Mattheos 20
20
1Maḣpiya wokiconze kin he wicaśta wan tipi yuhe cin he iyececa, he hanḣanna ḣinca hastanhanka iyuwi ojupi tawa kicanyanpi kte cin wicaśta opeton iyaya.
2Unkan wicaśta anpetu eca kaśpapidan wanjidan on opewicaton, hehan hastanhanka iyuwi ojupi tawa kin en yewicaśi.
3Unkan wihiyayedan oape yamni, hehan ake tankan iyaye c̣a toktokeca tihocoka en taku tokon śni najinpi wanwicayaka;
4Qa hewicakiya; Niś eya hastanhanka iyuwi ojupi kin en ya po; kinhan token owotanna cicupi kta ce. Unkan en iyayapi.
5Ake oape iśakpe qa inapcinwanka hehanhan tankan iyaye c̣a ake iyecen econ.
6Hehan oape iakewanji ecetu, ake tankan iyaye c̣a toktokeca taku tokon śni najinpi wanwicayaka, qa hewicakiya; Tokeca anpetu osan taku tokon śni nayajinpi he.
7Unkan, Tuwedan opeuntonpi śni ce, eciyapi. Hehan hewicakiya; Niś eya hastanhanka iyuwi ojupi kin en ya po, kinhan taku owotanna iyacupi kta.
8Wanna ḣtayetu hehan, hastanhanka iyuwi ojupi yuhe cin iye taokiye itancan kin heciya; Wicaśta ḣtanipi kin wicakico qa wokajuju wicaqu, wo, ehake hipi kin hena tokaheya, ecen tokaheya hipi qon wicayeciyuśtan kta ce.
9Unkan tona oape wanjidan ḣtanipi kin hena hipi, qa otoiyohi kaśpapidan wanji icupi.
10Tokaheyapi kin hena en hipi qehan, sanpa yuhapi kta kecinpi, tuka iś eya otoiyohi kaśpapidan wanji icupi.
11He icupi hehan tipi tawa kin bapi;
12Qa heyapi; Ehake hipi kin dena oape wanjidan ḣtanipi, tuka unkiye anpetu osan, wi kata eśta ḣtaunnipi, iyeuncecapi wicayakaga ece.
13Unkan iye waayupte c̣a wanji heciya; Koda, taku śica ecacicon śni; kaśpapidan wanjidan on ḣtamiyecini kta kemayakiye śni he.
14Taku nitawa kin ehdaku qa hda wo; ehake hi kin de niye cic̣u kin iyecen waqu ece e kta.
15Miye mitawa kin token wacin kin ecen ecamon kta iyecece śni he; miye mawaśte kin heon etanhan iśta niśica he.
16Hecen ehake unpi kin hena tokaheyapi kta; qa tokaheya unpi kin hena ehake unpi kta; wicota wicakicopi, tuka tonana wicakaḣnigapi ece.
17Unkan Jesus Jerusalem ekta itanwankanhde ya, hehan waonspewicakiya akenonpa kin canku kin icunonpa iśnana awicaya, qa hewicakiya;
18Iho, Jerusalem ekta itanwankanhde unyanpi, qa Wicaśta Cinhintku kin wośnapi kagapi wowapi kagapi ko nape en wicaqupi kta; unkan ṭe kta on yacopi kta,
19Qa iḣaḣapi kta, kapsinpsintapi kta, qa icipaweḣ okatanpi kta on Ikcewicaśta iyoopta wicaqupi kta; unkan anpetu iciyamni hehan kini kta ce.
20Hehan Zebedee cinca hunkupi kin en hi, cinhintku napin om, cekiye c̣a taku wanji kida.
21Unkan iye heciya; Taku yacin he. Hehan heciya; Micinkśi kin denaoza wokiconze nitawa en, unma nietapa ekta iyotanke kta, qa unma iś canitka en iyotanke kta, keya ye.
22Tuka Jesus waayupte c̣a heya; Taku yadapi kin sdonyakiyapi śni. Wiyutke etanhan mdatke kte cin he etanhan yatkan oyakihipi he; qa baptem maqupi kte cin he niś eya nic̣upi kta oyakihipi he. Unkan, Unkokihipi ce, eciyapi.
23Hehan hewicakiya; Awicakehan wiyatke mitawa kin etanhan datkanpi kta, qa baptem maqupi kte cin heon niś eya baptem nic̣upi kta; tuka ematapa qa camatka tanhan iyotankapi wicaqupi kte cin he miye mitawa śni; tuka Ate tona wiyeya wicakiciyuśtan kinhan hena tawapi kta.
24Unkan wikcemnapi kin hena he naḣonpi qehan sunkakiciyapi nom on śihdapi.
25Tuka Jesus wicakico qa heya; Ikcewicaśta ekta tona itancanpi kin hena oyate wicayuhapi, qa wicaśta tankinyanyanpi kin oyate wowidakewicayapi ece, he sdonyayapi.
26Tuka niyepi ekta hecece kte śni; tuka wanji tukte tanka yaunpi kta yacinpi kinhan, he ookiye duhapi kta:
27Qa tuwe niyepi en tokapa un kta hecinhan, wowidake nitawapi kin hee kta.
28He iyececa, Wicaśta Cinhintku wowidake wicayuhe kta on hi śni, tuka idakapi kta, qa wiconi tawa wokajuju kta wicota on wicaqu kta heon hi.
29Unkan Jeriko etanhan iyooptapi, hehan wicota ihakam unpi.
30Unkan iho, wicaśta iśtagonga nonpa canku icahda iyotankapi, Jesus en hiyaya naḣonpi, hehan howayapi qa heyapi; Itancan, Dawid Cinhintku onśiunkida miye.
31Unkan wicota kin teḣindapi qa inina yanke wicaśipi; tuka iś hehan heon iyotan howayapi qa heyapi; Onśiunkida po, Itancan, Dawid Cinhintku.
32Unkan Jesus owanji najin qa wicakico qa heya; Taku ecaciconpi kta yacinpi he.
33Itancan iśta unhdukawapi kta ye, eciyapi.
34Hehan Jesus onśiwicakida qa iśta wicayutan; unkan ecahankeya iśta on tonwanpi qa ihakam unpi.
Currently Selected:
Mattheos 20: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
