Ŋitic. 9

Toruwor Saulo ekanupan

(Ŋitic. 22:6-16, 26:12-18)

1Nai ariŋa Saulo emunikinit akitukuryan ka akiar ŋikasyomak ŋulu ke Ekapolon Yesu. Abu iŋes tolot neni ke Esacaradoti a ŋolo Apolon nooi 2akiŋit ŋabaruwae ŋuna itoodiunito atemar ecamakinitae iŋes alosit losinagogae ŋulu alo Damasko, ikotere ani keryamu ituŋanan idio ŋini enupit Kristo, ekile kori aberu, kikama ikes, toen ya Yerusalem. (Anyaritae daŋ ŋikewuapak a Kristo, “Ŋulu ke Erot.”)

3Ani eapiyari iŋes Damasko, toŋesun atipei akica anakuj, kinuaku neni ayai iŋes. 4Kimasar iŋes kwap, kiira etoil ebala neni keŋ, “Saulo, Saulo! Kaanukiro ikisicanitor iyoŋ ayoŋ?”

5Kiŋit Saulo tema, “Ŋae iyoŋ Ekapolon?” Toboŋok etoil tema, “Arae ayoŋ Yesu ŋolo isicanit iyoŋ. 6Nai tokona, tonyou toloma lotaun itolimokin ŋuna itemokino iyoŋ kitiya.”

7Towua ŋikilyok ŋulu arukito ka Saulo kililiŋa cek; apupete ikes etoil, nai nyeanyuwasi idiotuŋanan. 8Tonyou Saulo alokwap, nai ani eŋaari ŋakonyen keŋ, nyiŋolik idiobore. Aŋun, torikosi ikes iŋes tooma Damasko. 9Ya iŋes ŋirwa ŋiuni emudukana, pa imuji kori emasi.

10Ayai Damasko ekasyoman a Yesu ŋolo anyaritae Anania. Tonyara Ekapolon iŋes anatakanikinet tema, “Anania!” Toboŋok iŋes tema, “Ekapolon, ayoŋ lo.”

11Tolimok Ekapolon iŋes tema, “Tonyou tolot lorukude ŋolo enyaritae, ‘Erukude ŋolo Idiiri,’ kiŋitu alokai a Yuda ekile ŋolo alo Taso, ŋolo enyaritae Saulo. Ilipi iŋes. 12Aanyu iŋes anatakanikinet ekile ŋolo enyaritae Anania, ebuni akidokokin ŋakan neni keŋ, ikotere ekienyunia nabo.”

13Toboŋok Anania tema, “Ekapolon, akalimonokis ayoŋ ŋituŋa ŋulu alalak ŋakiro ŋuna ke ekile a ŋol ŋuna aronok nooi, ŋuna etiya iŋes lokanupak kon alo Yerusalem. 14Abu iŋes Damasko ka apedor a ŋina eryamunit iŋes alosacaradotin a ŋulu apolok, akikam daadaŋ ŋulu enyarito ekiro kon.”

15Nai tolimok Ekapolon Anania tema, “Tolot, anerae erae iŋes eketiyan kaŋ ŋoloseuna, ŋolo iteyenuni ekiro kaŋ lobukui ŋulu nyerae Ŋiyudayan ka lorwosi kec ta lotuŋa ŋulu a Isirael. 16Etoodikini ayoŋ elope iŋes etyae ŋolo a ŋican a daadaŋ a ŋulu itemokino iŋes toryamu aŋuna ke ekiro kaŋ.”

17Torotok nai Anania, toloma kai. Kidokok ŋakan neni keŋ tema, “Lokaato Saulo, ekeyakuu ayoŋ Ekapolon Yesu, ŋolo abu totakanu neni kon alorot apaki ŋina ibunio iyoŋ. ekeyakuu iŋes ayoŋ, ikotere tokienyu iyoŋ nabo, ikilelebikin Etau ŋolo Asegan.” 18Atipei toraraun ibore ŋini ekoni ŋakabebekwa a ekolya anakonyen a Saulo, tokienyu iŋes nabo. 19Tonyou nai iŋes, kibatisae. Kimuj iŋes, ido togogoŋu akuwan keŋ.

Tolimonok Saulo ŋakiro a Yesu alo Damasko

Kiboi nai Saulo ŋirwa ŋidi alo Damasko erukito ka ŋikasyomak. 20Kisyak iŋes atipei alimonokin alosinagogae ŋakiro a Yesu ebala, “Erae Yesu Lokoku ka Akuj.”

21Toumokis daadaŋ ŋulu apupete iŋes, kiŋitiŋitas make temasi, “Meere mono ekile lopei lo esicani alo Yerusalem ŋulu anyarito ekiro lo a? Nyebunit ba ca iŋes akitiya ŋunapei a ne--akikamar ikes akiya neni a ŋisacaradotin a ŋulu apolok a?”

22Nai togogoŋior nooi apiiryanut a Paulo analimonokin keŋ, alopite a ŋolo etoodiunia atemar Yesu iŋes erae Kristo; kitataaŋaŋ Ŋiyudayan ŋulu alo Damasko.

23Ani kelunyarosi ŋirwa ŋulu alalak, totukut Ŋiyudayan akiar Saulo; 24nai abu Saulo toyenu ŋuna atukosi ikes. Kirojo ikes ŋikekya ŋulu ke etaun apaaran ka akuwar, ecamito akiar iŋes. 25Nai apotu ŋikasyomak keŋ nakwaare yaasi iŋes kisitoro loole ŋolo ka arwatata, kiyooliyosi iŋes kwap a ebukit.

Saulo alo Yerusalem

26Bu Saulo Yerusalem, kikatak akiruk ka ŋikasyomak a Yesu, nai tokera ikes daadaŋ iŋes, anerae pa anupito ikes atemar erae iŋes ekasyoman kire. 27Nai ya Baranaba iŋes Lokiyakia. Tolimok ikes epite ŋolo keanyunia Saulo alorot Ekapolon, ŋolo abu kirwor neni keŋ ka epite ŋolo kelimonokinia Saulo alo Damasko alokiro a Yesu pa ekuryana. 28Aŋun, toruko Saulo ka ikes alo Yerusalem, tolimonok a nen daŋ alokiro ke Ekapolon pa ekuryana. 29Kirwor iŋes ka topeganakin daŋ ka Ŋiyudayan ŋulu erworosi Ŋagirik, nai ewarito ikes akiar iŋes. 30Ani eyenunete ŋikaitotoi ŋun, yaasi ikes iŋes Kaisaria, kitoloto lotaun ŋolo anyaritae Taso.

31Arae epite ŋol abunio akinapakin lokanupak ŋulu alo Yudeya, Galileya ka Samaria. Abu Etau ŋolo Asegan kitogogoŋ ka kisimukek ŋikanupak, kiyatakin ekimar kec, kiboiyoto ekerito Ekapolon.

Petero alo Lidda ka Yoppa

32Kimaniman Petero akwap ŋin daadaŋ, tolot daŋ aanyun ŋituŋa ŋulu ka Akuj ŋulu aya Lidda. 33Toryamu iŋes a nen ekile ŋolo anyaritae Aenea, ŋolo kebu ya ŋikaru ŋikanikauni eperi alokitaada, aŋuna alilimiyoritotor ŋakoyo kaapei ka akuwan keŋ. 34Tolimok Petero iŋes tema, “Aenea, ikitaŋaleu iyoŋ Yesu Kristo, tonyou, topetak ekitaada kon.” Atipei, tonyou Aenea. 35Toanyuwasi ŋituŋa daadaŋ ŋulu aya Lidda ka Saron iŋes eŋale; kibelekinos, tonupa Ekapolon.

36Ayai Yoppa akanupan ŋina anyaritae Tabisa. (Anyaritae ekiro keŋ a Ŋagirik Dorka, iŋes atemar “Agete.”) Etiyae iŋes ŋuna ajokak akiŋaranakin ŋikulyak. 37Apaki ŋin, abu iŋes todyakakin, totwan. Kilotasi ikes akuwan keŋ, kiperikis nagule ŋina alokidiama. 38Keris ŋikasyomak kiirasi atemar ayai Petero Yoppa, ido aŋuna aapiya Lidda alo Yoppa, kiyakiyasi ikes ŋikilyok ŋiarei akimaima iŋes temasi, “Okoe, kiwonyu neni kosi atipei.” 39Torukosi nai Petero ka ikes. Ani edoli, yaarae nagule ŋina ayai kidiama. Awuasi ŋapuseru daadaŋ alodiyete Petero, kigworos ka kitoodikis iŋes ŋikiteiteyo ka ŋikotyo ŋulu kitiyauni Tabisa eriŋa erukito ka ikes. 40Kitoloma Petero ikes daadaŋ kiŋa. Toryedik kilip, toboboŋ neni aperyo akuwan tema, “Tabisa, tonyou!” Toŋaa iŋes ŋakonyen keŋ, ani iŋolikini iŋes Petero, tonyou, kiboikin. 41Ya Petero akan, kitonyou iŋes. Tonyarau nai iŋes ŋikanupak ka ŋapuseru kipotok Tabisa eyari neni kec. 42Toyenunae ŋakiro nu alo Yoppa daadaŋ, tonupa ŋituŋa ŋulu alalak Ekapolon. 43Kiriya Petero ŋirwa ŋulu alalak alo Yoppa, iboi aneni a Simoni, a ŋolo emanyimanyi ŋilowi a ŋityaŋ.

Currently Selected:

Ŋitic. 9: NIB2008

Highlight

Copy