Matayo 26

1Kadre nitini Yesu ko’o tai nii dii oei akele di, adi ta dia ai tayilepi diidre, ki di, 2Mi ni kitu iri velero diise, nga ñale lavuzo di kaca, i dre Adamuni Mva fezo, a kokiparo akodi. 3Dra koani dridri dii, maliga diakia be, adreki rukebe jo koani murungu di adea tile runa Kayafa lena; 4aii dreki ta ta aii be, aii kodoro Yesu muṅase, akodi fule drale. 5Aii dreki ta tazo ki di, A koru akodi nga ñara’a ko, ta kolapiro ko.

6Yesu koliri Betaniana, Simona, kari dre ole di jona di, 7toko aca adi vuna aluku do be di, lagina murungugu, akodi dre do dazo adidri, adi dre adrera’a nga ña. 8Dia tayilepi dii kono tai nidi dre di, aii adreki kumba o, dre tazo ki di, Tandu do tizazo di ado ya? 9I dre do nidi gile lagi kaka dise, dre tefezo dia lemerero diidre. 10Yesu dre tai nidi atogiara’a, dre tazo aiidre ki di, Mi adre akodini arukia adose ya? Akodi dre ta tani ole madre dise. 11Mi dre adrele dia lemerero dii be kolia dise; ma adre ami be kolia ko. 12Akodi dre tai do dale di ole ama ledezo tai ozo sizo buna dise. 13Ma ta amidre pati, Vo angodi ya a ngi tandu tani voase o̱ei, a ko ta ta toko nidi adre ole di, akodi ru kadrero amve.

14Dra dia alo di dia mudri‐dri‐iri niiki ketona, runa Yudase Keliota, li koani dridri dii vuna. 15Dre tazo ki di, Mi le fele madre angopi ya ma dre adini fezo amidre? Aii dreki parata ñadingi‐dri‐mudri tibizo adidre. 16Vese nadise velero, akodi nda lokia adini fezo aiidre.

17Kitu dridri di mapa taku ako di ñazo dise, dia tayilepi dii dreki alizo Yesu vuna, dre tazo, ki di, Mi le mà koli angua ya nga ñale lavuzo di lede mi koñaro? 18Adi dre tazo, Mì koli ba murungu di na ago anda vuna, dreki tazo adidre, Miri ta, ki di, Ama vese acadre añi; ma liri nga ñale lavuzo di ña ami jona dia ama tayilepi dii be. 19Dia tayilepi dii dreki ta ozo ngoro Yesu dre ledele aiise tini; aii dreki nga ñale lavuzo di ledezo. 20Kitu kondi di, adi dre lirira’a nga ña dia tayilepi mudri‐dri‐iri dii be; 21Adi dreki nga ñara’a, adi ta, ki di, Ma ta amidre pati, dia alo di amiki kofulena ama felepi di e. 22Aiiki togo dre gazo tizaro ambani, aii dre ta bazo tale adidre kalomakaloma, ki di, Ma e ya, Miri? 23Adi dre ta akozo ki di, Akodi dreka solepi saanina ma be dre di, dia anda ama felepi di e. 24Adamuni Mva li ngoro adini tandu tisile di tini: tiza kadre dia anda Adamuni Mva felepi di dre: tani su ta i dre ago anda tizo ko. 25Yudasi, adini felepi di, dre ta akozo, ki di, Ma e ya, Rabbi? Adi dre tazo adidre, ki di, Mi ta dre. 26Aii dreki nga ñara’a Yesu do mapa, dre beneditu bazo, dre topizo, adi dre fezo dia tayilepi diidre, dre tazo, Mi kodo ñale, nidi ama rumva e. 27Adi dre kega dozo, dre merisi fezo, dre fezo aiidre, dre tazo, Ami o̱ei mi komvu; 28nidi ama kari mondra adea e dise, a da dia bi diise takonji tizazo dise. 29Ma dre tazo amidre, Ma go tejia biño lo’wa mvu ko, kitu ma dre todia mvuzo di mataya ama Ata adea a.

30Aii kongo longo di, aii dreki fozo lile kira Bilayana.

31Dra Yesu ta aiidre, Ami o̱ei mì ko’o dele ngaci nidise mase: i dre tišile dise, ki di, Ma kocoa kabilikia‐likilepi di, kabiliki kawa adea dreki labuzo wayaro. 32Velero a kotinga ma di, ma koli amidre dridri Galilayana. 33Petero dre ta akozo, dre tazo adidre, Ngale dia o̱ei dii ko’o dele ya di, ma go dele ko. 34Yesu dre tazo adidre, Ma ta midre pati, ngaci nidise, ta’u‐ago dre cira bera’a ndo, mi koloso ma vese na ka. 35Petero ta adidre, Tejia su ma dre drazo mi be iriti, ma koloso ta mise ko. Dia tayilepi dii o̱ei koangia aii dre ta tazo di tini.

36Dra Yesu alida aii be vo runa Getesemane a, dre tazo dia ai tayilepi diidre, Mi koliri konua, ma dre ngora’a Nzambe kandra nale. 37Adi dre Petero, anjia Zebedayo adea iri dii be drizo lile i be, adini lindri dre tandu bazo adrele tizaro, adini togo dre ozo kuku we. 38Dra adi ta aiidre, Ama lindri adre tiza be ambani ma kodraro asa: mi kadre konua mi kolama ta ma be. 39Adi dre lizo dridri ca, dre dezo vudri mibaledri, dre ngozo Nzambedre, ki di, A, ama Ata tai nidi pi mi ko dí, mi ko’o kega nidi lavu ma tise: kadre ma dre lele di tini ko, kadre mi dre lele di tini. 40Adi dre alizo dia tayilepi dii vuna, dre aiiki kusuzo aiyira’a, dre tazo Peterodre, ki di, Angini ya, mi kicoa ta lama saa alo dise ko ya? 41Mi kolama ta, mi kongo Nzambe kandra, mi kosiro vo dia litizo di lena ko: teri adre lovo be pati, rumva iriñi ako kani’a. 42Adi dre njizo todia vese iri diise, dre ngozo Nzambe kandra, dre tazo, A ama Ata nidi kicoa lavu ko di ma komvu ko di, a ko’o ngoro mi dre lele di tini. 43Adi dre alizo todia dre aiiki kusuzo aiyira’a, aiyi dre aiiki ole dise. 44Adi dre aiiki ta’izo, dre njizo, dre ngozo Nzambe kandra vese na diise tai tara’a ngoro dridri di tini. 45Dra adi ali dia tayilepi dii vuna, dre tazo aiidre, ki di, Mi kaiyi lovole ñano: mi no ka, saa acadre, i dre Adamuni Mva fezo dia takonji olepi dii dreka. 46Mì konga, mà konjiki wa: mi no ka, dia ama felepi di o alile añi.

47Adi dre ta tara’a Yudasi, dia alo di mudri‐dri‐iri niiki kofulena, alida dia lezolepi dii be, senge be, kutufae be, adi ali aba koani dridri dii e, maliga diakia dii be. 48Dia adini felepi di dre nga ta‐tadazo di fezo aiidre, ki di, Dia anda ma kondro tina di, akodi e: mì koru akodi. 49Drañano adi dre alizo Yesu vuna, dre tazo, Ari be, Rabbi, dre akodi ti ndrozo. 50Yesu dre tazo adidre, Arupi, mi ko’o tai anda mi dre alile ole di wa. Dra aii aliki dreki dreka bazo Yesuru, dre adini ruzo. 51Mi no ka, dia alo di, dia adrelepi Yesu be diiki ketona dre ai dreka tejizo, dre ai senge ngizo, dre adremakandra koani murungu di adea gazo, dre bina loazo. 52Dra Yesu ta adidre, ki di, Mi koba ami senge vona a: aii oei senge dolepi dii i dre aiiki sole sengese dise. 53Mì tusu ya ma kicoa ama Ata ti zina ko, adi komuro ñanomvano legioni malaika adea amba mudri‐dri‐iri di ruse. 54A ko’oro ta‐tisile di akele angini ya su tai nidi kadre. 55Saa nadise Yesu ta dialezolepi diidre, Mì afo sengee be, kutufae be, kugu runa tini ama ru ya? Ma liri ami be yekaluna ta tadara’a kitu vuse kolia, mi dre ama ruzo ko. 56Tai nii o̱ei dre acazo, a ko’o nabikia ta‐tisile dii akele. Dra dia tayilepi dii oei ta’i adi dreki lapazo.

57Dia Yesuni rulepi dii dreki akodi drizo Kayafa koani murungu di ni jona, vo dia ta‐tisilepi dii e, maligae be dreki rukebele dise. 58Petero dre alizo adi vuse rararo, dre lizo jo koani murungu di adea ti lena, dre sizo dre lirizo sazo be, tai akelepi di no. 59Kadre nitini koani dridri dii e, dia rukebelepi vura ta dii be dreki tandu kinzose ndazo alale Yesu ru aii kobaro akodi drale; 60aii dreki kusuzo ko, dia tandu talepi kinzose bi dii dreki alizo. Dia iri dreki alizo vovoravo, 61dre tazo, ki di, Ago nidi tadre, ki di, Ma kicoa yekalu Nzambe adea tiza, dre sizo kitu na diise. 62Koani murungu di dre ngazo kuru, dre tazo aiidre, Mi ako ta tale ko ya? ado ta ya dia nii dreki tale miru di? 63Yesu dre agizo titi. Koani murungu di dre tazo adidre, ki di, Ma zi mi Nzambe lidriru di ni ruse, mi kota amidre mi Kristu, Nzambeni Mva e di. 64Yesu ta adidre, Mi tadre: ma dre tazo amidre, Velero mi kono Adamuni Mva lirira’a mi lanjilanjini drigulese, dre alira’a nduruku bu adea a. 65Dra koani murungu di tisi ai bongo dre, dre tazo, ki di, Ama le dia azina tandu talepi dii angini ya? Mi no ka, ñanomvano mi yi adini ta Nzambe dazo di dre: 66mi adre ado ta tusu ami lena ya? Aii ako ta dreki tazo, ki di, Adi su drale. 67Dra aii fu tusu adini mibale a, dreki adini sazo; dia arukaba dreki adini sazo aiiki drega‐alese, 68dreki tazo, Mi kotada amidre, nabi dre tale di tini, mi Kristu: ami salepi di adi ya?

69Petero dre lirizo amvelese di jotile: adremakandra tokoro di dre alizo adi vuna, dre tazo, Mi koangia mi adre Yesu dia Galilayalese di be. 70Adi dre adrera’a dia oei dii kandra adi dre losozo losoloso, dre tazo, Ma ni ta mi dre tale di ko. 71Adi kofo lile jokogbona di, adremakandra tokoro azina di no adi, dre tazo dia adrelepi nale diidre, Ago nidi adre Yesu, dia Nazaretalese di be indi. 72Adi dre losozo todia tai ai akiñazo di be, Ma ni ago ni ko. 73Velero ca dia adrelepi lagana dii, dreki alizo, dreki tazo Peterodre, ki di, Mi adre aiiki kofulena pati, mi dre ami tadale ami kulise. 74Dra adi ba andu dia litri, dia wa, ki di, Ma ni ago nidi ko. Drañano ta’u‐ago adre cira be. 75Ta Yesu dre tale di ki di, ta’u‐ago o ta cira bezo di, mi koloso ta mase dridri vese na ka agadre Petero lena. Adi dre fozo dre ngozo mindrase we.

Currently Selected:

Matayo 26: LOG

Highlight

Copy