MATIOSI 27
27
Yesu a tshi iswa ha Pilato
(Mar. 15:1; Luk. 23:1; Joh. 18:28)
1Nga matshelonitsheloni vhotshifhe vhahulwane vhoṱhe na vhahulwane vha lushaka vha vha na khoro vha luka vhukwila ha u vhulahisa Yesu. 2 Vha vhofha Yesu nga dzigeḓane vha ṱuwa nae vha mu kumedza muvhusi Pilato.
Lufu lwa Judasi
(Mish. 1:17-19)
3 Judasi, uḽa o mu fheṱaho, a tshi pfa uri Yesu o haṱulwa, a ḓisola, a vhuedzedza aḽa maseṱha a 30 ha vhotshifhe vhahulwane na vhahulwane vha lushaka, 4a ri, “Ndo tshinya nga u fheṱa muthu a si na mulandu.” Vha fhindula vha ri, “Ayo a si mafhungo ashu, ndi aṋu.” 5 A mbo laṱa iḽa tshelede henefho nḓuni ya Mudzimu a ṱuwa, a ya a ḓinembeledza.
6 Vhotshifhe vhahulwane vha dobela iḽa tshelede vha ri, “Iyi tshelede a ro ngo tendelwa u i longa bogisini ḽa mitendelo ngauri yo renga malofha.” 7Vha funzedzana vha langana uri vha ḓo renga ngayo tsimu ya muvhumbi wa dzikhali, uri hu vhe hone hune ha ḓo swiṱwa vhatsinda. 8Ndi zwine na ṋamusi tsimu iyo ya kha ḓi pfi “Yamalofha”. 9 Ha mbo vha u khunyeledza zwo ambiwaho nga muporofita Jeremia a tshi ri, “Vho dzhia maseṱha a 30, wone mutengo we Vhaisraele vha langana uri vha ḓo mu renga ngawo, 10vha renga ngao tsimu ya muvhumbi wa dzikhali. Ndi zwone zwe Muṋe washu a nndaedza.”
Yesu a tshi sengiswa nga Pilato
(Mar. 15:2-5; Luk. 23:2-5; Joh. 18:28-38)
11 Yesu a imiswa phanḓa ha muvhusi, uyo a mu vhudzisa a ri, “Nṋa inwi ni khosi ya Majuda?” Yesu a mu fhindula a ri, “Vha khou amba ḽavho naa?” 12 Vhotshifhe vhahulwane na vhahulwane vha lushaka vha mu pomoka zwithu zwinzhi, hone a si fhindule tshithu. 13Pilato a mu vhudzisa a ri, “Nṋa a ni pfi uri vha khou ni pomoka zwithu zwingafhani?” 14 Yesu a si tsha mu fhindula na ipfi na ḽithihi; muvhusi a wana zwi tshi mu kanukisa.
Yesu a tshi haṱulelwa lufu
(Mar. 15:6-15; Luk. 23:13-25; Joh. 18:39 – 19:16)
15Zwino nga Paseka iṅwe na iṅwe muvhusi o vha a tshi ḓi vhofhololela vhathu tshivhotshwa tshe vha vha vha tshi tshi humbela. 16Nga honoho vhuṱambo ho vha hu na tshiṅwe tshivhotshwa tshe tsha vha tshi tshi ḓivhea hoṱhe-hoṱhe ḽi ḽivemu, tshi no pfi Yesu Barabasi. 17Pilato a tshi vhona vho kuvhangana a vha vhudzisa a ri, “Ni funa ndi tshi ni vhofhololela nnyi? Yesu a no pfi Barabasi kana Yesu a no pfi Mesia?” 18A tshi ralo ndi uri o vha a tshi zwi ḓivha uri vha tshi mu kumedza Yesu vho vha vha tshi itwa nga vivho.
19 Zwino Pilato a tshee o dzula tshidzuloni tsha khaṱhulo mufumakadzi wawe a mu laedzela a ri, “Hoyu ha na tshe a khakha, vha songo mu ita tshithu. Ndo mu lora madekwe nda tambula zwinzhi.”
20 Hone vhotshifhe vhahulwane na vhahulwane vha lushaka vho vha vho no rumeledza vhathu uri vha humbele Barabasi, Yesu a vhulawe. 21Zwino muvhusi a tshi dovha u vha vhudzisa a ri, “Kha avha vhavhili ni funa ndi tshi ni vhofhololela ufhio?” Vhone vha fhindula vha ri, “Barabasi!” 22Pilato a vha vhudzisa a ri, “Uyu Yesu a no pfi Mesia ndi iteni ngae?” Vha amba mazha vha ri, “Nga' vhambiwe kha tshifhambano!” 23Pilato a vhudzisa a ri, “O tshinyani?” A tshi ralo vhone vha tou ṋaṋa u zhamba vha ri, “Nga' vhambiwe kha tshifhambano!”
24 Pilato a tshi vhona uri a zwi tsha farisa tshithu, zwi tou vusa mufhirifhiri, a dzhia maḓi a ṱamba zwanḓa mavhuthu a tshi zwi vhona a ri, “A thi na mulandu kha malofha a uyu munna; ni ḓo ḓifhindulela inwi vhaṋe.” 25 Vhathu vhoṱhe vha fhindula vha ri, “Mulandu wa malofha awe nga u vhe washu na vhana vhashu!”
26 Ndi hone a tshi vha vhofhololela Barabasi, a ita uri Yesu a rwiwe, a konou mu kumedza uri a vhambiwe kha tshifhambano.
Maswole a tshi tamba nga Yesu
(Mar. 15:16-20a; Joh. 19:2-3)
27Maswole a muvhusi a dzhia Yesu a dzhena nae nḓuni ya khaṱhulo, a tou tangwa nga gomane yoṱhe. 28 Vha mu bvula zwiambaro vha mu ambadza phuraphura. 29 Vha luka na khare ya mipfa vha mu ambadza kha ṱhoho, vha mu farisa luṱanga nga tshanḓa tshauḽa, vha mu gwadamela vha mu losha muhoyo vha ri, “Khosi ya Majuda nga i lalame!” 30 Vha mu pfela mare, vha dovha vha dzhia luḽa luṱanga vha mu rwa kha ṱhoho. 31Musi vho no fhedza u mu kolela nga u ralo vha mu bvula phuraphura vha mu ambadza nguvho dzawe, vha konou bva nae vha yo mu vhamba kha tshifhambano.
U vhambiwa ha Yesu kha tshifhambano
(Mar. 15:21-32; Luk. 23:26-43; Joh. 19:17-27)
32 Vha tshi khou bva vha ṱangana na munna a no bva Kirene a no pfi Simoni, vha mu kombetshedza u hwala tshifhambano tsha Yesu.
33Vha tshi swika fhethu hu no pfi Golgotha (zwine zwa amba uri “Fhethu hu no nga dethele ḽa muthu”), 34 vha mu ṋea mushonga wa u dzidzivhadza wa waini yo ṱanganaho na ndulu, hone a tshi i thetshela a hana u nwa. 35 Ndi hone vha tshi mu vhamba kha tshifhambano, vha konou kovhekana nguvho dzawe nga u tou ita mamvaṱe. 36Vha dzula fhasi henefho vha mu linda.
37 Vho vha vho ombela na luṅwalo lwa mulandu wawe nga nṱha ha ṱhoho yawe. Lwo vha lu tshi ri, “Hoyu ndi Yesu khosi ya Majuda.”
38 Vha mu vhamba na mavemu mavhili, ḽiṅwe ḽi thungo ya tshauḽa, ḽiṅwe tshamonde. 39 Vhafhiri vha gondo vha tshi mu vhona vha dzungudza dziṱhoho vha mu holedza 40 vha ri, “A si iwe we wa ri u nga thutha nnḓu ya Mudzimu wa dovha wa i fhaṱa nga maḓuvha mararu. Itsa-ha afho kha tshifhambano u ḓitshidze arali u Murwa wa Mudzimu!” 41Na vhotshifhe vhahulwane na vhaḓivhi vha Mulayo na vhahulwane vha lushaka vha mu kolela vha ri, 42 “O vha a tshi kona u tshidza vhaṅwe, zwino u ḓitshidza zwi vho mu kunda! Hufha e khosi ya Vhaisraele, nga a tse-ha kha tshifhambano zwino, ri tende uri ndi ene. 43 O ḓitika nga Mudzimu; Mudzimu nga a mu lamulele zwino arali a tshi mu funa. Hufha o amba a ri, ‘Ndi Murwa wa Mudzimu!’ ” 44Vhaḽa vhe vha vha vho vhambiwa nae na vhone vha ḓi mu holedza nga u ralo.
Lufu lwa Yesu
(Mar. 15:33-41; Luk. 23:44-49; Joh. 19:28-30)
45 Masiari tshivhangalala shango ḽoṱhe ḽa mbo ḓi tibwa nga swiswi ha fhela awara tharu zwo ḓi ralo. 46 Nga tshifhinga tsha vhuraru Yesu a ṱavha mukosi a ri, “Eli, Eli, lama sabaxthani?” Ndi u ri, “Mudzimu wanga, Mudzimu wanga, wo nndaṱelani?” 47Vhaṅwe vhe vha vha vho ima henefho vha tshi pfa a tshi ralo vha ri, “Ipfani u vho vhidza Elia!” 48 Muṅwe wavho a mbo ḓi gidima a dzhia tshiponnzhi a tshi mbwandamedza kha waini yo vhiluluwaho a tshi ṱoma kha thanda a konou tshi isa mulomoni wa Yesu uri a swiswine; 49hone vhaṅwe vha ri, “Mu litsheni ri vhone arali Elia a tshi ḓo ḓa a mu tshidza.” 50Hone Yesu a ṱavha mukosi ha mbo ḓi vha u welela. 51 Lupila lwe lwa vha lwo tsira Hukhethwakhethwa lwa mbo ḓi kheruwa nga vhukati u bva nṱha u swika fhasi, shango ḽa dzinginyea, matombo a fhanduwa. 52Zwalo zwa mbo vulea, mivhili ya vhathu vhanzhi vha Mudzimu vho ri siaho ya vuwa, 53 musi Yesu o no vuwa vhafuni vha bva zwaloni vha dzhena muḓini mukhethwa vha vhonwa nga vhathu vhanzhi.
54 Mulangagomane na vhaṅwe vhe vha vha vha tshi khou linda Yesu vha tshi pfa mudzinginyo, na u vhona zwoṱhe zwo iteaho, vha ofha nga maanḓa vha ri, “Nangoho uyu muthu o vha e Ene Murwa wa Mudzimu!”
55 Henefho ho vha hu na vhasadzi vhanzhi vho ima fhaḽa kulenyana vho lavhelesa; ndi vhaḽa vhe vha ḓa na Yesu a tshi bva Galelia vha tshi khou mu shumela. 56Vhaṅwe vhavho ndi Maria Magadalina, na Maria mme a Jakopo na Josefa, na mme a Jakopo na Johanisi, musadzi wa Zebedia.
U swiṱwa ha Yesu
(Mar. 15:42-47; Luk. 23:50-56; Joh. 19:38-42)
57 Musi ḽi tshi vho kovhela ha ḓa munna o pfumaho wa Arimathia a no pfi Josefa. Na ene o vha e mufunziwa wa Yesu. 58A ya ha Pilato a humbela tshitumbu tsha Yesu, Pilato a ri vha mu fhe. 59Josefa a tshi dzhia a tshi pombedza nga lukhaha, 60 a tshi swiṱa tshaloni tshawe tshe tsha vha tsho korwa kha tombo, tshi sa athu swiṱwa muthu. O no ralo a dzhia tombo ḽihulu a ḽi kungulusela mulomoni wa tshalo a tshi tiba ngaḽo a ṱuwa.
61 Hezwi a tshi khou swiṱa Yesu, na Maria Magadalina na uḽa muṅwe Maria vho vha vho dzula henefho tsini ha tshalo.
Vhalindi vha tshalo
62Ḽi tshi tou tsha nga Sabatha vhotshifhe vhahulwane na Vhafarisei vha kuvhangana vha ya ha Pilato vha mu vhudza 63 vha ri, “Muṋe washu, ri kha ḓi elelwa zwe uḽa mudzia-u-xedza-vhathu a vhuya a amba musi a tshi kha ḓi tshila a ri, ‘Ndi ḓo vuwa nga ḓuvha ḽa vhuraru.’ 64Kha vha rume vhathu uri vha yo linda tshalo u swika nga ḓuvha ḽa vhuraru, uri vhafunziwa vhawe vha sa ḓo ḓa vha mu tswa vha ḓo konou vhudza vhathu uri o vuwa vhafuni, ha vho vha u xedza vhathu u fhira zwiḽa zwa u ranga.” 65Pilato a vha fhindula a ri, “Ndi zwone, vhalindi khevha; ṱuwani navho ni linde tshalo nga hune na kona.” 66 Vha mbo ya vha tiba tshalo nga tombo, vha ḽi shatela uri ḽi si kunguluswe nga muthu, vha sia vhalindi vha tshi linda.
Currently Selected:
MATIOSI 27: VEN98
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1998. Used with permission. All rights reserved.
