Mattheos 14

1Unkan anpetu kin hena en Herod wicaśtayatapi kin Jesus oyakapi kin he naḣon;

2Qa tahokśidan kin hewicakiya; Johannes baptem wicaqu ece kin he dee; ṭapi kin etanhan kini, heon etanhan wicoḣan tanka econ ece.

3Herod Johannes yuze c̣a kaśka, qa conkaśke en ehnaka, Herodias iye sunkaku Philip tawicu qon heon.

4Duhe kta iyecece śni ce, Johannes, eciye ciqon.

5Unkan heon kte kta cin, tuka oyate kin kowicakipa; hena e wicaśta wokcan heca kecinpi.

6Tuka Herod anpetu en tonpi qon he ake hiyohipi, hehan Herodias cunwintku kin wicacokaya waci, qa Herod iyokipiya.

7Heon etanhan, taku wakan cajeyate c̣a, taku kida kta hecinhan, awicakehan qu kta, keciya.

8Unkan he itokam hunku onspekiya, heon heya; Wanna Johannes baptem wicaqu ece qon he pa kin wakiśica wan ohna maqu ye.

9Unkan wicaśtayatapi kin iyokiśice ḣinca, tuka wakanyan wacajeyate cin heon, qa tona om wota iyotanke cin hena on, he qu wicaśi.

10Hecen ekta ye wicaśi, qa conkaśke mahen Johannes pa baksa.

11Unkan pa kin he wakśica ohna akupi, qa wikośka kin qupi; unkan iye iyoepta hunku qu.

12Unkan waonspewicakiye cin hena en hipi, qa tancan kin eyakupi qa ḣapi; hehan yapi qa Jesus okiyakapi.

13Unkan Jesus he naḣon qehan, hetanhan watom iyaye c̣a, iśnana ḣewoskan makoce wan ekta i. Unkan oyate kin he naḣonpi qehan, otonwe etanhanhan huinyun ihakam yapi.

14Unkan huta ekta ihunni qehan, wicota wanwicayaka; qa onśiwicakida, qa tona teḣiya unpi kin hena asniwicaya.

15Unkan wanna ḣtayetu hehan waonspewicakiye cin en hipi qa heyapi; Makoce kin de ḣewotahedan, qa wanna ḣtayetu, heon oyate kin hde wicaśi wo, hecen otonwe ciqadan kin en yapi kta, qa taku yutapi opeic̣itonpi kta.

16Tuka Jesus hewicakiya; Hdapi kta iyecece śni; ito niye taku yutapi wicaqu po.

17Unkan heciyapi; Aguyapi kagapi zaptan qa hogan nonpa, henana den unhapi ce.

18Unkan heya; Hena makau po.

19Unkan oyate kin wato en iyotanke wicaśi, qa aguyapi zaptan qa hogan nonpa nakun icu, qa maḣpiya ekta etonwan, hehan yawaśte, qa yuśpaśpa qa waonspewicakiye cin wicaqu, unkan waonspewicakiye cin iś oyate kin wicaqupi.

20Unkan owasin wotapi qa imnanpi; unkan oyaptapi etanhan pahipi, makanopiye akenonpa ojudan.

21Unkan tona wotapi kin hena wicaśta kektopawinge zaptan ecetu, nakun winoḣinca śiceca koya.

22Hehan ecahankeya Jesus waonspewiyakiye cin wata wan en ope wicaśi, iye itokam akasanpa yapi kta, oyate kin hde wicaśi icunhan.

23Unkan wanna oyate kin hde wicaśi, hehan iśnana paha wan ekta cekiya iyaya. Wanna otpaza tuka iśnana ekta yanka.

24Tuka wata kin wanna mde kin cokaya un, taja on iyotanhan iyekiyapi, tatohekiya yapi nakaeś.

25Unkan hanyetu en itopa kiktapi hehan Jesus mini kin amani en wicaya.

26Unkan waonspewicakiye cin mini kin amani wanyakapi qehan, yuśinyayapi qa heyapi; He wanagi; qa kokipapi on śicahowayapi.

27Tuka Jesus kohanna owicakiye c̣a heya; Cante waśte po; de miye ce; kopehdapi śni po.

28Unkan Inyan ayupte c̣a heya; Itancan he niye hecinhan, ekta mini kin amani u maśi wo.

29Unkan; U wo, eciya. Hecen Inyan wata kin etanhan kun iyaye c̣a Jesus ekta ye kta mini kin amani.

30Tuka wohitiya tateyanpa wanyaka, hehan kokipa. Qa spaye kta iyaya, hehan śicahowaya, qa heya; Itancan, nimayan wo.

31Unkan Jesus ecahankeya nape ekta yekiye c̣a yuwankan icu, qa heciya; Cistinna wacinyaya, tokeca wacetunyahda he.

32Unkan wata kin en opapi hehan amdakedan icu.

33Hehan wata en unpi kin en hipi, makata eḣpeic̣iyapi qa heciyapi; Awicakehan Wakantanka Cinhintku kin he niye.

34Unkan akasanpa ihunnipi hehan Geneseret makoce kin en hipi.

35Unkan wicaśta makoce kin he en unpi kin hena iyekiyapi, qa ihdukśan wanke cin owancaya hośi wicakayapi. Unkan tona teḣiya unpi kin owasin en awicahipi;

36Qa cekiyapi, taśina opapun heceedan kaeś yutanpi kta heon; unkan tona yutanpi kin owasin tanyan asnipi.

Currently Selected:

Mattheos 14: DAKOTANT

Highlight

Copy