Ŋitic. 4

Petero ka Yoana alokiŋaren Atukot

1Ani eriŋa Petero ka Yoana isirworete ŋituŋa, todolut ŋisacaradotin ka ekapolokiniton ŋiketeok ŋulu ka Akai ka Akuj ta Ŋisadukayon. 2Aŋoito ikes, anerae etatamete ka eseraete Ŋikiyakia ŋuluarei ŋul ŋakiro ŋuna ka ayarun alokatwak aŋuna abaakatar ayaru Yesu. 3Kikamunae nai ikes, togolokinoe mabus akitodol taparacu, anerae abu towar. 4Nai apotu ŋituŋa ŋulu alalak, ŋulu apotu kiirasi ŋakiro a Ŋikiyakia tonupa; toapik ekimar a ŋikilyok ŋalipyo ŋakan.

5Ani iwalari, potu ŋikepukak ŋulu a Ŋiyudayan ka ŋikatukok ta ŋiketatamak a Ŋikisila tocunakinos Yerusalem. 6Kiryamiryama ikes ka Esacaradoti ŋolo Apolon nooi ŋolo anyaritae Anas ka Kaipa, Yoana, Alekisanda ta ŋice ŋulu arae ŋiyeneta ŋulu ke Esacaradoti a ŋolo Apolon nooi. 7Kitowua ikes Ŋikiyakia alokiŋaren Atukot kec, kiŋita temasi, “Ikokinete iyes itiyaete ŋakiro ŋun ai? Apedor ani iyakatar iyes, kori ekiro a ŋae itiyaata iyes ŋakiro ŋun?”

8Toboŋok Petero ŋolo eleleba Etau ŋolo Asegan ikes tema, “Ŋikepukak ŋulu a ŋituŋa ka ŋikatukok! 9Ani kikiŋisitae isua nakoloŋit na ŋakiro ŋuna ajokak ŋuna etiyakin neni ke ekaŋwalan ka epite ŋolo etaŋaleunere iŋes, 10itemokino nai iyes daadaŋ ka ŋituŋa ŋulu a Isirael daadaŋ toyenut atemar, ewuoi ekile lo alokiŋaren kus eŋale nooi aŋuna ka apedor a ŋina ke ekiro a Yesu a ŋolo a Nasaret. Yesu ŋol, iŋes ŋolo ipotu iyes kibubukis lomusalaba, nai abu Akuj kiteyaru. 11Erae Yesu igiritae ŋakiro keŋ Nakigireta atemar,

‘Amoru ŋina koloŋ ipotu iyes ŋikadukok toŋero,

iŋes tokona itogogoŋit akai alokoona.’

12Emam aiuno aneni a ice a daadaŋ, anerae emam ekiro ece anakwap a daadaŋ ŋolo einit Akuj ŋituŋa, ŋolo epedoryata ŋituŋa aiunor.”

13Toumok Atukot iŋolikini atitinyu a Petero ka Yoana, a ŋulu tari pa asyomito ka torae ŋikoŋinae ka toyenut daŋ atemar arae ikes ŋirukitos a Yesu. 14Nai ani iŋolikinete ikes ekile ŋolo etaŋaleunio erukito ka Ŋikiyakia, todaun ŋuna elimunete. 15Aŋun, kitolomarae ikes a Natukot, kidoŋo ikes atuko make. 16Kiŋitas ikes make temasi, “Ikikokini iwon ŋikilyok lu ai? Eyenete ŋituŋa daadaŋ alo Yerusalem atemar etiyata ikes akujuwuanut ileere ka nyikipedori iwon akipeg ŋun. 17Nai ani pa kikicamit ibore en kielakin lotuŋa, ecika ŋikilyok lu nyisirwor ikes nabo jik idiotuŋanan alokiro a Yesu.”

18Aŋun, tonyaraut nai ikes Petero ka Yoana Natukot, kicika ikes atemar nyirworo kori nyitatama nabo jik alokiro a Yesu. 19Nai toboŋokis Petero ka Yoana temasi, “Totubutu iyes ŋilopeyek ŋuna iyookino alokiŋaren Akuj--akiwuap ŋakiro kus kori ŋuna ka Akuj. 20Anerae nyeesikinio isua erwor ŋuna ikiŋolik ka ikiira.” 21Tosodi Atukot kicik ikes nabo nooi, kimyek nai ikes toloto. Todaun Atukot epite ŋolokisicanet ikes, aŋuna epurotor ŋituŋa daadaŋ Akuj, ikotere ŋakiro ŋuna apotu kitiyakinos; 22anerae aŋwalit ameun anakidouno ekile ŋolo etiyakinio akujuwuanut ŋina ka aŋaleun neni keŋ ka adeparito ŋikaru keŋ ŋatomoniomwon.

Kilipa ŋikanupak atemar totitinyokiata ikes

23Ŋinapei alakakinere Petero ka Yoana, toboŋosi ikes neni aya ŋikanupak a Kristo ŋuluce, tolimokis ikes ŋakiro ŋuna alimokinete ŋisacaradotin ŋulu apolok ka ŋikatukok ikes. 24Ani iirarete ikes ŋakiro ŋun, kikeut daadaŋ ŋitoilon kec kaapei, kilipa neni ka Akuj temasi, “Ekapolon ka ekasuban nakuj, akwap ka anam ta ŋinibore eyai tooma kec daadaŋ! 25Ibu iyoŋ koloŋ alotooma Etau kon kirwor anakituk ke eketiyan kon a papaa kosi Daudi itema,

‘Kaanukiro elemaritotor ŋibukui ŋulu ka akwap?

Kaanukiro etukyoto ŋituŋa akitiya ŋakiro ŋuna koŋinae?

26Acunakinosi ŋirwosi ŋulu ka akwap

ka ŋikepukak iwapei akitepeg Ekapolon Akuj ka ŋoloseuna keŋ.’

27Anerae kire alotaun a lo, apotu Erode ka Ponitio Pilato ka ŋibukui ŋulu pa arae Ŋiyudayan ta ŋituŋa ŋulu a Isirael kitepega Yesu, eketiyan kon ŋolo asegan ŋolo ibu iyoŋ kituruwo Messia. 28Apotu ikes tocunakinos akitiya ŋakiro daadaŋ ŋuna koloŋ itubuni iyoŋ ka apedor ka acamit kon atemar itiyakin. 29Tokona Ekapolon, kiŋolik epite ŋolo ikitukuryaniata ikes isua. Kitepedoroe isua ŋiketiyak kon akirwor ŋakiro kon ka atitinyu a daadaŋ. 30Torwaa akonikan, kitaŋaleu ŋituŋa ka kitiya ŋakujuwuanisya ka ŋaumonokineta alokiro ke eketiyan kon Yesu a ŋolo asegan.” 31Ani irikakinete ikes akilip, tomaranik akibois ŋina elipyata ikes, kilelebikin ikes daadaŋ Etau ŋolo Asegan, kiserata ŋakiro ŋuna ka Akuj ka atitinyu.

Amorete ŋikanupak ŋiboro kec

32Arae atukot ŋina a ŋikanupak ŋina atami ka anupit ŋakiro ŋapei. Amam tari idio ŋini abala arae ŋiboro keŋ ŋulu keŋ ke elope, nai amorete ikes ŋiboro daadaŋ ŋulu ayakatar. 33Kiteyenut Ŋikiyakia ka apedor a ŋina apolon ŋakiro ŋuna ka ayarun ke Ekapolon Yesu, ido kiterereŋ Akuj ikes daadaŋ nooi. 34Amam alokidiŋ kec ituŋanan ŋini acanaana, anerae ŋulu ayakatar ŋamanat kori ŋakais, apotu togyelanasi yaut ŋisiliŋa ŋulu agyelanarere, 35inakis Ŋikiyakia; tosodi tokorakinae ŋinituŋanan lopite ŋolo ayakar akiitanit keŋ.

36Ayai daŋ ekile ŋolo anyaritae Yosepu ŋolo anateker a Lepi ŋolo edounitoe alo Kupuro. Anyarito Ŋikiyakia iŋes Baranaba (iŋes atemar “Ŋolo esimukekinan”) 37Togyela iŋes emanikor keŋ, yau ŋisiliŋa inak Ŋikiyakia.

Currently Selected:

Ŋitic. 4: NIB2008

Highlight

Copy