Akisy. 35

Toboŋo Yakob Besel

1Tema Akuj neni a Yakob, “Tonyou, kitipeiyo Besel kiboi a nen. Todukok Namuroet nen ŋina ka Akuj a ŋina abu totakanu neni kon apaki ŋina isiya iyoŋ aneni alokaato kon ke Esau.” 2Aŋun, abu Yakob tolimok ŋituŋa a ekal keŋ ka ŋituŋa daadaŋ ŋulu arukitotor iŋes tema, “Tocakasi nariet ŋakujo ŋunagelaanotin ŋuna iyakatar iyes. Kitaleutu ŋawat kus ka tonapa ŋilowi ŋice; 3ipotu nai oloto etipeiyosi Besel; ikotere ayoŋ adukokini nen Namuroet ŋina ka Akuj a ŋina abu ekeira ayoŋ apaki ŋina aryamunitor ŋican. Akuj ŋina abu torubak ikirukit ka ayoŋ aneni daadaŋ abu ayoŋ etor.” 4Aŋun, inakis ŋituŋa ŋakujo ŋuna ayakatar ikes daadaŋ ŋunagelae neni a Yakob. Inakis ŋikadoŋidoŋ kec daŋ neni a Yakob; kiwua Yakob ŋul daadaŋ alodiyete ekuyon ŋolo ayai Sekem.

5Ani eriŋa ikes ewosete, min ekabule lotaunio daadaŋ ŋulu aya nawaetin kec, aŋun, emam ituŋanan abu totupak ikes. 6Todolut Yakob ka ŋituŋa daadaŋ ŋulu arukito ka iŋes Lus (iŋes Besel) nakibois ŋina ayai Kanaan. 7Todukok Yakob Namuroet nen, tonyara ekiro a akibois a ŋin El Besel, #35:7 El Besel Iŋes atemar Akuj ŋina a Besel anerae arae nen abunio Akuj totakanunia neni a Yakob apaki ŋina arotokinio aneni alokaato keŋ. 8Apaki ŋin, totwana Debora ŋina apolouni Rebeka aneni keŋ; tonukae iŋes kwap ekuyon natiyaaret kwap Besel. Aŋun, aponi tonyarae ekiro a akibois a ŋin lokuyon ŋolo Alon-Bakus. #35:8 alon-Bakus Iŋes atemar ekuyon ŋolo igworore.

9Totakanu nabo Akuj neni a Yakob apaki ŋina abunio iŋes alo Padanaram. Kiterereŋ Akuj iŋes. 10Tema Akuj neni keŋ, “Erae ekiro kon Yakob; nyeriŋa nabo ikinyarao iyoŋ Yakob, nai ikinyarao iyoŋ Isirael.” Aŋun, abu Akuj tonyara ekiro keŋ Isirael. 11Tema Akuj neni keŋ, “Arae ayoŋ Akuj ŋina Etiron: Topit, tolalata ŋituŋa kon; elomunete aneni kon ŋituŋa ŋulu ka akwap a apei ka ŋituŋa ŋulu a ŋakwapin a ŋuna alalak, elomunete ŋirwosi aneni kon. 12Akainakini ayoŋ iyoŋ akwap ŋina abu oinak Aburaam ka Isaka, ainakini neni a ŋiletok kon ekaku kon.” 13Kimyek nai Akuj Yakob a nen anakibois a ŋina erworotor ka iŋes. 14Tosipok Yakob amoru nen nakibois ŋina abunio iŋes kirworikinotor ka Akuj; tobukok namoru epiini erae ainakinet, tobukok daŋ namoru ŋin akimyet. 15Tolimok Yakob ekiro a akibois a ŋina abunio Akuj kisirworya iŋes a ŋin Besel #35:15 Besel Iŋes atemar Akai ka Akuj

Akidouno a Benjamin ka atwanare a Rakel

16Towotokis ikes alo Besel; ani eriŋa elwaka iwadio alo Epurat, toryebakin Rakel akidoun. Toryebakin iŋes nooi. 17Ani eryeba iŋes nooi, tolimok akesidoununon iŋes tema, “Nyikuryaniar, anerae idouni iyoŋ tokona isapat ice.” 18Ani eriŋa etau keŋ itedukae (aŋuna alosyo akiridakin), abu tolimok ekiro a idya keŋ a ŋin Benoni, nai abu papa a idya tolimok ekiro a idya Benjamin. 19Totwan Rakel a nen, tonukae kidiŋ neni aya ikes ka Epurat (iŋes Betelem). 20Tosipok Yakob amoru kidiama alyal a Rakel; tari tokona eyai amoru ŋin neni ka alyal a Rakel. 21Towotok Isirael a nen kiŋaren, kigurok eema keŋ yaye aduketait ŋina aoyan alotaun ke Eder.

22Ani eriŋa Isirael iboi anakwap a ŋin, kebu Ruben tolot tolom Bila, apese a papa keŋ ŋina pa eisitae, kiira Isirael ŋakiro ŋun.

Ayakar Yakob ŋidwe ŋitomon ka ŋiarei: 23Ŋidwe a Lea ikes lu: Ruben iŋes lokoku a Yakob ŋolo kiyae, totupak Simeon, Lepi, Yuda ka Isakar ta Sebulon. 24Ŋidwe a Rakel ikes lu: Yosepu ka Benjamin. 25Ŋidwe a Bila aketiyan a Rakel ikes lu: Dan ka Naputali. 26Ŋidwe a Silpa aketiyan a Lea ikes lu: Gad ka Aser. Arae ŋul daadaŋ ŋidwe ŋulu abu Yakob touru alo Padanaram.

Atwanare a Isaka

27Bu Yakob neni a papa keŋ a Isaka a ŋolo ayai Mamure, kori Kirias-Araba (iŋes Eburon), neni koloŋ kiboitotor Aburaam ka Isaka. 28Apaki ŋin, arae ŋikaru a Isaka amiat ka ŋatomonikanikauni. 29Ekaku, totwana Isaka emojoŋit nooi elalak ŋikaru, ido yaasi iŋes ŋidwe keŋ ŋulusapa, Esau ka Yakob, tonuka neni anukitae ŋituŋa keŋ.

Currently Selected:

Akisy. 35: NIB2008

Highlight

Copy