Matayo 16

1Farusii, Sadoke be, dreki alizo, dreki adini litira’a, zi adi ti, adi kotadaro aiidre ta‐tadale bualese di. 2Adi dre ta akozo, dre tazoa aiidre, ki di, Kitu kondi di, mi adre tale, Nga kituru: bu mibale dre kale kaka dise. 3Dribise mi dre tale, Andru di toboro; bu mibale dre lakale lakalaka dise, nduruku be. Mi kicoa bu mibale ni, mi kicoa ta‐tadale vese nadise nile ko. 4Biro konji, muṅa olepi di nda ta‐tadale di; a kofe ta Yona adea tadale biro nidi dre alokodia. Adi dre aiiki ta’izo, dre njizo.

5Dia tayilepi dii dreki cazo ta‐ana, ta ambata dozo di vi aii ase vivi. 6Yesu dre tazo aiidre, ki di, Mi kolama ta, mi koga amiki mi taku Farusikia dise be, taku Sadokekia dise be. 7Aii dreki tazo aii be, tara’a, Mà do nga ñale di dre ko. 8Yesu dre ta nidi atogiara’a, dre tazo, A mi ta ka’ile ca di be, mi adreki ta ta amiki kofule ase adose ya, mi dre adrele ambata ko dise? 9Mi atogia dre ko ya, ta ambata nji mundia kutu njiki ketona aga mi lena ko ya kanji angopi ya mi dre kuduzo dii? 10Ta ambata nji‐dri‐iri dia kutu su ketona kanji angopi ya mi dre kudu zo dii adea aga ami lena ko ya? 11Mi atogia ko angini ya, ma adre mapa tandu ta amidre ko. Mi ko ga amiki mi taku Farusikia dise be, taku Sadokekia dise be. 12Dra aii yidre geagea i dre ta tale aiidre aii kogaro aiiki mi ta‐tadale Farusikia e Sadokeki adea se di, aii kogaro aiiki mi taku mapa adease ko.

13Yesu kali vo Kaisala‐Filipo adea na dre di, i zi dia ai tayilepi dii ti, dre tazo, Mundia ta Adamuni Mva adi e ya? 14Aii dreki tazo, ki di, Arukaba ta Yoane dia Batisilepi di, arukaba ta Eliya; arukaba ta Yeremaya, ta dia alo nabi kofule di e. 15Adi dre tazo aiidre, Mì dre tale ma adi e ya? 16Simona Petero dre ta akozo, dre tazo, Mi Kristu e, Mva Nzambe lidriru di adea. 17Yesu dre ta akozo akodi ti, dre tazo, A ko ba beneditu miru, Simona Bara‐Yona, za, kari be dre tai nidi tadale mi dre ko dise, ama Ata buna di dre ta nidi tadazo midre. 18Ma dre tazo midre indi, mi Petero e, ma kosi ama kopainyi kira nididre, ti Adezi adea kolavu ko. 19Ma kofe fungula mataya bu adea midre: ado nga ya mi kolambe vudri, a kolambe buna: ado nga ya mi tri vudri a kotri buna. 20Dra adi loga dia tayilepi dii dre re, aii kota adi Kristu e diadre tejia ko.

21Vese nadise Yesu ba tandu tadale dia ai tayilepi diidre, i su lile Yerusalemina dre lizazo tai bii maliga e, koani dridri dii e, dia ta‐tisilepi dii be drekase aii dreki i fuzo, kitu na velero dise dre ngazo todia. 22Petero dre adini dozo dre adini ta bazo ndrile, dre tazo, Tai nidi kadre mi mvumvu, Miri: a go tai nidi ole miru ko. 23Adi dre ai alazo, dre tazo Peterodre, Mi koli ma amvona Setani: mi adre nga ma olepi dele di, mi dre ta Nzambe adea rule lovose ko dise, mi ru ta diakia dii rule lovose kani’a. 24Dra Yesu dre tazo dia ai tayilepi diidre, ki di, Ta lovo lizo ma vuse di koru dia alo di, akodi koga ai tandi re, dre ai fa atipatipa tingazo, dre alizo ma vuse. 25Dia angodi ya le ai lindri tedrile, akodi lindri kaviro aviavi; dia angodi ya ko’o ai lindri avile di ama tandise, akodi kotedri ai lindri. 26Nga angopi ya go dia vo ñalepi oei di dre akodi lindri avi ase: Dia kotifo ai lindri adi ngase ya? 27Adamuni Mva kali utukufu ai Ata adea na ai malaika be, vese nadise adi dre fezo mundia oei dii dre, aiiki ta ole diise. 28Ma ta amidre pati, dia arukaba adrelepi konua dii kodraki tejia ko, aii kono Adamuni Mva alira’a ai mataya na ka.

Currently Selected:

Matayo 16: LOG

Highlight

Copy