Mattheos 12
12
1Anpetu kin hena en, anpetu wakan icunhan, Jesus aguyapi ojupi kin ehna iyaya; unkan waonspewicakiye cin wotektehdapi, qa aguyapi yuksa icupi qa yutapi.
2Unkan Pharisee kin he wanyakapi hehan heciyapi; Wanyaka wo, waonspewicayakiye cin, anpetu wakan icunhan taku econpi kte śni ece kin, hee econpi.
3Unkan iye hewicakiya; Dawid taku econ qon he tohinni dawapi śni he; iye qa tona om un kin wotektehdapi qehan;
4Tipi wakan kin en i, qa aguyapi taninyan ehnakapi kin yuta, he iye qa tona om un kin yutapi kte śni, tuka wośnapi kagapi kin ecedan yutapi kta tuka.
5Qa woope kin en nakun dawapi śni, wośnapi kagapi kin tipi wakan ohna anpetu wakan ahopapi śni eśta iyaonpepica śni unpi.
6Tuka heciciyapi; Tuwe tipi wakan kin isanpa tanka wan den un.
7Wowaonśida wacin qa wośnapi wacin śni ce, eyapi qon he idukcanpi unkanś, tona waḣtanipi śni kin hena wicadacopi kte śni tuka.
8Qa Wicaśta Cinhintku kin he anpetu wakan Itancan kin he nakun ee.
9Hehan hetanhan iyaye c̣a omniciye tipi tawapi kin en i.
10Unkan iho, wicaśta wan nape śnija hen un; unkan wiwangapi qa heciyapi; Anpetu wakan icunhan waasniyapi kta iyececa he; he iyaonpapi kta e heyapi.
11Unkan hewicakiya; Enitanhanpi wicaśta wanji taḣinca wanunyanpi wanjidan yuhe cinhan, he anpetu wakan icunhan woḣa en iyoḣpaya hecinhan, tancan en yuze c̣a ehdaku kte śni he.
12Wicaśta kin he taḣinca wanunyanpi isanpa ece. Heon etanhan anpetu wakan icunhan taku waśte econpi kta iyececa.
13Hehan wicaśta qon heciya; Nape hdukatin wo; hecen yukatin, unkan unma kin iyecen asni icaga.
14Unkan Pharisee kin hetanhan tankan hdapi, qa token ktepi kte cin he akiiapi.
15Tuka Jesus he sdonye c̣a hetanhan tokan iyaya; unkan wicota ḣinca ihakam unpi, qa iye hena owasin asniwicaya:
16Qa nina oyake śni wicaśi.
17Hecen Isaya wicaśta wokcan kin taku eye ciqon yuecetupi kta; he kaken eya;
18Iho, mitahokśdan wahdaḣnige ciqon; waśte wakidake cin on minagi iyuśkin ece; mitaniya kin waqu kta, hecen Ikcewicaśta kin woyaco owicakiyake kta.
19Wicakize kte śni, qa pan kte śni, qa ho kin tuwedan canku ohna naḣon kte śni:
20Cedi kaśuśujapi kin he yukse kte śni, qa haḣonta ide kte cin he kasni kte śni, woyaco he woohiye ekta au śni kinhan:
21Qa iye caje kin Ikcewicaśta wacinyanpi kta.
22Hehan wanji wakan śica yuhnaśkinyan he en ahipi, iśtagonge c̣a ia okitpani; unkan asniyan, hecen iśtagonge c̣a ia okitpani kin he ia qa nakun tonwan.
23Unkan wicaśta ota kin owasin yuśinyayapi qa heyapi; Dawid cinhintku kin he dee śni he.
24Tuka Pharisee kin iś he naḣonpi qehan heyapi; Wicaśta kin de wakan śica napewicaye cin he Beelzebub wakan śica itancan kin on hecon ece.
25Unkan Jesus token canteyuzapi kin he sdonye c̣a hewicakiya; Wokiconze wan iye iyakitedan kiciza eca hinḣpaya ece; nakun otonwe qa tipi otoiyohi iye iyakitedan kicizapi ehantanhan ecen he kte śni.
26Qa Satan Satan napeye cinhan wanna iye iciciza; hecen token tokiconze kin sutaya he kta he.
27Qa miye Beelzebub on wakan śica napewicawaya ehantanhan, nicincapi kin iś taku on napewicayapi he; heon etanhan hena niyacopi kta.
28Tuka miye Wakantanka Taniya on wakan sica napewicawaya hecinhan, Wakantanka tokiconze kin wanna en nihipi.
29Wicaśta waśaka ti kin en, tuwe tin iyaye c̣a taku tawa kin ihangye kta token okihi kta he; tokaheya wicaśta waśake cin kaśke cinhan hehan tipi kin ihangye kta.
30Tuwe mici un śni kinhan he makipajin ece; qa tuwe micipahi śni kinhan he yutakuni sni ece.
31Heon etanhan heciciyapi; Woaḣtani owasin iapi śica ko wicaśta wicakicicajujupi kta; tuka Woniya Wakan aiapi kin he wicaśta wicakicicajujupi kte śni.
32Qa tuwe Wicaśta Cinhintku kin taku śica eciye cinhan, he kicicajujupi kta; tuka tuwe Woniya Wakan kin taku śica eciye cinhan, he kicicajujupi kte śni, wiconi kin de en, qa nakun wiconi u kte cin en.
33Can kin waśte kaga po, kinhan waskuyeca waśte kta; qa iś can kin śica kaga po, kinhan waskuyeca śice kta; can kin waskuyeca tawa kin on sdonyapi ece.
34Wamduśka wicoicage, niśicapi hecen token taku waśte ehapi kta oyakihipi he; wicacante ojudan kin he eciyatanhan wicai kin ia ece.
35Wicaśta waśte kin iye cante waśte ojudan kin eciyatanhan taku waśte hiyuya ece; qa nakun wicaśta śice cin iye cante śica ojudan kin etanhan taku śica hiyuya ece.
36Tuka wicoie waśte śni otoiyohi wicaśta eyapi kin hena on woyaco anpetu kin en ohdakapi ece e kta, he miye eciciyapi
37Nioie kin on niyaowotanpi kta, qa nakun nioie kin on niyacopi kta.
38Hehan wowapi kagapi wanjikji qa Pharisee kin ayuptapi qa heciyapi; Waonspekiya, wowapetokeca wan wanyagunyakiyapi kta uncinpi.
39Tuka iye waayupte c̣a hewicakiya; Wicoicage śice c̣a wawiciḣaḣapi econ sa kin he wowapetokeca da, tuka wowapetokeca wanjidan qupi kte śni, Jonas wicaśta wokcan wowapetokeca tawa kin heceedan kta.
40Anpetu yamni qa hanyetu yamni hehanyan Jonas hogan tanka tezi kin ohna un qon, he iyecen anpetu yamni qa hanyetu yamni Wicaśta Cinhintku kin maka cante kin en un kta.
41Woyaco anpetu kin en Ninewe wicaśta kin inajinpi qa wicoicage kin de yacopi kta; hena e Jonas woyake cin on iyopeic̣iyapi tuka; unkan iho, Jonas isanpa tanka wanji den un.
42Itokaḣ wicaśtayatapi winoḣinca qon he woyaco kin en inajin kta, qa wicoicage kin de yaco kta; eqe Solomon toksape naḣon kta on maka ihanke kin etanhan u tuka; unkan iho, wanji Solomon isanpa tanka den un.
43Woniya śape cin wicaśta kin etanhan tankata hinanpa, hehan makoce puza en omani, ozikiyapi akita, tuka takudan iyeye śni;
44Hehan heya; Tipi mitawa etanhan wahinape ciqon he ake ekta wahde kta. Unkan ekta ki, qa tuwedan ohna yanke śni, kahintapi qa ayuco yuśtanpi, hecen iyeya.
45Hehan iyaye c̣a woniya tokeca śakowin iye isanpa śicapi, hena iwicacu qa om mahen iyaya, qa ohna yukanpi; unkan wicaśta kin he hetanhan teḣiya un, tokaheya un qon isanpa. Wicoicage śice cin de hecece kta.
46Unkan oyate kin hecen wowicakiyaka icunhan, iho, iye hunku qa hunkawanjitku kin tankan hinajinpi qa okiyapi kta cinpi.
47Unkan wanji heciya; Iho, nihun qa nihunkawanji tankan najinpi qa oniciyapi kta cinpi.
48Tuka iye waayupte c̣a tuwe heye cin he heciya; Tuwe inawaya he, qa mihunkawanji kin hena tuwepi he.
49Unkan waonspewicakiye cin ektakiya nape hdugate c̣a heya; Iho, mihun qa mihunkawanji dena eepi ce.
50Tuwe kaśta Ate maḣpiya ekta un tawacin kin ecen econ kinhan he mihunkawanji qa mitawinoḣtin qa mihun ee.
Currently Selected:
Mattheos 12: DAKOTANT
Highlight
Share
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
