Akisy. 34
34
Kikamu ekile Dina
1Akoloŋit apei, abu Dina nakoku a Yakob, ŋina auruunit Lea, tolot apeyo naberu ŋuna anakwap a Kanaan. 2Ani iŋolikini Sekem lokoku ke Eipiit a ŋolo anyaritae Amor, a ŋolo epukat akwap ŋin Dina, kikamu iŋes kituruwo aberu keŋ. 3Tominak Sekem Dina nakoku a Yakob nooi, toruwor apese ŋina amina iŋes, ido isirwori a arimao. 4Aŋun, abu Sekem tolimok papa keŋ Amor tema, “Kiitakinae ayoŋ apese na toruwor aberu kaŋ.”
5Ani iirari Yakob atemar enyasu Sekem nakoku keŋ Dina, aya ŋidwe keŋ ŋulusapa nacokor eyokiyete ŋibaren, kililiŋia Yakob ŋakiro ŋun akitodol ŋina aboŋunioto ikes lore anacokor. 6Tolot Amor papa a Sekem neni a Yakob akisirwor iŋes. 7Ani edolunete ŋidwe a Yakob ŋulusapa anacokor, kiirasi ŋakiro a Dina atipei. Toumokis ka toŋoa nooi, anerae kebu Sekem kitiya ŋuna a ŋileec aneni a Ŋisirael, aŋuna kebunio kikamunia nakoku a Yakob kituruwo aberu keŋ, torae bo ŋun ŋuna pa amaikina akitiya.
8Nai abu Amor kisirwor ikes tema, “Emina nooi Sekem lokoku kaŋ nakoku kus; ekelipit inakis Sekem kiit iŋes. 9Ogeutu akipotonokin anakiito ka isua, inakinae isua ŋidwe kus ŋulupesur, ido yaa iyes daŋ ŋidwe kosi ŋulupesur kiita. 10Eboiyoto kaapei, ido ipasae akwap na aŋuna kus; kiboiyoto ka kicurutata anakwap a na, toryamut ebari.” 11Tolimok Sekem daŋ papa a Dina ka ŋikaitotoi a Dina tema, “Kimyekinae ayoŋ oruwor ŋolo ajok aneni kus, ido ibore daadaŋ ŋini ikilimokinete iyes ayoŋ, akainakini iyes. 12Kiyatakisi lopite ŋolo icamitotor etyae ŋolo kiiset nakoku kus ka etyae ŋolo a ibore a ŋini emaikina ayoŋ olemu erae ainakinet, akainakini ayoŋ iyes ibore daadaŋ ŋini iitanete iyes. Inakinae ca iyes ayoŋ apese toruwor aberu kaŋ.”
13Aŋuna kebunio Sekem kinyasu Dina nakoku a Yakob, apotu ŋidwe a Yakob ŋulusapa kirworo amodiyo neni a Sekem ka papa keŋ Amor. 14Tolimokis ikes temasi, “Nyikipedori isua akitiya ŋun; nyeinio isua ekile ŋolo nyileŋeritae nakaato kosi, anerae eruwor ŋun ŋuna a ŋileec aneni kosi. 15Ecamunoi iwon erae kicamut iyes ŋakiro nu ebe: Kileŋerae ituŋanan daadaŋ ŋinisapat anakwap kus ikwa isua. 16Ikiinio isua iyes ŋidwe kosi ŋulupesur erae kitiyata iyes ŋun ka isua daŋ ikiomuni ŋidwe kus ŋulupesur toruwor ŋaberu kosi, eboikinos iwon kaapei oruworos ŋituŋa ŋipei. 17Nai ani pa kiwuap iyes ŋakiro kosi, tocamut akileŋerio, ikinyakari isua nakoku kosi, oloto a ne.”
18Kitalakasi ŋakiro kec Amor ka lokoku keŋ Sekem. 19Abu esorokit Sekem ŋolo etopolooritae nooi alokal kec nyeya apaki ŋina aoyan akitiya ŋun, anerae alakara iŋes nooi aŋuna anakoku a Yakob. 20Toloto Amor ka lokoku keŋ Sekem lopuke ŋolo a etaun kec akisirwor ŋituŋa ŋulu a etaun kec temasi, 21“Ekoneoko ŋituŋa lu aneni yok; emyekisi ikes kiboiyoto anakwap a na kicurutata, anerae elolom akwap na aŋuna kec daŋ; ooma ŋidwe kec ŋulupesur eiita ka iwon daŋ oinakisi ikes kiita ŋidwe yok ŋulupesur. 22Ŋakiro nu bon itacamunete ikes akiboi kaapei ka iwon oruworos ŋituŋa ŋipei: Ituŋanan ŋinisapat daadaŋ anakwap yok, emaikina kileŋerae ikwapei ileŋeritere ikes. 23Nyepedorete mono ŋaatuk kec ka ŋiboro kec ta ŋibaren kec ŋuluce daadaŋ aruwor ŋulu yok a? Ocamunos iwon ka ikes, ecamunete ikes akiboi kaapei ka iwon.” 24Tocamut ŋituŋa daadaŋ ŋulu alosito lopuke a etaun ŋakiro ka Amor ka lokoku keŋ Sekem, ido aponi kileŋerae ŋituŋa ŋulusapa daadaŋ alotaun.
Kinyaŋasi ŋikaitotoi a Dina ŋakiro anakaato kec
25Ani epete ŋirwa ŋiuni eriŋa ŋajemei eryebete ikes, tonyout ŋidwe a Yakob ŋulusapa ŋiarei, Simeon ka Lepi ŋulu arae ŋikaitotoi a Dina, tolemasi ŋileŋia kec, toloto kitijikis ŋituŋa a etaun a ŋol pa eyenete. Toara ŋikilyok daadaŋ. 26Toara Amor ka lokoku keŋ Sekem, kiriut Dina alokai a Sekem torotokinioto. 27Potu ŋidwe a Yakob ŋuluce ŋulusapa lotaun, toryamut ŋalyalin, tolema ŋiboro alotaun, anerae nen aponare kinyasunere nakaato kec. 28Tomyaasi ŋakinei, ŋaatuk ka ŋisigirya a ŋituŋa a etaun a ŋol. Yaasi ibore daadaŋ ŋini ayai lotaun ka lomanikorin. 29Yaasi ebari a etaun a ŋol daadaŋ, ŋidwe daadaŋ, ŋaberu daadaŋ, ibore daadaŋ ŋini ayai nakais, tolemasi kituruwosi ŋulu kec. 30Tema nai Yakob neni a Simeon ka Lepi, “Iyaut iyes neni kaŋ ŋatyokisyo; aŋuna ikitidiŋakineta iyes ayoŋ ka Ŋikanaani ta Ŋiperisi, ŋituŋa ŋulu ka akwap a na. Ekudyoko ŋituŋa kaŋ, ido kecunakin ŋituŋa ŋul ekesiiryata ayoŋ, akamunaaryo ayoŋ kaapei ka ekal kaŋ daadaŋ.” 31Nai toboŋokis ikes temasi, “Amaikina mono nakaato kosi itusubunio amalaat a?”
Currently Selected:
Akisy. 34: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
