लुका 8
8
यीशुन हिकवोण
1ज्यान पासाण यीशु हेयरा हेयराम एने गावा गावा माय पारचार केरतीन, एने बोगवानान राज ने हाजाली खुबेर होमलावतेन फिरने बाज गीयो, एने तान चेला बी ता हेऱ्याच एता, 2#मत्ती 27:55,56; मरकुस 15:40,41; लुका 23:49एने थोड्युक बायकु बी एत्यु, त्युम रेन थोड्युक बेमारी माय रेन हुदरेल एत्यु, एने त्यु ज्यु हेत्यु; मरीयम जी मगदलीनी केवाताली, ती माय रेन हात बुतड़ा निकलेल एता, 3हेरोदेस ने बण्डारी खजानान लाडी योअन्ना एने सुसन्ना, एने मोकत्युस दिहऱ्यु बायकु एत्यु, त्यु खुद ने पोयशा केरीन यीशुन सेवा चाकरी केरताल्यु।
पेरनारान किस्सो
(मत्ती 13:1-9; मरकुस 4:1-9)
4जेवी मोटली बिड़ टुलो एनी, ते हेयरान माणहे यीशुन ओंगाण चालीन आवा, ते यीशु किस्सा माय केयो;
5“एक पेरनार दाणा पेरने गीयो, पेरने बुखेत थोड़ाक दाणा वाटीन दिड़े पोड़ना, एने चेंदाय गीया, एने चीड़ा ताह खाय गीया। 6थोड़ाक दाणा सापराट्या माय पोड़ना, उगना, पुण माटड्यो नाह जुड़नो केरीन हुक गीया। 7एने थोड़ाक दाणा काटाल्या जुरखील्या माय पोड़ना, एने जुरखील्या ता हेऱ्या एकठा एकठास वोदीन ताह दाब लेदा। 8एने थोड़ाक हाजाली बुई माय पोड़ना, एने उगीन होव माप फोल लावा।”
एने ज्य केणेन पासाण यीशु आयड़ीन केयो, “जान होमेलनेन कान एय, तो होमली लेय!”
किस्सान काम
(मत्ती 13:10-17; मरकुस 4:10-12)
9यीशुन चेला ताह फुशा, “ज्या किस्सान मतलब काय हे?” 10यीशु ताह जापाप आप्यो, “तुमूह बोगवानान राज ने मालमात ने लिकायेल वातुन सोमेज आपेल हे, पुण दिहराह किस्सा माय होमलाव देणु हे, ज्यानकेरता काय ता देखी तीबी नाय देखी, एने होमले तीबी नाय सोमजे।”
दाणा पेरनारान किस्सान आरथो
(मत्ती 13:18-23; मरकुस 4:13-20)
11किस्सान मतलब ज्य हे; बिज बोगवानान वचन हे। 12वाटीन दिड़े वाला दाणा ता हेते, जा वचन होमेलतेह, पुण सैतान आवीन तान मोना माय रेन वचन उखलीन ली जाथे, काहाकाय ओहलो नाय एय काय ताह बुरहो केरीन सुटकारो जुड़ी। 13सापराट्या जागाम पुड़ेल दाणा ज्या हेते, जा वचनाह खुसी माय होमेलतेह, ते खोरा, पुण मुल नाह देरानो केरीन ता थोड़ीक वार वोर बुरहो मेलतेह, एने पारेख आवणे बुखेत बोटकी जातेह। 14थोड़ाक माणहे काटाल्या जुरखील्या माय पोड़ना, ता ज्या हेते, जा वचन होमेलतेह ते खोरा; पुण ओंगाण जाईन चिन्ता, एने मालदेनान कामा माय फासाय जातेह, एने तान फोल नाह पाकीत। 15पुण हाजाली बुई माय पेरायेल ता ज्या हेते, जा वचन होमलीन मोनाम मेलतेह, एने बागे रेन फोल लावतेह।
दिवान किस्सो
(मरकुस 4:21-25)
16 #
मत्ती 5:15; लुका 11:33 कुण बी दिवो पेटाड़ीन पायला बुंदे नाह मेलने, एने नाह खाटला बुंदे मेलने, पुण दिवो मेलनेन जागेच मेलने, काय गेराम आवणाराह उजालो देखाय।
17 #
मत्ती 10:26; लुका 12:2 काहाकाय कायच लिकायेल नाह सोतो, जो देखाय नाय जाय, एने नाह काय डापायेल हे, जो जाणाय नाय जाय, एने नाय देखाय।
18 #
मत्ती 25:29; लुका 19:26 ज्यानकेरता जोगवीन रिवो, काय तुमू काल्ली रिती माय होमेलतेह? काहाकाय जा फाय हे ताह आपाय जाय, एने जा फाय ना सोतो, ता फाय रेन तो बी सांडाड़ाय जाय, जाह तो आपणो सोमजेह।
यीशुन आहख एने बाहख
(मत्ती 12:46-50; मरकुस 3:31-35)
19यीशुन आहख एने बाहख ताह मिलने आवा, पुण बिड़ एती केरीन ता नाह मील सेकना। 20यीशुह माणहे केया, तारी आहख एने बाहख बाहेर उब रेनाह, तुवाह मिलने केतेह।
21यीशु ज्यान जापाप माय ताह केयो, “मारी आहख एने मार बाहख ज्याच हेते, जा बोगवानान वचन होमेलतेह एने मानतेह।”
यीशु वारो एने वादोणाह हाटेवणे
(मत्ती 8:23-27; मरकुस 4:35-41)
22उंजु एक दिह यीशु एने तान चेला डोंडह्या पोर चेड़ना, एने यीशु चेलाह केयो, “आवो आपु देरीयान पार जाहु।” तेवी ता डोंडह्याह सोड़ लेदा एने चाल देना। 23पुण जुलबुखे डोंडह्यो चालने बाजरियेल एतो, ते यीशु हुव गीयो, तेवी उचकाहुच देरीया माय वादोण आवो, एने डोंडह्याम पाणी बोराणे बाज गीया, एने ता दोका माय एता। 24तेवी ता आहने आवीन यीशुह उठाड्या, एने केया, “मालीक, मालीक, आमु खेतेम एणे बाजरेनाह।” तेवी यीशु उठीन वादोणाह एने पाण्यान जेलखाह दोपकाड्यो एने ता थोब गीया, एने ठावको एय गीयो। 25तेवी यीशु ताह केयो, “तुमरो बुरहो का हे?” पुण ता बिय गीया एने बोंगलायीन तान तान केणे बाज गीया, “ज्यो कुण हे, जो वादोण एने पाण्याह बी उकुम आपेह, एने ता तान वात मान्तेह।”
यीशु बुतड़ो लागेल माणहाह हुदारनो
(मत्ती 8:28-34; मरकुस 5:1-20)
26पोशा यीशु एने तान चेला गिरासेनियान देसा माय पोचना,#8:26 गिरासेनिया; थोड़ाक लेख माय गदारा मत्ती 8:28 एने थोड़ाक लेख माय गेरगेसा लिखेल हे। जो गेलीलान ती मीरे हे। 27जेवी यीशु मेराम उतेरनो ते ता हेयरान एक माणुह ताह मिलानो, जा माय मोकतास बुतड़ा एता, तो जुलूम दिह रेन नाह फाड़का पेरतालो एने नाह गेरा माय रेतालो, पुण तो माहणा माय रेतालो। 28तो यीशुह देखीन आयड्यो एने तान ओंगाण पाया पोड़ीन मोठेस सोबदाम केयो, “एय आखाम रेन मोठा बोगवानान बेटाख यीशु! माहु तुवा हेऱ्यो काय काम? मी तुवाह विन्ता केरथु, माहु डेंड मा आपी।” 29काहाकाय यीशु ता बुतड़ाह ता माणहाम रेन निकेलनेन उकुम आपतालो। तानकेरता तो ताह जाहार ताहार सेतावतालो, केरीन माणहे तान आथ पाय हाकली केरीन एने बेड्यु केरीन बांदिन राखवाली केरताला, तीबी तो बांदिल तो तोड़ टाक देतालो, एने बुतड़ो ताह जेंगला माय दोवड़ावते लेन फिरतालो।
30यीशु ताह फुशो, “तारो नाव काय हे?” तो केयो, “फोज” काहाकाय जुलूम बुतड़ा ता माय रिग रियेल एता। 31बुतड़ा यीशुह विन्ता केऱ्या काय आमुह नेरेग कुंड माय जाणेन उकुम मा आपी।#8:31 उंडालो खाडो; जान बुय नाय देखाय उहलो खाडो, अथाह कुंड, ओहलो मानतेह काय आखरी डेंड एणे वोर खाराब जीव देरतीन उंडाले जागे बोंद केराय जाताला।
32ता जागेच बोयड़ा पोर हुवऱ्यान एक मोटलो टुलो चेरने बाजरियेल ईतो, तानकेरता ता यीशुह विन्ता केऱ्या, काय आमुह ओया माय रिगणे दे, यीशु ताह हुवऱ्या माय मोकली दिनो। 33तेवी बुतड़ा ता माणहाम रेन निकलीन हुवऱ्या माय रिग गीया, एने तो हुवऱ्यान टुलो, आड़वाया माय रेन दोवड़ीन देरीया माय जाय पोड़ना, एने बुड़ीन मोर गीया।
34गोवाले जो ईयेल एतो, तो देखीन दोवेड़ना एने गावाम एने हेयराम जाईन तान खुबेर केऱ्या। 35माणहे जो जो ईयेल एतो, तो देखणेन निकेलना एने यीशुन आहने आवीन, एने जा माय रेन बुतड़ा निकलेल एता, ताह यीशुन पायान जागे फाड़का पेरीन एने सुद्दी माय ठावकोस बोह रियेल देखीन बिय गीया; 36जा माणहे ज्यो आखो तान डोला केरीन दिखेल एता, ता माणहाह केया काय बुतड़ा लागेल माणुह किहीक हाजो ईयेल। 37तेवी गिरासेनियान आहने पाहनेन आखा माणहे यीशुह विन्ता केऱ्या, “आमरे न्या रेन जातरे।” काहाकाय ता माणहा माय जुलूम बिय बोराय जायेल एती, तेवी यीशु डोंडह्या पोर चेड़ीन वोल गीयो। 38जा माणहा माय रेन बुतड़ा निकलेल एता, तो यीशुह विन्ता केरने बाज गीयो, “माहु तार हिऱ्यो आवणे दे,” पुण यीशु ताह ज्य केयीन मुकल्यो, 39“तार गेर जातरे एने माणहाह किज्ये काय बोगवान तार केरता कोहलो मोट मोठो काम किरेल हे,” तो जाईन आखा हेयराम पारचार केरने बाज गीयो, “यीशु मार केरता कोहलो मोट मोठो काम किरेल हे।”
याईरान मुरेल सोरीह जिवाड़नो एने एक दुखारी बायकुह हुदारनो
(मत्ती 9:18-26; मरकुस 5:21-43)
40जेवी यीशु पुशो वोलीन गेलील माय आवो, ते माणहे यीशुह खुसी माय मील्या, काहाकाय ता आखा तान वाट जोवताला। 41तोलास माय याईर नावान एक माणुह जो यहुदिन बोक्ती केरन्या गेरान आदिकारी ईतो आवो, एने यीशुन पाया पोड़ीन विन्ता केरने बाज गीयो काय मार गेर चाल। 42काहाकाय तान बारा वोरह्यान एकुच बेटीख एती, एने ती मोरने केरताली, जेवी यीशु ता हिऱ्यो जातालो, ते माणहे ता पोर जाय पोड़ताला। 43#8:43 थोड़ाक लेख माय ती तीन आखी जीवाय आदिकारी पोर खेरीच दियेल नाह लिखेल हे। एक बायकु जीह बारा वोरह्या रेन लुय वोयणेन बेमारी एती, एने जी तीन आखी जीवाय वोंसीन पासाण खीरचो किर दियेल एती, तीबी कुणीच ने आथा केरीन हुदरेल नाह एती, 44पासाण रेन आवीन यीशुन फाड़कान सेवड़ाह सापल्यी, एने चालोच तीन लुय वोयणे बोंद एय गीयो। 45ज्या पोर यीशु केयो, “माहु कुण सापलेल?” जेवी आखा माणहे नाह नाह केणे बाज गीया, ते पतरस केयो, “एय मालीक, तुवाह ते बिड़ दाबेह, एने तार पोर माणहे आव पोड़तेह।”
46पुण यीशु केयो, “माहु कुण सापलेल हे, काहाकाय मी जाण लियेल हे, काय मार माय रेन ताकेत निकलेल हे।” 47जेवी बायकु देख्यी काय मी लीकाय नाह सिकेत, ते कापतेन आवी, एने यीशुन पाया पोड़ीन आखा माणहान सोमोर केयी काय ती कायतान केरीन यीशुह सापलेल, एने किहीक चालोच हुदरी गियी। 48यीशु तीह केयो, “बेटी, तारो बुरहो तुवाह हुदार दियेल हे, बे फिकेर जातरे।”
49तेवी यीशु ज्य केणेच बाजरियेल ईतोन एक जाण यहुदिन बोक्ती केरनेन गेरान आदिकारीन ता रेन आवीन केयो, “तार सोरी मोर जायेल हे; एवी गुरूह तेकलीत मा आपी।”
50ज्यी वात होमलीन यीशु याईराह केयो, “बिय मा; बुरहो उलोस केर, तेवी ती वोच जाय,”
51गेरा माय आवीन यीशु पतरस, योहान, याकुब, एने सोरीन आईख आबाख ओलास दिहरा कुणीच ता हिऱ्यो माय आवणे नाह दिनो। 52आखा माणहे तीन केरता साती ठोकीन रेड़ताला, पुण यीशु ताह केयो, “रिड़ो मा; ती मुरेल नाह सोती, पुण हुवणे बाजरेनीह।”
53ता माणहे ज्यो सोमजीन काय ती मोर गियीह, ता माणहे यीशुन मोजाक उड़ावणे बाज गीया। 54पुण यीशु तीन आथ देरीन केयो, “एय बेटी, उठ।” 55तेवी तीन जीव वोलीन आव लागो, एने ती चालोच उठीन उबरी गियी, एने यीशु उकुम आप्यो काय ज्यीह काह खाणेन आपो। 56तीन आहख आबोख बोंगलाय गीया, पुण यीशु ताह सोमजाड्यो काय जो ईयेल हे, तो कुणीह मा किहो।
Currently Selected:
लुका 8: NTNii2020
Highlight
Share
Copy
Want to have your highlights saved across all your devices? Sign up or sign in
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
