Mattheos 16

1Unkan Pharisee qa Sadukee etanhan en hipi, qa maḣpiya eciyatanhan wowapetokeca wan wicakiyutanin śipi, iyutanyanpi kta.

2Tuka iye waayupte c̣a hewicakiya; Tohan ḣtayetu eca, Maḣpiya śaśa heon owaśtecake kta ce, ehapi ece.

3Qa hanḣanna ec̣a, Ecin ośicecake kta, maḣpiya śaśa qa śapśapa, heon etanhan. Wananiciḣmanpi, maḣpiya ite kin he yukcan onnispepi, tokeca anpetu kin dena wowapetogton oyakaḣnigapi śni he.

4Wicoicage śice c̣a wawiciḣaḣapi econ sa kin he wowapetokeca wan da; tuka wowapetokeca wanjidan qupi kte śni; Jonas wicaśta wokcan tawowapetokeca kin heceedan. Unkan eḣpewicaya iyaya.

5Unkan waonspewicakiye cin akasanpa ipi, qa aguyapi icu akiktonjapi.

6Henan Jesus hewicakiya; Pharisee qa Sadukee on napoḣyapi tawapi kin he iwanyakapi qa kokipa po.

7Unkan iye iyakitedan akinicapi qa heyapi; Aguyapi unkicupi śni, heon etanhan, heya ce.

8Tuka Jesus he sdonye c̣a hewicakiya; Cistinna wacinyayapi kin, tokeca niye iyakitedan ayakinicapi he, aguyapi iyacupi śni heon.

9Hinaḣin oyakaḣnigapi śni, wicaśta kektopawinge zaptan un aguyapi zaptanna, qa makanopiye ojudan tonakeca yapahipi he yeksuyapi śni he.

10Nakun wicaśta kektopawinge topa qa aguyapi śakowin, qa makanopiye ojadan tonakeca iyacupi he.

11Tokeca oyakahnigapi śni he, Pharisee qa Sadukee on napoḣyapi tawapi kin he kokipe ciśipi, he aguyapi on heciciyapi śni.

12Hehan aguyapi on napoḣyapi kin he kokipe wicaśi śni, tuka Pharisee qa Sadukee woonspe tawapi kin hee kokipapi kta, he okaḣnigapi.

13Jesus Kesarea Philippi makoce kin en i qehan waonapewicakiye cin wiwicawange qa heya; Wicaśta Cinhintku kin miye matuwe kin, wicaśta keyapi he.

14Unkan heyapi; Apa Johannes baptem wicaqu qon; qa apa iś; Elias; qa toktokeca; Jeramias, qa iś wicaśta wokcan wanji.

15Qa niś matuwe kehapi he, ewicakiya.

16Unkan Simon Inyan ayupte c̣a; Messiya Wakantanka ni un Cinhintku kin he niye, eya

17Unkan Jesus ayupte c̣a heciya; Simon Jona cinhintku niyawaśtepi ce; wicaceḣpi qa wicawe kin he oniciyake śni, tuka Ate maḣpiya ekta un kin he oniciyaka

18Qa miś nakun heciciya; Inyan he niye, qa imnija kin de akan okodakiciye mitawa wakage kta; qa wakanśica tatiyopa kin he yujuju kte śni.

19Unkan maḣpiya wokiconze iyuḣdoke kin he cic̣u kta; hecen taku maka akan yakaśke cinhan he maḣpiya ekta kaśkapi kta; qa taku maka akan yakiduśke cinhan he maḣpiya ekta kiyuśkapi kta.

20Hehan waonspewicakiye cin Jesus Messiya kin he iye, he tuwedan okiyake śni wicaśi.

21Hetanhan Jesus waonspewicakiye cin wowicakiyaka, Jerusalem ekta ye kta iyececa, qa wicaḣincapi, wośnapi kagapi, wowapi kagapi ko on taku ota kakije kta, qa ktepi kta, qa anpetu iciyamni hehan ake kini kta, hena owicakiyaka.

22Hehan Inyan Jesus icu qa iyopeye c̣a heya; Itancan, hecetu śni; dena ayakipe kte śni.

23Tuka iye ihduhomni qa Inyan heciya; Satan mihektapa tanhan ya wo, tokamayaya; Wakantanka taku tawa kin awacanni śni, tuka wicaśta taku tawapi kin.

24Hehan Jesus waonspewicakiye cin hewicakiya; Tuwe miyahna u kta cin kinhan, waipiic̣ida kta, qa cansusbeca ehdaku qa mihakam un kta.

25Tuwe kaśta wiconi tawa kpatan kinhan, he toki eḣpekiye kta; qa tuwe miye on wiconi tawa kin kpagan kinhan, he iyeye kta.

26Wicaśta wan maka kin ecowasin kamna, qa nagi kin toki eḣpeye cinhan he taku okihi kta he; qa wicaśta nagi kin taku iyepekiye kta he.

27Wicaśta Cinhintku kin iye Atkuku towitan hduha taohnihdewicaye cin em u kta; hehan wicaśta otoiyohi iye oḣanpi kin eciyatanhan wicaqu kta.

28Awicakehan heciciyapi; Tona den najinpi kin etanhan wanjikji wiconṭe utapi kte śni, ecen Wicaśta Cinhintku kin iye tokiconze kin en u wanyakapi kta.

Currently Selected:

Mattheos 16: DAKOTANT

Highlight

Copy