Ŋitic. 20

Tolot Paulo Makedonia ka Akaia

1Ani kedaun aruruma, tonyarau Paulo ŋikanupak iwapei, kisimukek ikes, ido tolimok tema, “Ikianyun.” Torotok nai iŋes Makedonia. 2Ani kedau akirim ŋitela ŋul daadaŋ, kisimukek ŋikanupak a nen, ido tolot Akaia. 3Kiriya iŋes aina ŋilapyo ŋiuni. Ani eriŋa iŋes itemonokin alosit ka ameeli Siria, toyenu atemar etukosi Ŋiyudayan aŋuna keŋ. Aŋun, totyaku iŋes akitor nabo Makedonia eboŋori. 4Torukosi ŋituŋa lu ka iŋes: Sopate ŋolo alo Berea--lokoku a Piro, Aristako ka Sekondo ŋulu alo Tesalonika, Gaio ŋolo alo Derube, Tuciko ka Tropimo ŋulu alo Asia ka Timoteo. 5Toberaros ikes kiŋaren ikidarut isua alo Toroas. 6Ani edaun ŋasuban ŋuna a ŋamugati a ŋuna emam ŋakinyalet, torotokinoe isua ka ameeli alo Pilipi. Kelunyarosi ŋirwa ŋikan, torukaunae ikes alo Toroas, kiriyae aina esabit epei.

Alosit a Paulo Toroas ŋina esidyon

7Akoloŋit ŋina ke Esabit, apaki ŋina ikiyakar isua iwapei akinumunum Akimuj ŋina ke Ekapolon, abu Paulo kirwor neni a ŋikanupak a ŋulu a nen akitodol kidiŋ akuwar, aŋuna arotokinitor iŋes taparacu keŋ. 8Ayakasi ŋitaae ŋulu alalak nagule ŋina alokidiama, ŋina ikitukokina isua. 9Eboi esorokit ŋolo anyaritae Eutiko alodirisa; ikwaŋina arubakinitor Paulo irworo, kilurakin nooi Eutiko akitodol neni ajotooror. Kimasun kwap alodirisa a ŋolo anagule a ŋina ayai kidiama ŋunaarei. Toryamunae iŋes etwanit. 10Todoka nai Paulo kwap, torwakin neni keŋ, totun iŋes, tolimu tema, “Nyikibul, eyari iŋes!” 11Toboŋo iŋes kidiama kai, tokorak Akimuj ŋina ke Ekapolon kimuja kaapei. Kirworo iŋes ka ikes ekaoyan akitodol nakipiripirunet akoloŋ, ido torotok. 12Yaasi ikes esorokit lore eyari ka alakara ikes nooi.

Torotokis Paulo ka ŋirukitos keŋ alo Toroas tari Mileto

13Tolotoi isua alo Toroas kiŋaren, todokae ameeli tari Asos, kimyekinae Paulo ebunit a ŋakejen a nen, aneni atyakunitae isua akitodokia iŋes ameeli; anerae aris iŋes kikilimok isua akitiya ŋun. 14Ani ikiryamakin iŋes ka isua Asos, kitodokakinae isua iŋes ameeli, tolotoi tari loculat Mitilene. 15Torotokinoe a nen, kitoroi taparacu iwalari diyete eculat ŋolo anyaritae Kios. Kelunyar akoloŋit apei, todolunoe isua loculat Samo; ani akoloŋit ŋina atupakini ŋin, todoloe Mileto. 16Aris Paulo ketyaku adepar Epeso, ikotere nyicanicanaar adiopaki alo Asia. Ekirikira iŋes erae kepedori adolun Yerusalem nyedolo akoloŋit ŋina a Pentekoste.

Erwor a Paulo ŋolo esidyon neni a ŋikatukok alo Epeso

17Kiyaku Paulo akituk alo Mileto tari Epeso alimokin ŋikatukok ŋulu ka atukot a ŋikanupak akisiryam iŋes. 18Ani edolunete ikes, tolimok iŋes ikes tema, “Iyenete iyes ŋilopeyek epite ŋolo ikirukitor iyes ka ayoŋ apaki daadaŋ, ameun akoloŋit ŋina adolunio ayoŋ Asia. 19Abu ayoŋ etiyanak Ekapolon anapatanu tari anapakio a ŋuna egworor ka ŋuna aryamunitor ŋican, ikwaŋina arubakinitotor Ŋiyudayan etukosi aŋuna kaŋ. 20Iyenete iyes atemar abu ayoŋ nyemunon idiobore ŋini eyai epoida aneni kus, abu okolimonok ka eketatamik anatukon ka alorerya kus. 21Abu ayoŋ eteyenik Ŋiyudayan ka Ŋigirik daŋ atemar etemokino ikes tokiwa ŋasecisya kec alokiŋaren Akuj ka tonupa Ekapolon yok Yesu Kristo. 22Nai tokona, anakipup Etau ŋolo ka Akuj, alosi ayoŋ Yerusalem pa ayeni ŋuna akatakanikinete ayoŋ aina. 23Ŋuna ayeni ayoŋ ikes nu: eketeyenunui Etau ŋolo Asegan ayoŋ alotaunio a daadaŋ atemar ekedarit ayoŋ alomar mabus ka aryamun ŋakisicaneta. 24Nai aneni kaŋ nyepol akiyar nooi akilo aŋetakin akerit na ŋina erae etic ŋolo akainakinit Ekapolon Yesu ayoŋ akitiya. Etic ŋol iŋes akiteyenun Ŋakiro ŋuna Ajokak ŋuna ka ajokis a ŋina ka Akuj.

25“Ayeni ayoŋ tokona atemar iyes daadaŋ ŋulu adau ayoŋ alimonokin ŋuna ka Apukan ka Akuj, nyikiŋolikinete ayoŋ nabo. 26Aŋun, ekekekini iyes nooi napeikoloŋit na atemar, ani tokona kitutubokinosi iyes Akuj, emam ŋuna akatapito ayoŋ. 27Anerae nyimunono ayoŋ akiserakin iyes ŋuna daadaŋ ecamit Akuj. 28Kimukeuna make ka kiyoko esipan daadaŋ ŋolo ecikak Etau ŋolo Asegan nakan kus. Toraakas ŋikeyokok ŋulu ka atukot a ŋina a ŋikanupak Akuj, ŋina abu iŋes kituruwo ŋina keŋ a ŋaokot a Lokoku keŋ. 29Ayeni ayoŋ atemar ani karotok ayoŋ, epote ŋipeei ŋulu adedeŋak nooi neni kus ka nyeesikinete akinyasun esipan. 30Ebuni apaki ŋina elomuniata tari alokidiŋ kus ŋikalyokonok ŋice ecamito atemar kiwuapakis ŋikanupak ikes. 31Aŋun nai, totenito totamunito atemar tari anapakio a ŋuna egworor ayoŋ, abu ekesimukek iyes daadaŋ akuwar ka apaaran, tolunyar ŋikaru ŋiuni.

32“Nai tokona, ekewuakini ayoŋ iyes nakan ŋuna ka Akuj ka nakiro ŋuna ka ajokis keŋ, ŋina epedori akitogogoŋ ka ainakin iyes ŋarereŋisyo ŋuna iŋadat Akuj aŋuna a ŋituŋa a ŋulu eturuwo iŋes ŋulu keŋ. 33Iyenete iyes ŋilopeyek atemar nyiwuakina ayoŋ ekibure losilipa a ituŋanan a idio, logolid kori lolowi, 34nai abu ayoŋ a ŋakan kaŋ etiya ka oryamu ibore daadaŋ ŋini ikiitanit ayoŋ ka ŋirukitos kaŋ. 35Eketoodik ayoŋ iyes alopitesyo a daadaŋ atemar itemokino ŋinituŋanan kitiya ka agogoŋu, ikotere epedori akiŋarakin ŋulu epalag anatamunit ŋakiro ŋuna abala Ekapolon Yesu, ‘Eyai arereŋu nooi nainanakin akilo naryamunun.’ ”

36Ani irikakini Paulo erwori, toryediko kaapei ka ikes daadaŋ, kilipa. 37Totunakinos ikes daadaŋ neni keŋ enuyete ebasi, “Tolot neni ajokan.” 38Egworosi ikes ka eyaloloŋete nooi a ŋakiro a ŋuna aris iŋes kelimu atemar nyiŋolikinete ikes iŋes nabo. Kitenakis nai iŋes nameeli.

Currently Selected:

Ŋitic. 20: NIB2008

Highlight

Copy