Akisy. 31

Tosiya Yakob ekal keŋ ka ŋibaren keŋ aneni a Laban

1Apaki ŋin, kiira Yakob atemar ebasi ŋidwe a Laban ŋulusapa ebe, “Aya Yakob ibore daadaŋ ŋini erae ŋini a papa yok, abarya iŋes ibore daadaŋ ŋini sek arae ŋini a papa yok.” 2Toanyu daŋ Yakob atemar pa amina Laban iŋes apaki ŋin lopite ŋolo sek aminar ekiŋaren. 3Tema nai Ekapolon neni a Yakob, “Toboŋo nakwap atapapaa kon ka neni a ŋiyeneta kon, ikirukit ayoŋ ka iyoŋ.” 4Aŋun, abu Yakob kiyakiya ituŋanan anyarare Rakel ka Lea nariet neni ayakar iŋes ŋibaren. 5Tolimok ikes tema, “Aanyu ayoŋ atemar nyeriŋa papa kus akamina ayoŋ lopite ŋolo paaran akaminar. Nai ŋinapei nyimyekina Akuj apapa kaŋ ayoŋ. 6Iyenete iyes atemar adau ayoŋ akitiya neni a papa kus ka agogoŋu kaŋ a daadaŋ, 7nai akamodiki ayoŋ papa kus, elocok eropit kaŋ ŋarwa ŋatomon, nai nyecamakina Akuj iŋes akawani ayoŋ. 8Ani elimuni Laban ebe, ‘Eruwor ŋibaren ŋulukoliyek eropit kon,’ touryata ŋibaren daadaŋ nenikol bon; ani elimuni Laban ebe, ‘Eruwor ŋibaren ŋulumeriyek eropit kon,’ touryata ŋibaren daadaŋ nenimeri. 9Aŋun, alema Akuj ŋibaren aneni a papa kus, ido akainaki ayoŋ.”

10Apaki ŋina asupotor ŋibaren, abu ayoŋ eruja, anakiruja kaŋ, abu eŋoliya kidiama eŋolik ŋikorwa ŋulu asupito ŋibaren erae ŋulububuwo, ŋulukoliyek ka ŋulumeriyek. 11Okonyar nai emalaika ka Akuj ayoŋ anakiruja tema, “Yakob” eyi ayoŋ otema, “Ayai!” 12Tosodi tema, “Kiŋoliu kidiama toanyuwa ŋikorwa daadaŋ ŋulu esupito ŋibaren erae ŋulububuwo, ŋulumeriyek ka ŋulukoliyek. Acamak ayoŋ nu kitiyakin, anerae eŋolik ayoŋ ŋakiro daadaŋ ŋuna itiyae Laban neni kon. 13Arae ayoŋ Akuj a Besel, Akuj a akibois a ŋina ibu iyoŋ tosipok amoru, ido tobukok akimyet kidiama keŋ, ido kikoŋ neni kaŋ. Tonyou tokona anakibois a na atipei, toboŋo nakwap ŋina ikidounere iyoŋ.” 14Tolimokis Rakel ka Lea Yakob temasi, “Emam ibore idio ŋini irumyo isua alokal a papa kosi. 15Ikimarit iŋes isua ikirae ŋagelaanotin, anerae adau iŋes akipotor isua, ido erika ŋisiliŋa ŋulu ainio iŋes aŋuna kosi. 16Ibore daadaŋ ŋini alemu Akuj aneni a papa kosi, erae ŋini kosi ka ŋidwe kosi; aŋun, kitiya ŋuna ikilimok Akuj iyoŋ.”

17Aŋun, abu Yakob torotok, kitodokak ŋidwe keŋ ka ŋaberu keŋ lokaala; 18tomyaa ŋibaren keŋ daadaŋ, ya ŋiboro keŋ daadaŋ ŋulu kebu toryamu a nen. Tomyaa ŋibaren ŋulu erae ŋulu keŋ bon, ŋulu kebu toryamu alo Padanaram. Towot nakwap ŋina a Kanaan neni a papa keŋ.

19Apaki ŋin, alosit Laban akitub ŋajul a ŋamesekin keŋ. Aŋun, abu Rakel kisitiya apaki ŋin akokoiyarya ŋakujo ŋuna a ekal a papa keŋ. 20Tomodik Yakob Laban ŋolo anakwap ka Aramea, aŋuna pa abunio tolimok iŋes atemar acamit arotokin. 21Aŋun, abu torotok, ya ibore keŋ daadaŋ. Abu iŋes todok aŋolol ŋina enyaritae Eupurate, tolot lowae ŋolo a ŋikamukumukui ŋolo ka akwap a ŋina enyaritae Gilead.

Todita Laban Yakob alorot

22Ani epete ŋirwa ŋiuni, tolimokinae Laban atemar asii Yakob. 23Ani iirari Laban ŋun, tolemu ŋikilyok ŋulu arae ŋiyeneta keŋ, totupakis erot a Yakob, todol ŋirwa ŋikanikaarei etupito, toryamut ikes Yakob anakwap a ŋina a ŋikamukumukui a ŋina enyaritae Gilead. 24Ani nakwaare, bu Akuj anakiruja neni a Laban a ŋolo anakwap a ŋina ka Aramea tema, “Tocoite ilimokini Yakob ŋakiro ŋadi, ŋuna ajokak, kori ŋuna aronok.”

25Todita Laban Yakob alorot, apaki ŋina arisyo kelomya ka kigurok eema Gilead, nakwap ŋina a ŋikamukumukui. Kigurokis Laban daŋ ka ŋiyeneta keŋ ŋiemae kec nakwap ŋina a ŋikamukumukui ŋin. 26Kiŋit Laban Yakob tema, “Anukiro nu ŋuna itiya iyoŋ? Idau iyoŋ amodikin ayoŋ, ido iya ŋidwe kaŋ ŋulupesur ikwapei ŋirikon kon alojie. 27Kaanukiro isiya ka ikiŋalaa iyoŋ ayoŋ torotok ekililiŋat? Kekemyekinit ayoŋ iyoŋ tolot ilakara ka keeitoe apaki ŋin a ŋiburin ka ŋagitae. 28Kaanukiro pa ikimyekinia iyoŋ ayoŋ onu ŋipapae ka ŋidwe kaŋ etolot emam ŋace? Idau iyoŋ akitiya ŋakiro ŋuna ka abaŋao. 29Ayakar ayoŋ apedor akiwan iyoŋ; nai abu Akuj a papa kon kirwor neni kaŋ bien nakwaare tema, ‘Tocoite ilimokini Yakob ŋakiro ŋadi, ŋuna ajokak, kori ŋuna aronok.’ 30Tari ŋina amaikina iyoŋ tolosyo aŋuna ikiburitor nooi ekal a papa kon, nyo ikokoiyarya iyoŋ ŋakujo kaŋ.” 31Toboŋok Yakob Laban tema, “Akuryana ayoŋ, anerae atami atemar ikidemari iyoŋ ayoŋ atanakoku kon ka agogoŋu. 32Nai ituŋanan daadaŋ ŋini iryamuni iyoŋ eyakar ŋakujo kon, nyemaikina toyar. Alokiŋaren ŋiyeneta yok, kiwaru iyoŋ elope ibore kon ŋini ayakar ayoŋ, ido tolema.” Apaki ŋin, pa ayeni Yakob atemar kekokounit Rakel ŋakujo a Laban.

33Aŋun, abu Laban toloma loeema a Yakob, a Lea ka ŋolo a ŋaketiyak a ŋunaarei, nai abu nyeryamu ŋakujo. Toloma aloeema a Lea tolot loeema a Rakel. 34Kerae Rakel kelemunit ŋakujo ŋuna a ekal a Papa keŋ, kiwuakinit iŋes ikes nisaaja ŋini a ekaal ŋini eboiyo iŋes. Kiwar Laban ŋakujo keŋ loboro daadaŋ aloeema, nai nyeryamu jik. 35Tema Rakel neni a papa keŋ, “Kisyoni ayoŋ ekapolon kaŋ aŋuna pa awoya ayoŋ alokiŋaren kon, erae aŋuna ayakar ayoŋ lolap iŋes pa awoya.” Abu Laban kiwar ŋakujo ŋuna a ekal keŋ, nai nyeryamu.

36Apaki ŋin, toŋo Yakob kitepegak Laban kiŋit tema, “Nyo asecit ayoŋ? Anisecit etiya ayoŋ ŋina ikiwuapya iyoŋ ayoŋ a aryenyeo? 37Idau iyoŋ tokona akiwar ŋakujo kon aloboro kaŋ daadaŋ, nyo iryamu iyoŋ ŋini erae ŋini a ekal kon? Kiwuak ne, kiŋaren ŋiyeneta kon ka ŋulu kaŋ, kimyek ikes totubo ŋakiro aŋuna yok a ŋiarei. 38Adau ayoŋ akiboi ka iyoŋ ŋikaru ŋatomoniarei, emam ŋamesekin, kori ŋamee kon ŋuna apotu kiyecut, nyenyama ayoŋ ŋimeesekin a ŋakinei kon. 39Nyeyauna ayoŋ neni kon ibarasit idio ŋini enyamito ŋityaŋ, nai atacenene ayoŋ elope ŋul. Ikitatacenene iyoŋ ayoŋ ŋibaren kon ŋulu akokoiyanaryo naparan, kori nakwaare. 40Ekote ŋakiro ne aneni kaŋ: Abu akoloŋ okonomenenee ayoŋ naparan, okonyamenenee akaterot nakwaare ka adaunun ŋajo anakonyen kaŋ. 41Ŋikaru ŋulutomoniarei lu daadaŋ, ŋulu eboiyo ayoŋ alokal kon, abu etiya neni kon ŋikaru ŋitomon ka ŋiomwon aŋuna a ŋidwe kon a ŋulupesur a ŋuluarei ka ŋikaru ŋikanikapei aŋuna a ŋakinei kon, ido ilocok iyoŋ eropit kaŋ ŋarwa ŋatomon. 42Ani kerae nyikirukit ayoŋ ka Akuj a papa kaŋ, Akuj ŋina ka Aburaam ka kerae nyetopoloorit ayoŋ Isaka, kire jik, kikiritarit iyoŋ ayoŋ aneni kon eororete ŋakan. Abu Akuj ikisibura iyoŋ bien nakwaare, anerae abu kiŋolik ŋican kaŋ ka etic ŋolo etiya ayoŋ a ŋakan kaŋ.”

Tocamunos Laban ka Yakob

43Toboŋok Laban Yakob tema, “Erae ŋidwe ŋulupesur lu ŋulu kaŋ, ŋidwe kec daŋ erae ŋulu kaŋ, ŋakinei daŋ erae ŋuna kaŋ ka ibore en daadaŋ ŋini ite iyoŋ erae ŋini kaŋ. Nai anu mono emaikina ayoŋ etiya nakuwar na aŋuna a ŋidwe kaŋ a ŋulupesur a lu, kori aŋuna a ŋidwe kec a ŋulu auruut ikes? 44Bua tokona, ewuakisi acamunet yok; toruwor acamunet ŋin esuuda aneni yok.” 45Aŋun, abu Yakob tolemu amoru, tosipok kwap esibit epir. 46Tema neni a ŋiyeneta keŋ, “Kirirautu ŋamoru,” kiriraut ikes ŋamoru totukokis; ido kimuja a nen alodiyete atukot a ŋamoru. 47Tonyara Laban atukot a ŋamoru a ŋun Yegar-Sudusa. #31:47 Yegar-Sudusa Iŋes atemar atukot ŋina erae esuuda Tonyara Yakob daŋ atukot a ŋamoru a ŋun Galeed. #31:47 Galeed Iŋes atemar atukot ŋina erae esuuda 48Tema Laban, “Erae atukot a ŋamoru na esuuda kaŋ ka iyoŋ nakuwar na.” Aŋun, abu iŋes tonyara ekiro a atukot a ŋamoru a ŋun Galeed, 49tosodi tonyara ekiro a amoru a ŋina asipokini iŋes esibit epir ebe Misipa, #31:49 Misipa Iŋes atemar neni kiteet anerae abala iŋes, “Ikite Ekapolon ayoŋ ka iyoŋ, apaki tari ŋina nyikirukitor. 50Ani kiteryamu iyoŋ ŋidwe kaŋ ŋican, kori kiryamu iyoŋ ŋaberu ŋace kiyatak lodwe kaŋ, erae Akuj esuuda yok tari kemam ituŋanan ŋini ikirukit ka iwon a ne.”

51Tolimok nai Laban Yakob tema, “Kiŋolik atukot a ŋamoru na ka kiŋolik amoru ŋina esipo na, ŋuna ewuak ayoŋ kidiŋ yok. 52Erae atukot a ŋamoru na esuuda ka ŋina esipo daŋ erae esuuda ŋolo nyalunyunor ayoŋ anatukot a ŋamoru a na neni kon ka iyoŋ daŋ nyilunyunor anatukot a ŋamoru ka anamoru a ŋina esipo neni kaŋ, owanas. 53Elipi ayoŋ Akuj ŋina ka Aburaam ka Naor, Akuj ŋina a papa kec totub ŋakiro yok.” Apotu ŋakiro ŋun kisikoŋo Yakob anakerit Papa keŋ Isaka. 54Tolemu Yakob amuronot anakwap a ŋina a ŋikamukumukui a ŋin, tonyarau ŋiyeneta keŋ nakimuj. Kedaut akimuj, topero nen akuwar ŋin.

55Ani taparacu iwalari, tonyou Laban, tonu ŋipapae keŋ ka ŋidwe keŋ ŋulupesur ŋul, kiterereŋ, ido torotok toboŋo lore keŋ.

Currently Selected:

Akisy. 31: NIB2008

Highlight

Copy