a ŋolo etupakin ŋun, anerae eroniar eron ŋol nooi. 32Aponi kisirujae Parao ŋakirujaeta ŋaarei, anerae adau Akuj akiwuakin apaki ŋina itiyakinotor ŋun, ido itiyakini Akuj ŋun atipei. 33Aŋun nai, itemokino Parao toseu ekile ŋolo epatana ayenun ŋakiro, ŋolo eos. Kiwuak Parao ekile ŋol topolok akwap a Ijipit. 34Emaikina Parao kitiya nu: Toseu ŋikapolok ŋulu ka akwap ŋulu ijaununuyete atutubet apei alotooma ŋakan, alokinyom a ŋulu elemunio alokaru a ŋulukanikaarei a ŋulu elalaa akimuj. 35Emaikina ikes tocuna akimuj ŋin ŋina a ŋikaru a ŋulu ajokak a ŋulu eponito. Kidyata ŋikinyom neni a Parao kite alotaunio erae ŋulu kimuja. 36Itemokino akimuj ŋin toruwor ŋina idyasyo nen aŋuna a akwap a daadaŋ ka aŋuna a ŋikaru a ŋikanikaarei a ŋulu a eron; a ŋulu eyakaun nakwap na ŋina a Ijipit; ikotere nai nyemunyarosi ŋituŋa anakwap a na aŋuna a eron.”

Kitopolooroe Yosepu

37Kitalakasi ŋakiro ŋuna alimuni Yosepu Parao ka ŋiketiyak keŋ daadaŋ. 38Tema Parao neni a ŋiketiyak keŋ, “Ikipedori kire iwon aryamun ituŋanan ice ŋini ikoni ekile lo a? Ituŋanan ŋini eyai Etau ka Akuj tooma keŋ a?” 39Aŋun, tema Parao neni a Yosepu, “Ikwapei ikitoodikinia Akuj iyoŋ ŋakiro nu daadaŋ, mam ituŋanan ice ŋini epatana ayenun ŋakiro, ŋini eos ikwa iyoŋ. 40Eruwor iyoŋ ipol alokai a ŋina ka apukan kaŋ, ido emaikina ŋituŋa kaŋ daadaŋ kiwuapa ŋakiro ŋuna ilimokini iyoŋ ikes. Erae ca aŋuna araakar ayoŋ ekepukan iŋes ekeloitor ayoŋ iyoŋ.” 41Aŋun, tema Parao neni a Yosepu, “Ekewuakini tokona ayoŋ iyoŋ towoik akwap a Ijipit daadaŋ.” 42Tosodi nai Parao tolacu ekaboboot keŋ ŋolo a etal alokimoin keŋ, kitanapik lokimoin a Yosepu. Kitanap ŋilowi ŋulu aoyak ŋulu amilimilak, kitanapik lodokole a Yosepu erikot ŋolo a egolid. 43Kitemyaa Parao Yosepu agaari keŋ ŋina erito ŋaŋolei erae ŋolo etupit iŋes anapolou. Tocelasi ŋituŋa alokiŋaren Yosepu ebasi, “Toryediko!” Aŋun, abu Parao kituruwo Yosepu ekapolon a akwap a Ijipit a daadaŋ. 44Tolimok Parao Yosepu tema, “Arae ayoŋ Parao, nai, ani pa kicamak iyoŋ, mam ituŋanan emaikina kitopolooroe anakwap a Ijipit a daadaŋ.” 45Tonyara Parao ekiro a Yosepu ebe, Sapenasipanea, ido inak Asenat nakoku a Potipera a esacaradoti a ŋolo ke etaun a ŋolo enyaritae On, toruwor aberu a Yosepu. Kirimok nai Yosepu akwap a Ijipit daadaŋ.

46Arae ŋikaru a Yosepu ŋatomoniuni apaki ŋina alomarya lotic a Parao a erwosit a Ijipit. Torotok Yosepu aneni sek eboiyoto ka Parao, tolot kirimo nakwap a Ijipit daadaŋ. 47Alotooma ŋikaru ŋikanikaarei ŋulu alalaa akimuj, akoneneete ŋimaanikorin nooi. 48Kidyat Yosepu akimuj daadaŋ ŋina a ŋikaru a ŋikanikaarei a ŋulu alalaa akimuj anakwap a Ijipit, kiŋada lotaunio, kiŋada a ŋolotaun akimuj a ŋimaanikorin a ŋulu edunyito etaun ŋol. 49Kidyat Yosepu akimuj ŋina alalan nooi ŋina atya asinyon a anam, tojoŋo tari akipim etyae, anerae pa apedorit iŋes akipim.

50Ani eriŋa ŋikaru ŋulu a eron nyepona, aris Yosepu keuruu ŋisapa ŋiarei aneni ka Asenat, anakoku a Potipera a ŋolo arae esacaradoti a On. 51Tolimok Yosepu ekiro alokoku keŋ a ŋolokiyae Manase; anerae abu iŋes tema, “Ekesimuryak Akuj ayoŋ ŋican kaŋ daadaŋ ka ŋituŋa a ekal a papa kaŋ daadaŋ.” 52Tolimok iŋes ekiro alokoku keŋ a ŋolo a ŋiarei Epuraim; anerae abu iŋes tema, “Eketipitu Akuj ayoŋ anakwap a na a ŋina abunio oryamunia ŋican.”

53Todaunos ŋikaru ŋikanikaarei ŋulu aropakinitor akimuj elalaa anakwap a Ijipit. 54Kisyakis ŋikaru ŋulukanikaarei ŋulu a eron aponare ikwapei sek alimunitor Yosepu. Toyakaun eron nakwapin daadaŋ, nai ayai akimuj ŋina sek edyasyo nakwap a Ijipit daadaŋ. 55Ani enyami akoro ŋituŋa a Ijipit daadaŋ, kikaloikis ŋituŋa Parao aŋuna ka akimuj. Tolimok Parao ŋituŋa a Ijipit daadaŋ tema, “Apesi neni a Yosepu, kitiyata ŋuna ikilimokini iŋes iyes.” 56Aŋuna arisyo eron kelomu nakwap ŋin daadaŋ, toŋaa Yosepu ŋakais daadaŋ ŋuna ayai akimuj, togyelanak akimuj neni a ŋituŋa a Ijipit, anerae arono nooi eron anakwap a Ijipit; 57nabo daŋ, apotu ŋituŋa a ŋakwapin a daadaŋ potu neni a Yosepu, nakwap a Ijipit akigyel akimuj, anerae arono nooi eron anakwapin a daadaŋ.

Currently Selected:

Akisy. 41: NIB2008

Highlight

Copy