Ŋitic. 12

Kiyatakin nooi akisicanio a Ŋikristo

1Ŋirwa ŋulupei, togeu erwosit Erode akikam ŋice alokidiŋ ŋikanupak ecamit akisican ikes. 2Abu iŋes toar Yakobo lokaato keŋ a Yoana ka atum. 3Ani eanyuni iŋes atemar ajoikinito ŋakiro ŋun Ŋiyudayan, abu kikamu Petero daŋ. (Atakanunete ŋakiro nu apaki ŋina enumunumere ŋasuban ŋuna a ŋamugati a ŋuna emam ŋakinyalet kec.) 4Ani kedau iŋes akikamun Petero, kijukak mabus, kipotok losigarya ŋulu atyakitae ŋatyaket ŋaomwon, ŋinatyaket ŋisigarya ŋiomwon. Acamit Erode aŋaun iŋes kelunyar Paska, ido kisitakinae alokiŋaren ŋituŋa. 5Aŋun, aponi togoloe Petero alomabus, nai elipete Ŋikristo nooi Akuj aŋuna keŋ.

Tolacakinae Petero alomabus

6Nakwaare nyiwalara akoloŋit ŋina acamitor Erode akisitakin Petero alokiŋaren ŋituŋa, ajotoe Petero alokidiŋ ŋisigarya ŋiarei, toenitetei iŋes a ŋiriko a ŋiarei. Toyakas daŋ ŋisigarya ŋulu eteok lokekia a mabus. 7Atipei, totakanu emalaika ŋolo ke Ekapolon, kinuaku akica ejera. Totap emalaika eseket a Petero, kiiŋiiŋak kitekienyu, tolimok tema, “Tonyou atipei!” Tolacakinos ŋiriko anakan keŋ atipei. 8Tolimok nai emalaika iŋes tema, “Tonap ŋilowi ka ŋamuk.” Kitiya Petero ŋun. Tolimok emalaika iŋes tema, “Tonap ekoti kon, ikiwuapak ayoŋ.” 9Kiwuapak nai Petero iŋes kiŋa mabus. Pa ayeni iŋes atemar ŋuna etiyae emalaika erae ŋuna a kire; atami iŋes atemar kori ete atakanikinet. 10Ani kedepasi ikes ŋisigarya ŋulu eteok ŋulu tanyan ka ŋulu atupakinete, todolo lopuke ŋolo a ŋasuwa ŋolo ecorosiyarit Yerusalem. Toŋaar epuke bon, tolomasi ikes kiŋa. Tomekis ikes erukude ŋolo ke etaun epei, atipei toŋopiya nai emalaika.

11Toyenu nai Petero ŋuna kepotu kitiyakinos neni keŋ tema, “Ayenu ayoŋ kire tokona atemar Ekapolon iyakuunit emalaika keŋ aiun ayoŋ anapedor a ŋina ke Erode ka anakiro a daadaŋ a ŋuna acamito Ŋiyudayan akitiya.”

12Ani kileereto ŋakiro nu aneni keŋ, tolot kai a Maria a toto a Yoana a ŋolo arae Mariko, neni acunakina ŋituŋa ŋulu alalak ilipete. 13Ani ikoŋikoŋokini Petero epuke ŋolo alokiŋa, bu aketiyan ŋina anyaritae Roda akisirwor ŋini ekoŋikoŋi. 14Ani eyeni iŋes etoil a Petero, tolakari nooi nyeŋaa mono epuke, nai toem tolimok ŋituŋa atemar ewuoi Petero alokiŋa. 15Tolimokis ŋituŋa iŋes temasi, “Ikibilerit iyoŋ!” Nai torubak iŋes ebala ebe erae kire. Toboŋokis ikes temasi, “Erae emalaika keŋ.”

16Nai torubak Petero ikoŋikoŋi epuke. Ani eŋaarete ikes, kiŋolikis iŋes toumokis. 17Kikia iŋes akan keŋ akisililiŋ ikes, ido kitatamik ikes epite ŋolo ayaunia Ekapolon iŋes alomabus. Tolimok iŋes ikes tema, “Tolimokisi nugu neni a Yakobo ka lokaitotoi.” Torotok nai iŋes, tolot iwace.

18Ani iwalari, kiguryakinos nooi ŋisigarya aŋuna kepotu kitiyakinos neni a Petero. 19Abu Erode tolimu atemar toripiripai nooi ŋakiro a Petero, nai nyeryamut ikes iŋes. Aŋun, abu kiŋitiŋit ŋisigarya ŋulu eteok mabus, ido tolimu atemar toarae ikes. Tolot nai Erode alo Yudaya tari Kaisaria, kiboi aina ŋirwa ŋidi.

Atwanare ŋina ke Erode

20Aŋoikinit Erode ŋituŋa ŋulu a Tiro ka Sidon. Potu nai ŋituŋa ŋul kaapei neni keŋ. Ani kedaut ikes akitacamun Blasto ŋolo arae eketiyan ke Erode, ŋolo ekinyomitae ŋakiro kec, kiŋita ikes Erode akisil ka ikes; anerae arae nakwap ŋina epukat Erode aryamununuya akwap kec akimuj.

21Ani edoli akoloŋit ŋina aseunit Erode akiryamakinor ka ikes, tonap ŋikeelowi ŋulukipukaet, kiboikin lokicoloŋ ŋolo ka apolou, ido kirwor lotuŋa. 22Tocelut ŋituŋa temasi, “Irworo iŋes erae akuj, meere ituŋanan!” 23Apaki ŋinapei, kitedyakak emalaika ŋolo ke Ekapolon Erode toramakin kwap, anerae abu iŋes kimyek ŋituŋa itopoloorito iŋes erae akuj, pa etopoloorit iŋes Akuj ŋina a kire. Tonyama ŋikur iŋes, totwan.

24Nai torubak akirot ŋina ka Akuj iyata ka tokeikin akwap.

25Ani kedaut Baranaba ka Saulo etic kec ŋolo eyakitere ikes, toboŋut alo Yerusalem potu Antiokio, erukito ka Yoana ŋolo erae Mariko.

Currently Selected:

Ŋitic. 12: NIB2008

Highlight

Copy