Awos. 1
1
Tobolyare Ŋisirael alo Ijipit
1Ŋirorwa a ŋidwe a Yakob a ŋulusapa, a ŋulu arukorete ka iŋes Ijipit, erukito ŋinituŋanan ka ekal keŋ ikes lu: 2Ruben, Simeon, Lepi ka Yuda; 3Isakar, Sebulon ka Benjamin; 4Dan, Naputali, Gad ka Aser. 5Arae ekimar a ŋiletok a Yakob daadaŋ ŋatomonikanikaarei. Aris Yosepu apaki ŋin keberar Ijipit. 6Ekaku, abu Yosepu totwana, ido apotu ŋikaitotoi keŋ daŋ daadaŋ totwaka ka abu anyamet ŋin daadaŋ kirikar. 7Nai apitaka Ŋisirael, ido apotu topitut nooi, toruworos ŋituŋa ŋulu alalak, kilelebunos nakwap a Ijipit.
Toryenyaanikis Ŋijipitian Ŋisirael
8Ekaku, min lokicoloŋ erwosit ece ŋolo abu kipuka Ijipit. Pa ayeni ekepukan ŋol Yosepu. 9Tema erwosit ŋol neni a ŋituŋa keŋ, “Kiirasi mono iyes ŋakiro nu, ‘Alalata tokona Ŋisirael nooi a ne, ido egogoŋ akilo iwon.’ 10Etiyata ka aosou ŋadi ŋuna aronok neni kec, ikotere ikes nyepitut nooi, ido ani kejikinoi iwon ka ŋimoe yok, eriyete ikes ka ŋimoe yok ikitijioto iwon, ido tosiwa anakwap yok.” 11Aŋun, apotu ikes toseut ŋikapolok ŋulu epolokinete ŋipi alotic a ŋolo ereikinio ŋipi kitiyata. Kituduko ŋikapolok ŋul Ŋisirael ŋitaunio ŋiarei Pisom ka Ramases ŋulu ewuanakini Parao #1:11 Arae Parao ekiro ŋolo anyaritere ŋirwosi a Ijipit. ŋamuja ŋuna ka akwap keŋ. 12Nai tari daŋ ŋina esicanitere Ŋisirael, apotu topitut nooi kielakin nakwap a Ijipit, ido apotu Ŋijipitian tokuryaketa nooi aŋuna a Ŋisirael. 13Apotu ŋun inakis Ŋijipitian aryenyaanikin Ŋisirael nooi kitiŋanakis etic. 14Kitakadakis Ŋijipitian Ŋisirael nooi aŋuna aponiata kitiŋakis ikes etic ŋolo agogoŋon nooi; ikwapei amuna ecoto ka akiram ŋamatapali ta ŋiticisyo ŋice ŋulu a ŋimanikorin. Aryanyaaka Ŋijipitian nooi isitiyaete Ŋisirael ŋiticisyo ŋuluce daadaŋ.
15Tema erwosit a Ijipit neni Sipira ka Pua Ŋaburaniyae ŋuna esidoete ŋaberu, 16“Ani isidounete iyes ŋaberu ŋuna erae Ŋaburaniyae ka kiŋolikis esaa ŋolopei idounio iŋes atemar erae ikoku isapat, emaikina toarae, nai ani kerae ipese, emaikina kimyekis toyar.” 17Nai akerito ŋaberu ŋun Akuj, ido apotu nyitiyata ŋuna abala erwosit a Ijipit ikes kitiyata; apotu kimyekis ŋidwe ŋulusapa toyara. 18Abu nai erwosit ŋol tonyarau ŋaberu ŋun kiŋit ikes tema, “Kaanukiro itiyaata iyes ŋakiro nu? Kaanukiro imyekiniata iyes ŋidwe ŋulusapa toyara?” 19Toboŋokis ŋakesidook ŋun Parao temasi, “Nyikwaan Ŋaburaniyae ka Ŋajipitian, egogoŋ Ŋaburaniyae, idounete make eriŋa akesidoon nyedolo neni kec.” 20Aŋun, abu Akuj torimaanik ŋakesidook ŋun; ido apotu ŋituŋa kec Ŋiburaniyae topitut tolalaketa nooi. 21Aŋuna nai aponiata ŋakesidook ŋun tokeryata Akuj, abu Akuj inak ikes ŋidwe kec a ŋakulepek. 22Abu nai Parao kicik ŋituŋa keŋ daadaŋ tema, “Ikoku ŋinisapat daadaŋ ŋini euruunito Ŋiburaniyae, emaikina iyes kimasakis naŋolol Nile, nai kimyekisi ŋulupesur toyara.”
Currently Selected:
Awos. 1: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
