योहान 13
13
यीशु चेलान पाय दोवणो
1यीशु जाण गीयो काय फसहान तिवारान पेल। माहु ज्यी दुनियाह सोड़ीन आबाख फाय जाणेन टेम आव लागेल हे। ते जीहे यीशु दुनियाम तान माणहा हिऱ्यो मोंग केरतालो, तिहेच केरीन ताह सेवली बुखेत वोर मोंग किरते रिनो।
2 # 13:2 सैतान यीशुह दुको दिन देरावणेन टेम; नाहते सैतान पेलुस निर्णय लियेल ईतो काय शिमोन ने सुरो यहुदा यीशुह दुको दिन देरावण्यो हे। यीशु एने तान चेला हांजीन खाणो खाणे बाजरियेल एता। पुण शिमोन ने बिटोख यहुदा इस्कोरितीन मोना माय पेलुच ने बुतड़ो यीशुह देरावणेन वात टाक मीलेल ईतो। 3यीशुह मालुम एतो काय आबोख आखो काय मार आथाम आप दियेल हे, एने मी बोगवाना फाय रेन आयेल हे; एने बोगवाना फाय जाथु। 4तानकेरता यीशु खाणो खाणेन पासाण तान फाड़का काड्यो, एने एक पोटको लेन तान कोमेर बांद्यो। 5तेवी ठामला माय पाणी बोरीन चेलान पाय दोवणे बाज गीयो एने जा पोटका केरीन कोमेर बांद रियेल ईतो, तास केरीन पाय नुसणे बाज गीयो। 6जेवी यीशु शिमोन पतरस फाय आवो, तेवी पतरस केयो, “एय मालीक, तु मार पाय दुवेह काय?”
7यीशु पतरसाह जापाप आप्यो, “जो मी केरथु, एवी तु ताह नाह जाणेत, पुण ज्यान पासाण सोमजेह।”
8पतरस यीशुह केयो, “तु मार पायाह मा दुवे!”
ज्यो होमलीन यीशु पतरसाह केयो, “केदी मी तारा पायाह नाय दोवु, ताहार मार हेऱ्यो तारो कायच बी बाग नाह।”
9शिमोन पतरस यीशुह केयो, “एय मालीक, मार पाय ओलाच नाह! पुण मार आथ एने मुंड बी दोव दे!”
10 # 13:10 थोड़ाक लेख माय तान पायान सिवाय नाह लिखेल सोतो। यीशु पतरसाह केयो, “जो उंगील लेदोह, ताह तान पायाह सोड़ीन उंजु काह दोवणेन जोरेवरी नाह, पुण तो पुरो चोखो हे। तुमू चोखाला हेते, पुण आखान आखान चोखाला नाह।” 11यीशु तान देरावणाराह जाणतालो तानकेरता यीशु केयो, “तुमरे माय आखान आखान चोखाला नाह।”
12 #
लुका 22:27
जेवी यीशु आखान पाय दोव दिनो, एने तान फाड़का पेरीन पुशो बोह गीयो। ते चेलाह केयो, “तुमू सोमज्या काय मी तुमरी हिऱ्यो काय किरेल हे? 13माहु तुमू गुरू एने मालीक केतेह, ज्यो ठिकुच केतेह, काहाकाय मी तोच हे। 14मी ज्यु गुरू, एने मालीक एन तुमरा पाय दुयेल हे। ते तुमूह बी एका दिहरान पाय दोवणे जुवे। 15काहाकाय मी ज्यो तुमूह एक नमुनो देखाड़ दियेल हे काय जिहकेरीन मी तुमरी हिऱ्यो किरेल हे, तिहेच केरीन तुमू बी दिहरा हेऱ्या केऱ्या किरो। 16#मत्ती 10:24; लुका 6:40; योहान 15:20मी तुमूह खेरीच केथु, ‘पावोर तान मालक्याह रेन मुठो नाह, एने मोकलायेल तान मोकेलनाराह रेन मुठो नाह।’ 17ज्यी वात तुमू जाणतेह, एने केदी ती पोर चालहो ते बोरकेतवाला हेते!”
18मी तुमरे आखान बाराम नाह केणे बाजरिनोह; एने मी जाह निवाड़ रिनोह। ताह मी ओलेखथु; पुण ज्यो ज्यानकेरता हे काय पुस्तेक ने ज्यी वात पुरी एणे जुवे, “जो मार रूटो खाते, तोच माहु दुको दियेल हे।#बजन 41:9 19एवी मी ज्यी गेटना एणेन पेल तुमूह केय देथु, काहाकाय जेवी ज्यी गेटना एय जाय, तेवी तुमू बुरहो किरो काय ‘मी तोच हे।’” 20#मत्ती 10:40; मरकुस 9:37; लुका 9:48; 10:16मी तुमूह खेरीच केथु: “जो मार मोकेलनाराह स्वीकार किरेह तो माहु स्वीकारेह; एने जो माहु स्वीकारेह तो मार मोकेलनाराह स्वीकारेह।”
यीशु तान बुरहो तोड़नाराह देखाड़ेह
(मत्ती 26:20-25; मरकुस 14:17-21; लुका 22:21-23)
21जेवी यीशु ज्यु वातु केय दिनो, तेवी यीशु जीवा माय जुलूम दुखी ईनो, एने ज्यी गोवाय दिनो, “मी तुमूह खेरीच केथु, तुमरे माय रेन एक माहु देरावी।”
22ते चेला सेंका केरीन एका दिहरान उगे देखणे बाज गीया, एने केया, “ज्यो कुणीन बाराम केणे बाजरिनोह?” 23तान चेलाम रेन एक जाह यीशु मोंग केरतालो, यीशु हिऱ्यो निड़ो वोलीन बुहेल ईतो। 24तेवी शिमोन पतरस ताह ईसारो केरीन फुशो, “यीशुह फुस कुणीन बाराम किथे?”
25तेवी तो तिहेच केरीन यीशुन साती निही डोंगो वोलीन यीशुह फुशो, “एय मालीक, तो कुण हे?”
26यीशु जापाप आप्यो, “जाह मी रोटान टुकड़ो अंगुरान रोह माय बुड़ावीन आपुह, एने शिमोन इस्कोरितीन सोराह यहुदाह आप्यो।” 27एने टुकड़ो लेताच ता माय बुतड़ो रिग गीयो। तेवी यीशु ताह केयो, “जो तु केरने हुदेह, तो उतवाल्युह केर!” 28यीशु काहा इहकेरीन केयो ज्यान बाराम पाटला हेऱ्या बोह रियेल एकाह बी ज्यी वात सोमेज माय नाह आवी। 29पोयशान थेयली यहुदा फाय रेताली, केरीन थोड़ाक ज्यो सोमेजना काय यीशु तिवारान केरता जोरेवरी सोमान वेचातो लावणे किथे, एने ज्यो काय गेरब्याह काह आपणेन किथे।
30तेवी यहुदा रोटान टुकड़ो लेन चालोच बाहेर जात रिनो। एने ज्यी रातीन टेम एती।
एक नोवालो उकुम
31जेवी यहुदाह बाहेर जात रेणेन बाद यीशु केयो, “एवी माणहान बेटाख ने बोड़ाय ईयेल हे, एने बोगवानान बोड़ाय ता माय ईयेल हे। 32केदी बोगवानान बोड़ाय तान द्वारा ईयेल हे, ते बोगवान बी खुद तान बोड़ाय केरी, एने चालोच केरी। 33#योहान 7:34एय मार सोरा, मी उंजु थोड़ीक वार तुमरी हिऱ्यो हे ओवता तुमू माहु हुदहो। पुण जा मी जाथु ता तुमू नाह आव सेकते; इहकेरीन मी यहुदि आदिकारीह कियेल ईतो, ‘एने एवी मी तिहेच केरीन तुमूह बी केथु।’ 34#योहान 15:12,17; 1 योहान 3:23; 2 योहान 1:5एने मी तुमूह एक नोवालो उकुम आपथु, ‘तुमू एका दिहरा पोर मोंग किरो। जिहकेरीन मी तुमरी हिऱ्यो मोंग किरेल हे, तिहेच केरीन तुमू बी एका दिहरा हेऱ्या मोंग किरो।’ 35केदी तुमू एका दिहरा हेऱ्या मोंग किरहो, ते आखा माणहे जाण जाती काय तुमू मारा चेला हेते।”
पतरस माहु नाकारी ज्यान बाराम यीशु केणे
(मत्ती 26:31-35; मरकुस 14:27-31; लुका 22:31-34)
36शिमोन पतरस यीशुह फुशो, “एय मालीक, तु का जाथे?”
यीशु जापाप आप्यो, “जा मी जाथु ता मार पासाण एवी तु नाह आव सिकेत; पुण बाद माय मार पासाण आवहे।”
37पतरस यीशुह केयो, “एय मालीक, मी तार पासाण एवी काहा नाह आव सेकथु? तार केरता मी मार जीवाह बी आप देह!”
38यीशु पतरसाह जापाप आप्यो, “तु मार केरता तारा जीवाह आप दिहे काय? मी तुवाह खेरीच केथु, ‘कुकड़ो वाहणेन पेल तु तीन वारीन माहु नाकार हे।’”
Currently Selected:
योहान 13: NTNii2020
Highlight
Share
Copy
Want to have your highlights saved across all your devices? Sign up or sign in
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
