Matayo 21

1Aii kali Yerusalemi añi dre di, dre cazo Betepagea, kira Bilaya palena, dra Yesu dre dia ai tayilepi dii muzo iri, 2dre tazo aiidre, ki di, Mì koli ba ami laga di lena, drañano mì ni donge ’ile di kusu, dongemva be: mì kotri, mì dre ajizo ma vuna. 3Dia kota ta amidre dí, mì kota: Miri adre lovona be; drañano akodi kamu aii e. 4Tai nidi acadre tai nabi dre tale di, ko’oro akele, tara’a, ki di,

5Mi kota mvatoko Siona adea, ki di,

Mi no ka, ami mokonzi are alile mi vuna

Malimali, dre lirira’a dongedri,

Mvana be di.

6Dia tayilepi dii dreki lizo dreki ta ozo ngoro Yesu dre lanjile aiidre di tini. 7Dre donge drizo, dongemva be, dre aiiki bongo bazo amvuna’a, adi dre lirizo drina. 8Dia lezolepi ambani dii dreki aiiki bongo tajazo lati bale a; arukaba dreki fekola toṅozo fa ase, dreki fekola tajazo lati bale a. 9Dia lezolepi lilepi adi kandra dii, dia lezolepi alilepi adi vuse dii, dreki lenzezo tara’a, ki di, Osana, beneditu kadre dia alilepi Mirini ruse di dre; Osana buna kuruna ambani. 10Adi kosi Yerusalemina di, dia ba murungu a dii o̱ei aiiki lindri gaga we, dreki tazo, Nidi adi e ya? 11Dia lezolepi dii dreki tazo, ki di, Akodi nabi Yesu Nazareta lese Galilayana.

12Yesu dre sizo yekaluna Nzambe adea, dre dia adrelepi nga gi diadre dii, dia adrelepi nga gi dia drekase be yekaluna dii ladrozo, dre misa dia parata tifolepi diikia lizizo vudri, dia kobola gilepi diikia nga lirizo dii be. 13Adi dre tazo aiidre, ki di, A tisidre, ki di, A kozi ama jo, jo ta ngozo Nzambe kandra di: mì adre o na jo kugukia rukebezo diro. 14Dia mi ako dii, dia sialepi siasia dii be, dreki alizo adi vuna yekaluna: i dre aiiki tedrizo. 15Koani dridri dii, dia ta‐tisilepi dii be, kono di tai i dre ole diaki lindri gazo gaga dii e, anjimva lenzelepi yekaluna dii be, tara’a, ki di, Osana Dawidini Mvadre; aii adre kumba o. 16Aii dreki tazo adidre, ki di, Mi yi tai mva nii dre adrele tale di ya? Yesu dre tazo aiidre, ki di, Ai’i, mi̱ la teji dre ko ya, Mva kuriro dii e, mva ba ndrolepi diiki sibale ase amba mi lede tai utukufu adearo mi? 17Adi dre aiiki ta’izo, dre fozo ba murungu di ase Betania na, dre aiyizo nale.

18Dribise adi dre agora’a ba murungu di na, tebiri adre adini o. 19Dre malobia nora’a lati lagase, adi li fa ndu, i dre cere febia kusuzo; adi dre tazo fadre, ki di, Lo’wa kogo afole mi ase todia ko. Drañano malobia dre ’yozo. 20Dia tayilepi dii koyi dre di, aiiki lindri gaga, dre tazo, ki di, Malobia ’yo drañano angini ta? 21Yesu dre ta akozo tale, dre tazo aiidre, ki di, Ma ta amidre pati, mi kadre ta ka’ile di be, dre ta kaizo kaikai amiki togona ko di, mi ko’o ta i dre ole malobia ru di alokodia ko, mi kota kira nididre teji di, ki di, A tinga mi bele yi murunguna, a ko’o tai nidi. 22Ta o̱ei dii ado ta ya mì dre Nzambe ti zizo tai ngozo dise, mì dre ka’ira’a, mì kodo tai nidi vele.

23Adi kosi yekaluna di, koani dridri dii, mundiaki maligae be dreki alizo adi vuna, adi dre ta tadara’a, dreki tazo, Mi o ta nii mi lanjilanji angodise ya? Adi ba ami mi lanjile lanjilanji ya? 24Yesu dre ta akozo tale, dre tazo aiidre, Ma lizi ta mi ti alo nidise indi, mi kota ta nidi madre di, ma kota amidre indi mi lanjilanji angodise ya ma dre ta nii ozo. 25Ta batisimo Yoane adea ali angolese ya? asi kurulese ya? ta diakia dia ya? Aii dreki ta lizizo aiiki kofule ase, ki di, Mà kota asi kurulese dí, adi kota ki di, Mì ka’i adidre ko adose ya? 26Ma kota ta di, Ta diakia di e; amà ro dia lezolepi dii roro; aii o̱ei dre Yoane zile nabiro dise. 27Aii dreki ta akozo Yesu ti, dre tazo, Mà ni ko. Adi ta aiidre indi, Mi lanjilanji angodise ya ma adre ta nii o di, ma ta amidre ko kania. 28Mi tusu ado tai ya? Ago adre mva‐ago iri dii be; adi dre lizo kayuro di vuna, dre tazo, ki di, Mva, mi koli andru a̱zi o biño amvuna. 29Akodi dre ta akozo, ki di, Ma le ko: velero adi ala ai togo dre, dre lizo. 30Adi dre lizo tegumva vuna, dre ta nidi tazo indi, Akodi dre ta akozo, ki di, Bwana, ma li: dre lizo ko. 31Dia angodi ya dia nii iri diise o ta ngoro ai ata dre lele di tini. Aii taki, Mva kayuro di. Yesu ta aiidre, ki di, Ma ta amidre pati, Ateloni, toko ago kamvolepi dii be, siki mataya Nzambe adea na ami kandra na. 32Yoane dre alile ami vuna lati ta piri adea ase dise, mì dre ka’izo akodidre ko; ateloni e, toko ago kamvolepi dii be dreki ka’izo akodidre: mi kono tai nidi dre di, mi ala amiki togo velero tejia ko, mi koka’iro akodidre.

33Mi koyi tandu azina alale di: Joliyi be akodi tidi biño amvua, dre kala sozo kurukuru, dre nga‐biño‐zuazo di bazo, dre mvorogo sizo, dre amvu ta’izo dia biño a̱zi olepi diidre, aii koliriro adi vudria, adi dre lizo la’u azi di a. 34Lokia biño lo’wa dre kazo di ko’o tai acazo di, adi adre ai adremakandra mu dia biñoni azi olepi dii vuna adi kodoro ai biño lo’wa. 35Dia biño a̱zi olepi dii dreki akodia adremakandrae ruzo, dreki alo di coazo, dreki azina fuzo drale dreki azina bezo kirase. 36Adi mu adremakandrae azina todia amba dridri di ruse: aii dreki tai ozo aiiru ngoro dridri di tini. 37Velero adi dre ai mva muzo aii vuna, dre tazo, ki di, Aii koba ama mvani kañi. 38Dia biño a̱zi olepi dii, aii kono mva dre di, dreki tazo aiiki kofulena, Nidi mva adrelepi atani vudri a di, ma kofu akodi drale, ma dre akodia vo dozo. 39Aii dreki adini ruzo, dre adini bezo amvuase, dre adini fuzo drale. 40Kadre nitini miri biño‐amvu adea kali di, akodi ko’o ado tai ya dia biñoni a̱zi olepi nii dii ru? 41Aii taki adidre, Adi kofu dia takonji olepi nii dii drale, dre biño amvu ta’izo dia azina biño olepi diidre, aii kofe biño lo’wa lokiase adidre. 42Yesu ta aiidre, ki di, Mì la ta‐tisilepi dina dre ko ya, ki di,

Kira nidi dia josilepi dii gare,

A ba kira nidi kira kayua diro jokusuna;

Ta nidi Miri adea,

Amaki lindri ga asa gaga?

43Kadre nitini ma ta amidre, A kodo mataya Nzambe adea mi vulese, dre fezo suru nga lo’wa mataya adea alepi didre. 44Akodi delepi kira toṅolepi koñokoño nidi dre dii a kofu akodi, kira nidi kode diadre di, kobe dia labule tafulindri tini. 45Koani dridri dii, Farusii be ko yi adini tandu alale dii dre di, aii atogia dre, adi ta aiikia tandu. 46Aii kotibi adini rule di, aii dre dia lezolepi dii rozo roro, aii dreki adini zile nabiro dise.

Currently Selected:

Matayo 21: LOG

Highlight

Copy