Awos. 4

Ŋakujuwuanisya ŋuna etiyae Moses

1Tolimo nai Moses Akuj tema, “Ani bo pa kecamut Ŋisirael akinup ŋakiro kaŋ, kori pa kecamut apupokin ŋuna erworo ayoŋ, ido temasi, ‘Nyetakanuna Ekapolon neni kon.’ Anukiro itiyakin?” 2Kiŋit Ekapolon Moses tema, “Nyo ibore ŋin, ŋini itiŋit iyoŋ?” Toboŋok iŋes tema, “Ebela.” 3Tema Ekapolon neni keŋ, “Kimasak ebela ŋol kwap.” Aŋun, abu Moses kimasak ebela kwap, ido abu ebela ŋol toruwor emun, kikutukutoo Moses aneni a emun a ŋol. 4Tema nai Ekapolon neni a Moses, “Kiopeiyo akan kon kikamu, nai meere anakou.” Aŋun, abu Moses kiopeiyo akan keŋ, kikamu emun, ido abu toruwor ebela anakan keŋ. 5Tema Ekapolon, “Kitiya ŋakiro ŋun, ikes itunupete Ŋisirael atemar kebu totakanu neni kon Ekapolon Akuj atapapaa kec, Akuj a Aburaam, Akuj a Isaka ka Akuj a Yakob.”

6Tema nabo Ekapolon neni a Moses, “Kirepa akan kon lolou kon anatorobu.” Kirepa Moses akan keŋ lolou natorobu, ani elemuni kiŋa, toryamu kikamu atapon akan keŋ, kekwaŋiar kya. 7Tema nai Ekapolon neni keŋ, “Kinyakak akan kon lolou kon.” Aŋun, abu Moses kinyakak akan keŋ lolou keŋ, ido ani elemuni kiŋa, toryamu kitaŋaleun, kikwaanikin ka akuwan keŋ neni ce. 8Tema nai Ekapolon neni keŋ, “Ani pa kenupa ikes ŋuna ibala iyoŋ, kori pa kenupa anakujuwuanut a ŋina ke ekiŋaren, epedorete akinup anakujuwuanut a ŋina a ŋaarei. 9Ani pa kenupa ikes ŋakiro kon anakujuwanisya a ŋunaarei a ŋun, kori pa kiirasi ŋuna ibala iyoŋ, tooku ŋakipi ŋadi anaŋolol Nile, tobukok kwap neni aonon. Eruwor ŋakipi ŋun ŋaokot epete kwap.”

10Abu nai Moses tema neni a Ekapolon, “Okoe Ekapolon, nyapedorit ayoŋ erwori ejok ŋinapei koloŋ, tari tokona apaki na ŋina irworor iyoŋ neni a eketiyan kon. Eapi ayoŋ ŋakiro erworo ka aŋajepana ayoŋ.” 11Kiŋit nai Ekapolon iŋes tema, “Ŋae ainakini ituŋanan erwor? Ŋae ituruwonori iŋes ŋini nyirworo, kori ŋini ekiŋimana, ŋini ekyenyi, kori ŋini emudukana? Erae ayoŋ Ekapolon ainakini. 12Torotok tokona, ekeŋarakini ayoŋ iyoŋ topedo erwor ka akalimokini ayoŋ iyoŋ ŋuna emaikina tolimu.” 13Nai abu Moses tema, “Okoe Ekapolon kaŋ, ekemaimai ayoŋ iyoŋ, kiyakiya ituŋanan ice.” 14Kitoŋoa nai ŋakiro a Moses ŋun Ekapolon tema, “Ani bo lokaato kon Aron ŋolo erae Elepit? Ayeni ayoŋ atemar irworo iŋes ejok. Ebunit iŋes alorot iryamunosi ka iyoŋ, ido elakar etau keŋ apaki ŋina ikiŋolikinia iŋes iyoŋ. 15Itemokino iyoŋ kirwor neni ka Aron, tolimok ŋakiro ŋuna emaikina iŋes kirwor. Ekeŋarakini ayoŋ iyes ka eketatami ayoŋ iyes ŋuna emaikina kitiyata. 16Eruwor Aron irworo aŋuna kon isirwori ŋituŋa, elimuni iŋes ŋakiro ŋuna amaikina iyoŋ tolimu ka ikokini iyoŋ Akuj aneni keŋ. 17Nai ya ebela lo ŋolo itiŋit iyoŋ, kitiyaa ŋakujuwuanisya.”

Toboŋo Moses Ijipit

18Tolot nai Moses a nen neni a Yesiro alokamuran keŋ tema, “Ekemaimai ayoŋ iyoŋ papa, kimyekinae ayoŋ oboŋo neni a ŋiyeneta kaŋ nakwap a Ijipit eŋolik erae keriŋa eyarete.” Tema Yesiro neni a Moses, “Ape a ekisil.” 19Aris sek Ekapolon kelimoki Moses alo Midian ebe, “Toboŋo Ijipit, anerae atwaka daadaŋ ŋulu paaran acamito akiar iyoŋ.” 20Aŋun, abu Moses torotokinio aberu keŋ ka ŋidwe kec ŋulusapa, kitodokak ikes losigirya toboŋosi Ijipit. Totiŋ iŋes ebela ŋolo alimokinit Akuj iŋes atemar totiŋ.

21Tema Ekapolon neni a Moses, “Ani iboŋori iyoŋ Ijipit, emaikina kitiya alokiŋaren a Parao ŋakujuwuanisya daadaŋ ŋuna akainak ayoŋ iyoŋ apedor akitiya. Nai eturuwori ayoŋ iŋes ŋolo egogoŋ akou, ikotere nyecamak Ŋisirael toloto anakwap keŋ. 22Emaikina nai iyoŋ tema neni a Parao, ‘Ŋakiro ŋuna irworo Ekapolon ikes nu: Erae Isirael lokoku kaŋ ŋolo kiyae, 23ido abu ayoŋ okolimok iyoŋ akimyekin lokoku kaŋ tolot, ikotere ilipi neni kaŋ, nai ibu iyoŋ nyicamak iŋes tolot; aŋun, aari ayoŋ lokoku kon ŋolo kiyae.’ ”

24Ani eriŋa ikes eya lorot eperete iwace, kiryamun Ekapolon ka Moses, kikatak Ekapolon akiar Moses. 25Nai abu Sipora tolemu amoru ŋina akwanan kileŋerya lokoku keŋ, ido totapak amuny ŋina atubun nakejen a Moses tema, “Kire jik, irae iyoŋ ekile kaŋ ŋolo irae a ŋaokot!” 26Aŋun, abu Ekapolon toesik Moses, apaki nai ŋin atemarya Sipora ebe, “Ekile kaŋ ŋolo a ŋaokot anakileŋeryo.”

27Tema Ekapolon neni ka Aron, “Ape naloŋisat kisiryam Moses.” Aŋun, abu Aron tolot; kiryamunos ka Moses lomoru ŋolo ka Akuj, tonu Aron Moses. 28Kitatamik Moses Aron ŋakiro a Ekapolon daadaŋ ŋuna eyakitor Ekapolon iŋes. Kitatamik tari ŋakujuwuanisya ŋuna abu Ekapolon kicik iŋes akitiya. 29Torotokis nai Moses ka Aron a nen, toloto tocunakis ŋikasikou a Ŋisirael daadaŋ. 30Tolimok Aron ŋituŋa ŋakiro daadaŋ ŋuna kebu Ekapolon tolimok Moses, ido kitiya ŋakujuwuanisya alokiŋaren ŋituŋa. 31Tonupa ŋituŋa ŋakiro ŋun; ani iirarete ikes atemar adau Ekapolon akiirar akigworo a Ŋisirael ka eŋolik ŋican ŋulu eryamunito ikes, apotu Ŋisirael toryediko kijuuroto kilipa.

Currently Selected:

Awos. 4: NIB2008

Highlight

Copy