m-Ti To L 22

R mL KuO m pai tAH Vo

(lu 14:16-24)

1ye-su ny fai tAH Vo rE: si yi w tA bAO loI 2#yo 3:29. mu kw kuD nyI w ti Ti ro le yi R: bE L R mLY cEO m pai Ti m yeO mO le be kO lo= 3R mL cEO m pai yeO be KuY tO m go Ti ho: tA Ku ye n, mI yi co p bu tA fi Ju kD nyI KuY tO m go Ti ho: n: l ni, m: xU=

4 # m 21:36. w ti ny co p yi tE yi Ti ho: tA fi Ju kD si TE lE bAO loI nu w ny Ku tO m l Fo tAI n n, tI Vw pai j: gL tO lo= Vw a. nyi:O be FLYO m jE: R se; kDo= a xUO mi ye t gu leo= nu w ny R mL cEO m pai kw lAI bA gLI bAO lo=

5go lE VO mi yi w m: PU: siI mi cE, kw mi jeO lo= Ti ro ny ci Cy vY mi kw jeO lo= Ti ro ny LY lA mu jeO lo= 6zeY le su ny co p bu tA ru siI x. to x. PA; ye gL si nyiI yi w tA se; kDO lo= 7#m 24:2. w ti n: ni, m vLY nyiI mA; zu fi Ju kD si nyiI Fo R se; su go Ti ho: tA mL: ye fiO lo= yi w lo PEO mi CuY kDo=

8go TA w ti le yi co p bu tA TE lE bAO loI R mL cEO m pai ny j: gL tO loI yiO le: KuY tO m l Fo n: m: PU:= 9#m 13:47; 21:43. go lE nyi nu w ny jY xy. kw je siI to, zo:O m l Fo V T po tA R mL cEO m pai kw KuY tA lAI bAO lo= 10co p go Ti ho: ny j gu kw do je siI to, zo:O m V T poI VLO m VO miI jiO m VO mi a jU Ku zi; l si nyiI pai kw koH su bi leO lo=

11w ti dU: l si we R: tA lo. nyi nyI go kw pai bU FL m: gw: t m l Fo Ti ro moO lo= 12yi le yi tAI kw Co:oI nu ny pai bU FL m: gw: gw a li TE kw dU lO loH:I bAO lo= yi ny Po, gL du m: jo=

13 # m 8:12. go TA w ti ny yi tA rE: j su tA TE lE bAO loI yi tA CiH CU; lA CU; si nyiI nE xE. mS nA Fi, m kw loH Ju kDI bAO lo= go kw VuY nyi sL: Ci: nyi kD leO Vo=

14a lio bA ny Ku tO m n: my:O lo= siH tO m n: ni.O loI bAO lo=

P-li-sD bu ny ye-su tA R, nyiO m

Ko 12:13-17. lu 20:20-26.

15 # yo 8:6. go TA P-li-sD bu ny ye-su bA KL kw be yi tA a li be wuY le fi n, m do je si gw jEO lo= 16#Ko 3:6. yo 3:2. go lE si yi w ny yi w siH R buO beI Ju-li Ti ho: m l Fo tA yi ty kw fi Ju kD siI m. P:oI nu n: tE,O m V m Vw nu: sDO lo= fai ny tE, tEW be wu-s j gu m. gL siI a m tAO mi m: jo= a lio bA ny nu n: Fo R PyE: tA m: siH= 17go lE nyi Vw nu: tA bA gL lA= nu a li dU jO loH:= si-s tA tA, PU: do dO lH:I do m: d lH:I bAO lo=

18ye-su n: yi w ni, m VLO m lo. do l siI yi w tAI ni, m nyi: tE, rE suoI a xU: wu nyi Vw tA R, nyiO loH:= 19tA, PU: bLY du Pu Ti PA;#(22:19) Ti di-n-ri= Ti nyi w: PU: V lo= Vw tA mo. gL lAI bAO lo= go lE ny yi w Pu Ti PA; yi tA tA, gL lO lo= 20yi ny yi w tAI Fo byE:O be To L fo, TE m a: m tA m V loH:I bAO lo=

21 # ro 13:7. yi w leI si-s tA m V loI bAO lo=

yi yi w tAI go lE V ny si-s tA m si-s tA gLI wu-s tA m wu-s tA gLI bAO lo= 22#yo 8:9. yi w p j kD ny dU: j mL siI yi tA be h, jeO lo=

s-du-kD bu ny ye-su tA R, nyiO m

(Ko 12:18-27. lu 20:27-40)

23 # fi 23:6,8. go Ti nyi kwI sA. yi; lO m m: joI be bA su s-du-kD bu yi tA l si TE lE n nyiO loI 24#wu 38:8. jU 25:5,6. m. P:oI mo-xi leI l Fo Ti ro R nE m: jo jo xUY nyI yi nyi R le yi mH l: tA xH siI yi a yi; bE L yi xU. cE. gL n kO loI bAO lo= 25hL. TA Vw nu: tyO kw yi yi; yi nyi xU: xU. joO lo= R wu: ny R mL hw si R nE m: jo jo xUY siI yi R mL ny yi nyi R bu tA kL ti. yeo= 26a-dLO be a-KeO beI xU: xU. kw Ci yi tA xH si xUYo= 27yi w a jU m k. nA ny R mL RO mi xUYo= 28go lE ny sA. yi; lO m kwI yi ny yi w xU: xU. m kwI a li Ti ro m R mLY V loH:= a lio bA ny yi w a jU yi tA xH nyioI bAO lo=

29ye-su n: Po, gL siI yi w tA TE lE bAO loI nu w CyYO m nyI si xy To LO be wu-s w: nyiO m tA m: sD m kw be V lo= 30a lio bA ny sA. yi; lO m kwI yi w ny R mLO mi m: KuYI a mi:O mi m: Ju= yi w n: mu kw kw m fi du buO le be V lo= 31xUY su sA. yi; lO m tA bAO nyI wu-s le nu w tA bAO m nu w m: U nyi lH:= 32#m 8:11. do 3:6. yi leI Vw n: a-b-l-v yi wu-sO beI yi-s yi wu-sO beI y-ku yi wu-s V loI bAO lo= wu-s ny xUY su bu wu-s m: VI sA. ty su bu wu-s V loI be bAO lo=

33TE m tA l Fo yi zu yi mA; p j kD nyI yi m. gLO m tA yi w dU: j mLO lo=

wY zi wu:O m TU; w

(Ko 12:28-31)

34yi le s-du-kD bu mD nD, KL: CU: mL leO m P-li-sD bu p j ny yi w zi; lO lo= 35yi w ko lo kw m jU: k P: Ti ro nyI yi tA R, nyiO be Ti KL: n nyiO lo= 36m. P:oI jU: k To L kw TU; w a li Ti cE, m wY zi wu:O loH:I bAO lo=

37 # jU 6:5. yi le yi tA TE lE bAO loI nu ny Ti ni, m lES VO miI Ti LY my lES VO miI Ti j: ni, lES VO miI si P nu wu-s tA ni, nU n kO lo= 38TE m ny TU; w yi wu. Ti cE, mO be wu: deO Ti cE, m V lo= 39#lE 19:18. k nA. Ti cE, m ny TE mO be Ti leW V loI nu ny nu ci Cy tA ni, nUO mO le beI nu nL: Co Ti Co tA ni, nU n kO lo= 40#m 7:12. ro 13:10. g 5:14. TU; w TE nyi: cE, kw nyI jU: kO be mD nD, f su To L a jU lES VoH FO loI bA gLO lo=

ye-su yi w tA n nyiO m

(Ko 12:35-37. lu 20:41-44)

41P-li-sD bu zi; lO TAI ye-su le yi w tA Ti KL: n nyiO loI 42#yo 7:42. ji-su tA ny nu w a li dU jO loH:= yi ny a m Fi; R lA, R V loH:I bAO lo=

yi w leI d-wU Fi; R lA, R V loI bAO lo=

43ye-su le yi w tA bAO loI go lE V ny d-wU a li be si si-xy-m-v kw be yi tA siH P KuO loH:= 44#m 26:64. Ko 12:36. gw 110:1. d-wU nyI

siH P le Vw siH P tAI

nuO be Cu: jo lA Ko su bu tA

nu Ci To; Ti Vw m: kD le fi T poI

Vw lA; j Ti CE: kw nyi. nI bAO loI be bAO lo=

45d-wU le yi tA siH P KuO TA n:I yi ny a li be si yi Fi; R lA, R V se: loH:I bAO lo= 46yi w a mO mi Ti KL: si Po, gL m: b l= go Ti nyi k. nA ny a mO mi yi tA a xU: n nyi m: pL.=

Currently Selected:

m-Ti To L 22: LRB

Highlight

Copy